Iva'um na'a mu tnorung a
1 O Timotius!
Ya'a ralang urun ma usurak lahir oa na'a Ubu ovu Yesus Kristus wahan ralan a.
Na'a amar i Yesus Kristus veka nma ewal ma nfareta tamata ra wean lahir Raja,
na Ia veka nfaleka inukun verin tamata ovi rmata roak ovu ovi rva'at obin.
Ba usurak oa ne:
2 Fwamalik Ubu Ni vaivatul ra verin tamata ra.
Mususan wam,
boma velik ne inar te wol inar ma rarenar,
na'uk mungrihi watan.
Fwakena tamata ovi rair afa ovi wol kena ra,
mtabu tamata ovi rotu afa sian ra ovu fwaloling ira ma rotu afa lolin watan.
Wean i mair ira,
na mtahang ralam ma dawan.
3 Tevek naran ni amar ana,
tamata ra veka rafena ma rarenar tamata ovi rair afa ovi kena ra,
na'uk veka rorang watan afa ovi inar ra.
Ira veka rasdovu guru rivun ma rair afa ovi inar ma rarenar a.
4 Ira veka rafena ma rarenar Ubu Ni vaivatul ra,
na'uk inar ma rarenar tomu ovi wol kena ra.
5 Usurak oa ta baba,
ma velik ne sian te lolin,
na mususan wam ma lolin.
Mtahang ralam watan na'a mu susa ra.
Fwabana mu karya ma fwamalik Ubu Ni Ivar Lolin verin tamata ra.
Fwabana ma lolin vali mu karya liak ovi Ubu nala verin oa.
6 Ya'a ala roak ning vava'at neluk persembahan verin Ubu,
ovu ning amar sarseri roak ma umata.*
7 Ya'a orang ma lolin roak banbanan i Ubu nala verin ya'a.
Otu munuk roak karya ovi Ubu nala verin ya'a,
ovu ufamalik lalawatan dida inorang na'a Yesus Kristus.
8 Ba unaban watan ma amar kena,
ma Duila'a veka naval ya'a na'a lanit ratan,
tevek ning vava'at kena ovu Ia.
Ia veka nukun tamata ra ovu Ni inukun mnga'un.
Duila'a wol mane naval watan ya'a,
na'uk verin tamata ovi rlobang Ia ovu inar urun ma nma ewal.
Paulus nala snurak verin Timotius
9 Timotius,
yarak mdava linga'an ma mwa ma itrua na'a ini veki.
10 Ufalak wean inyai,
tevek Demas nti talik roak ya'a ma nti kota Tesalonika,
tevek nlobang afa ovi rna'a lanit ivavan ini.
Kreskes nti propinsi Galatia,
na Titus nti vali ma nana'a propinsi Dalmatia.
11 Lukas a'uk sa'i ndoku ovu ya'a.
Ba mdava Markus ma mirua mya ini,
tevek nlobang ya'a na'a ning karya.
12 Ya'a usinir roak Tikhikus ma nti kota Efesus.
13 Ba amar i veka mwa ini,
na mtaha ning ravit blawat i ufadoku verin Karpus na'a kota Troas.
Mtaha vali ning buku ra.
Ya'a inak buku ovi rotu tali afwatan ulin ra nlia munuk buku liak ra.
Timotius ntaha Paulus ni buku lalulung ra verin ia (2 Timotius 4:13)
14 Aleksander i ba'i notu binan ovu afa liak ra tali tembaga notu sian da'in ya'a,
ba Ubu veka nbalas ni afa sian ovi notu ra.
15 Msi'ik wam ma lolin,
tevek ia nangal ma dawan Ivar Lolin i amfamalik a.
16 Amar i betfasa ulotar tenang na'a fareta,
na wol tamata isa vali nma ma nfatuang ya'a,
na'uk rti talik munuk ya'a.
Era verin Ubu ma deka nukun ira na'a afa yai.
17 Na'uk Duila'a nfatuang ya'a ma nfangrebat ya'a,
ba ufamalik Ni Ivar Lolin a verin tamata ovi wol Yahudi ra ma rarenar munuk.
Ubu nlobang ya'a ma tamata ovi mane rfedan ya'a wol rot-nala.
18 Duila'a veka nbelat ya'a ma nfaroa sian tali ya'a.
Ia veka novun ya'a ma ti una'a Ni Fareta na'a lanit ratan.
Ita tfadawang Ia lalawatan.
Kena urun!
Paulus nala snurak situli
19 Ya'a ala salam verin Priskila,
Akwila ovu Onesiforus ni rahan teta.
20 Erastus nleal kota Korintus obin,
na uban-talik vali Trofimus na'a kota Miletus,
tevek na'ut inyai,
na nawar ia.
21 Radridin sarseri roak,
ba mususan wam ma mwa ini kikyai.
Ebulus,
Pudes,
Linus,
Klaudia ovu tamata liak ovi rorang Yesus rala salam verin oa.
22 Fara Duila'a nfatuang oa ovu nfangrebat ralam a,
ovu vali naflahar bir tinemun.
Surat i ususan ini,
lawan watan ini.Ya'a Paulus,
ala salam verin mia