Yesus Kristus nala linga'an verin Timotius
1 Baba Timotius,
oa wean yanak lalean oa.
Fara mu inorang nangrebat,
tevek Kristus Yesus nala roak Ni rala lolin verin ita.
2 Oa mrenar roak afa ovi air verin tamata rivun,
ma rsi'ik ovu rarenar lahir.
Ba mair vali tamata ovi rot-orang lalawatan afa ovi rfalak ra,
ovu ira rka'a ma rair tamata liak ra.
3 Baba,
oa musti movu ya'a ma mususan wam,
boma mtahang nala afa susa ra,
wean meluk suldadu lolin verin Kristus Yesus.
4 Ni lolin a,
mu vava'at wean suldadu ovi rfabana rira karya ra.
Ira inar ma rot-orang afa ovi rira dawan nfareta verin ira.
Wean inyai bi,
ira wol rovu na'a karya liak ra.
5 Tamata ovi rkarya verin Ubu,
na ira wearira tamata ovi rafla silalia.
Ba ira musti rot-orang inukun ra na'a silalia yai,
tevek wean i wol rorang,
na wol rala akataka verin ira.
6 Tamata va'i i nkarya ma dawan al notu ni va'i a,
ia veka na'an lan ni karya enan a.
Oa vali mkarya ma dawan,
boma Ubu nfakena oa na'a mu karya.
7 Fwanovak ma lolin afa ovi ufalak ra,
tevek Duila'a veka nlobang oa ma fwan-aran munuk afa avyai.
8 Mungnanang Yesus Kristus,
ubun nusin Raja Daud.
Ubu nfava'at ewal roak Ia tali matmatan.
Ufamalik Ivar Lolin ini verin tamata ra.
9 Tamata ra rotu sian ya'a ovu rkeak ya'a ovu kakeak tma'an,
tevek ufamalik Ubu Ni Ivar Lolin ini.
Ira rotu ya'a wean tamata sian watan.
Na'uk wol rkeak nala Ubu Ni vaivatul ra.
10 Wean inyai bi,
utahang nal ralang ma uvara watan susa ovi utuan ra.
Velik ne tamata ra rotu sian ya'a,
na'uk ufamalik watan Ubu Ni vaivatul ra,
ma tamata ovi Ia nfili ra rarenar ma rorang,
boma na'a amar i veka nma yai,
na rira vava'at kakiwal vali na'a Kristus Yesus wan i nfitik nyadat.
11-12 Ba fara mtahang nal ralam na'a susa ra,
tevek vaivatul ovi kena urun:
“Wean i tovu roak na'a Kristus Ni matmatan,
na veka tva'at vali ovu Ia.
Wean i tatahang ralad na'a afa susa ra,
na ita veka tfareta vali ovu Ia na'ut i nma ewal.
Na'uk wean i tfalak ne wol torang roak Ia,
na Ia veka nfalak vali ne,
wol nka'a ita.
13 Wean i ita tfadoku ma wol torang roak Ia,
na Ia veka not-nala watan afa ovi nfalak ra,
tevek Ia nfakena lahir Ni tnorung ra.”
Timotius nfangnanang ira ma deka rorang vaivatul ovi rfarsangal Ubu Ni vaivatul ra
14 Timotius,
eka fwangnanang tamata ovi rorang Yesus na'a afa ovi ufalak ra.
Ubu nala ngrebat verin oa ma msurak ira ma deka vair na'a vaivatul ihirira ra.
Afa avyai wol ihir akataka,
ovu veka rot-visal tamata ovi rarenar,
rira inorang a.
15 Msi'ik ma lolin ma mair Ubu Ni vaivatul mnga'un ra,
ma ntorung ma fwabana Ni karya.
Mkarya ma dawan,
boma ti naran mu amar kena ma mdiri Ubu wahan ralan,
na wol mwa'it.
Oa musti mka'a Ubu Ni vaivatul ra ma mair ma lolin tamata ra.
16 Deka morang ngrihi ovi rfarsangal Ubu Ni vaivatul ra.
Afa ovi tamata avyai rair ra rotu ma tamata ra rfaroa tenarira tali Ubu.
17 Afa ovi rair ra ra'an ralarira ra wean suhut ngnea-ngnuban i nsoru ma na'an tamata tenan a.
Tali tamata avyai,
na tamata irua nararira Himeneus ovu Filetus.
18 Ira rban-talik roak linga'an i kena,
ba rotu ma tamata boku wol rorang roak Yesus.
Ira rfalak ne,
Ubu nfava'at munuk roak tamata ra tali matmatan.
19 Velik ne wean inyai,
na Ubu Ni vaivatul ra kena urun,
ba torang watan.
Ubu Ni vaivatul ra wean vatu dawan ovi rotu na'a rahan ni fanderen ma nangrebat urun.
Na'a vatu dawan avyai rwalur ne,
“Duila'a nka'a Ni tamata ra munuk,”
ovu Ia nfalak vali ne,
“Tamata iki watan nfalak ne Duila'a Ni ia,
na musti ntalik ma deka notu kikyai salasilan ra.”*
Ira rotu ta'a tali masa, perak, aa ovu bal (2 Timotius 2:20)
20 Baba,
eka mrenar vaivatul kamkuma ovi.
Na'a rahan dawan isa,
na trea binan ovu ta'a rivun ma rotu boku tali masa,
boku tali perak,
na boku vali tali aa te bal.
Tamata ra rala binan ovu ta'a ovi rotu tali masa te perak na'a amar dawan,
te wean i mangun ra rma,
na'uk binan ovu ta'a liak ra rala ma amar-amar al rafna'an na'a.
21 Ba wean i tamata isa ntalik roak tali afa ovi wol lolin ra,
na Ubu veka nfili ia ma nkarya verin Ia.
Ia veka wean binan lolin ovi tamata ra rala ma ralang rira mangun ra.
Ubu Ni roak tamata yai,
ba ni vava'at nmerat.
Ia ntorung ma novu karya lolin ra munuk.
22 Ba wean inyai ta baba,
na deka motu afa sian ovi tuvmarmuri ba'i rotu ra.
Mkarya ma dawan ma mu vava'at nmalola,
ovu ralam urun ma fwakena afa ovi fwalak ma rotu ra.
Fara mu silobang a dawan ovu mdava ni malinan watan.
Motu wean inyai vali ovu tamata ovi ralarira urun ma raraning Duila'a.
23 Deka morang tamata ovi vair ma rangrihi afa ovi boda-badi ra.
Oa mka'a roak ne,
afa avyai rotu watan mi rsingarahi i.
24 Na'uk tamata ovi rkarya verin Ubu deka rsingarahi ovu tamata liak.
Ira musti rmarkai verin tamata ra munuk,
ovu rsiair ma lolin,
ovu vali rira fikiran a blawat.
25 Ira musti rfakabava tenarira ra ma al rsurak ovu rtabu tamata ovi rangal ira,
boma Ubu ki nkarya na'a ralarira ra.
Fara rahil ma rtalik tali rira salasilan ra,
boma rorang ne,
Ubu Ni vaivatul ra kena urun.
26 Wean inyai beti rka'a ne,
lan ana nitdawan nweang nala ira ma rorang ni linga'an.
Na'uk fiang ini,
rorang roak Ubu Ni vaivatul ra,
ba nitdawan wol not-nala roak ira.