Paulus ni surat i ntulis lan verin Timotius
Paulus nala salam verin Timotius
1 Ya'a,
Paulus,
ususan surat ini.
Ubu i ntevut dida salasilan ra,
ovu Kristus Yesus i tfaklo'i a'uk dida vava'at ra verin Ia,
nfareta ya'a ma eluk rasul verin Ia.
2 Timotius,
ususan surat ini verin oa ta baba.
Oa wean yanak lalean,
tevek itrua dida inorang wear isa.
Fara Yamadida Ubila'a ovu Duila'a Kristus Yesus nala Ni rala lolin ovu nfaturu Ni silobang verin oa,
boma mu vava'at a malinan watan.
Paulus nfamalik tamata ovi rair afa ovi sala ra, boma deka rorang ira
3 Na'ut i uti propinsi Makedonia,
na era verin oa ma mna'a watan kota Efesus.
Tamata boku na'a inyai rair afa ovi wol mnga'un ra,
ba era ma mtab-teri ira,
boma deka rair afa avyai.
4 Mtab-teri ira,
boma deka rvatuk rira amar ra ma rfamalik tomu siklabir ra,
ovu deka rfamalik daftar blawat i rfadoku uburir-nusirira ovi rmata roak veli,
nararira ra rna'a.
Afa avyai rotu mi tamata ra vair ma dawan ma deka rka'a Ubu Ni banbanan a.
Ba fwalak verin ira ma rorang a'uk Ubu,
boma rka'a Ni banbanan verin ira.
5 Ning snurak yai ihin a ne,
fara tamata ralarira ila'a ra rmerat ovu rmalola ma rorang urun Duila'a,
boma rlobang vali tamata liak ra.
6 Tamata boku wol rorang roak afa lolin avyai,
ba rala lalawatan vaivatul ovi wol ihir lahir.
7 Ira inar ma rair Musa ni inukun ra ma ranovak ne,
rka'a ma dawan ma rfalyawang Surat Ralan.
Na'uk wol rka'a afa ovi rfalak ra.
8 Ita tka'a roak ne,
Musa ni inukun ra lolin verin ita,
wean i tfabana ma lolin inukun avyai.*
9 Ita tka'a ne,
inukun avyai wol mane verin tamata ovi rira vava'at ra rmalola.
Na'uk verin tamata ovi wol rorang Ubu ma rangal Musa ni inukun ra,
tamata ovi rotu salasilan lalawatan,
tamata ovi wol raraning Ubu ovu tamata ovi rfalak sian Ia,
tamata ovi rfedan renarira te yamarira,
ovu vali tamata sifedan liak ra.
10 Musa ni inukun ra rfalak teri tamata ovi rsifa tia ma ovu tamata ovi wol awarira verin ira,
brana ovi ka'i rsifa ovu brana,
tamata ovi rbori tamata liak ra mane rfedi ira ovu tamata ovi rsiklabir.
Inukun nfalak teri vali tamata ovi rala vaivatul siklabir ma al rlotar tamata,
ovu tamata ovi rafena ma rorang afa kena ovi tamata rair ra.
11 Afa ovi kena yai rtali Ubu Ni Ivar Lolin.
Ubu Ni dawan nlia munuk,
ba inovan ma tamata ra raraning a'uk Ia.
Ia nala Ivar Lolin yai verin ya'a ma ufabana Ni karya.
Paulus ralan lolin, tevek Ubu nala Ni rala lolin verin ia
12 Ufalak fara weninyai verin dida Duila'a Kristus Yesus,
tevek Ia nka'a ne,
orang urun Ia,
ba nfili ya'a ma ufabana Ni karya.
Ia nala roak ngrebat verin ya'a ma nfalak ne,
ya'a veka ot-nala Ni karya,
13 velik ne lalan ana,
ufalak sian ovu ungrihi visal-vasil Ia,
ovu vali uwi-uwa tamata ovi rorang Ia.
Na'uk Ia nfaturu Ni silobang verin ya'a,
tevek na'ut inyai wol orang Ia obin,
ba wol uka'a afa ovi otu ra.
14 Duila'a nala Ni rala lolin verin ya'a ma nfangora ralang a,
* ba orang Ia ovu ulobang tamata liak ra vali.
Wean vali inyai verin tamata ovi rorang Kristus Yesus.
15 Vaivatul ovi kena lahir,
ba fara tamata ra munuk veka rorang.
Vaivatul ovi wean ini,
“Kristus Yesus nma lanit ivavan a ma nsikat tamata ra tali rira salasilan ra,
boma rira vava'at kakiwal.”
Ya'a ning salasilan ra rlia munuk tamata ra.
16 Na'uk wean inyai,
bi Kristus Yesus nala Ni rala lolin verin ya'a.
Ia notu wean inyai ma nfaturu ne,
ntahang ma dawan ralan a verin ya'a,
tevek ning salasilan ra nlia munuk tamata ra.
Ia ntahang ralan verin ya'a,
boma tamata liak ra rsi'ik afa lolin ovi notu verin ya'a,
ma veka rorang Ia ma rira vava'at kakiwal.
17 Talang ovu tfadawang Ubu.
Ia Raja dawan Ia,
ba Ni fareta wol ni wahan.
Ia wol nmata ovu vali wol trea Ia.
Ubu ikisa watan.
Mya ma tfadawang naran a.
Kena urun!
Paulus nala varvara verin Timotius
18 Timotius,
ya'a yanak oa!
Ya'a mane ala snurak verin oa:
Era ma mungnanang afa ovi amar lan ana,
nabi ra rfamalik na'a afa ovi veka mtuan ra na'a amar ovi veka rma.
Eka mala vaivatul avyai ma reluk mu mneran,
ovu mkiwal ma mangal nala tamata ovi rair afa ovi wol kena ra.*
19 Morang a'uk Ubu,
boma mu inorang nangrebat.
Fara ralam ila'a nmerat vali.
Tamata boku ralar ila'a wol rmerat,
ba rira inorang nmata.
20 Tali tamata avyai,
na tamata irua nararira Himeneus ovu Aleksander.
Ya'a ala roak ira verin nitdawan ma nwi-nwa ira,
boma deka rfalak sian Ubu.
Paulus nsurak Timotius tali bu'i ralan (1 Timotius 1:18)