Snurak na'a tamata sansinir
1 Kida,
eka fwalak verin tamata sansinir ovi rorang Yesus ma ralang duarira ra,
boma tamata ra deka rfalak sian Ubu naran a,
ovu vali afa ovi tair ra.
2 Tamata sansinir ovi duarira ra rorang Ubu,
na ira musti ralang duarira ra,
tevek irmunuk rorang Yesus.
Fiang ini,
rira karya verin duarira ra musti lolin lia lan a,
tevek irmunuk duarira ra rira inorang a wear isa,
ovu Ubu nlobang vali ira.
Paulus nsurak Timotius ma nsi'ik ma lolin tamata ovi rair afa ovi wol kena, ovu tamata ra deka rlobang rira metan ra
Baba,
msurak a mair ma lolin afa avyai verin ira,
boma rorang.
3 Tamata iki watan nair afa liak tali afa ovi tair ra,
na ia wol norang dida Duila'a Yesus Kristus Ni afa kena ovi nair ra.
Ira wol rorang vali Ni vaivatul ovi rfaturu ne,
wean inba ma dida vava'at nmalola.
4 Tamata avyai rfakaratat tenarira ra ovu wol rka'a akataka.
Ira wearira tamata ovi inar da'in ma vair na'a vaivatul ihirira ra.
Tamata ovi rarenar i vair na'a afa avyai,
na ira veka rbo'itea tamata rira metan ra ma rfikir a'uk tenarira ra ovu rsingarahi sian,
ovu vali rsifalak sian ira lalawatan.
Ira ranovak a'uk sian ma rsituka ira.
5 Ira rira fikiran ra rasmotak roak,
ba vair lalawatan ovu tamata liak ra,
ovu vali rafena roak vaivatul ovi kena ra.
Ira ranovak ne,
veka rorang rira agama,
boma rira metan rivun.
6 Na'uk tamata ovi rorang afa ovi Ubu ralan nfalak ra ovu rfikir watan ne,
afa ovi rna'a ira,
naran roak ma rva'at,
na lolin urun verin ira.
7 Tevek wol tataha akataka tma lanit ivavan a,
ovu vali wol tataha akataka na'ut i tmata.
8 Ba wean i afamtahan ovu kadaravit ra rna'a,
na inyai naran watan.
9 Na'uk tamata ovi inar ma rira metan rivun,
nitdawan nweang ira ma rotu salasilan rivun.
Ira rorang watan afa sian ovi rfakeri ralarira ra,
ma wora watan ira.
Ira wearira afwatan i na'a sasesa ralan,
na'uk wol nka'a ne,
veka nmata.
10 Tevek wean i tlobang kubang,
na salasilan rivun ila'a veka rabwa'ar na'a raladida ra.
Tamata boku rdava a'uk kubang ma rban-talik rira inorang a.
Ira rtuan afa susa rivun,
ba ovan-amar rvakar watan na'a ralarira ra.
Paulus nsurak Timotius
11 Na'uk Timotius,
oa meluk sansinir verin Ubu,
ba mufla ma fwaroa oa tali afa sian ovi ufamalik inlangin a.
Morang Ubu Ni banbanan,
ovu fara mu vava'at nmalola,
mu inorang ntafal,
mlobang tamata liak ra,
mtahang nal ralam,
ovu vali fwamafung mu vaivatul ra verin tamata ra.
12 Wean tamata ovi rafla silalia ma rsi'ik ne,
iki utun,
ba wean inyai morang ma lolin Yesus Kristus.
Mkarya ovu ralam urun,
boma Ubu nala vava'at kakiwal verin oa.
Motu wean inyai,
tevek Ubu nfili oa na'ut i fwalak ne,
morang Yesus Kristus na'a tamata rivun waharira ralan ra.
13-14 Ya'a era verin Ubu i nala vava'at verin afakataka munuk,
ovu Kristus Yesus i wol nfonak ralan ma nfamalik Ni vaivatul mnga'un ra verin Pontius Pilatus,
ma rarenar afa i era tali oa ta baba.
Era verin oa ma ralam urun ma morang lahir afa ovi ufalak roak verin oa.
Motu wean ini,
boma mu vava'at nmalola,
ti naran i dida Duila'a Yesus Kristus veka nma ewal.
15 Yesus veka nma ewal,
na'uk Ubu sa'i nfadoku amar yai.
Ubu a'uk sa'i Ni ngrebat,
ovu Raja dawan Ia ma ntaha fareta ra munuk,
ovu vali Ni dawan nlia munuk raja ra.
Duila'a Ia verin dua ra munuk,
ba tamata ra raraning Ia.*
16 Ubu a'uk wol nmata.
Ia nva'at na'a lyawan i nfitik nyadat a,
ma wol tamata isa nfaser-nala Ia.
Wol tamata isa vali bisma nsi'ik nala Ia.
Ni fareta wol ni wahan,
ba tfadawang a'uk Ia.
Kena urun.
17 Fwareta tamata ovi rira metan rivun na'a lanit ivavan ini,
boma deka rfakaratat tenarira ra,
te deka rfaklo'i rira vava'at ra na'a kubang,
tevek afa avyai veka rmamu watan.
Na'uk ni lolin a,
na tamata avyai rfaklo'i ralarira ra verin Ubu.
Ia a'uk sa'i nala afa ovi rlobang ita na'a dida vava'at ra,
ma ralad ra lolin watan.
18 Msurak ira ma rotu a'uk lolin a,
ralarira lolin urun verin tamata liak ra,
ovu inar ma rlobang tamata ra.
19 Ira rotu afa lolin wean inyai,
na rasdovu roak rira kesratan ra ma reluk ngrebat verin ira na'a amar ovi veka rma ini.
Rotu wean ini,
na ira veka rira vava'at kakiwal.
20 Timotius,
eka msi'ik ma lolin afa ovi Ubu nala roak verin oa.
Fwaroa tenam tali ngrihi ovi vu watan ra,
ovu vaivatul ovi wol ralang Ubu.
Tamata ovi rangrihi vaivatul avyai rfalak ne,
rka'a afa ovi rfalak ra,
na'uk velik aba,
wol rka'a lahir.
21 Tamata boku rfalak ne,
rira kaka'a dawan,
na'uk velik aba,
wol kena.
Afa yai rotu mi wol rorang roak Yesus.
Fara Ubu naflahar bir tinemun.
Ning surat i utulis ini,
lawan watan ini.Ya'a Paulus,
ala salam verin mia