1 Era ma dua ra musti myotu afa ovi rmalola ra ovu afa ovi kena ra verin bira tamata sansinir ra.
Mingnanang,
tevek duabira vali verin Duila'a na'a lanit ratan.
Paulus nera ma tamata ovi rorang Yesus raflurut lalawatan verin ia
2 Iva'ubira ma miflurut.
Msyi'ik wabira na'a bira falurut ra ma deka mtyuba,
ovu fyalak fara weninyai verin Ubu na'a ralabira ra.*
3 Miflurut vali verin ami,
boma Ubu nala linga'an verin ami ma amfamalik Ni Ivar Lolin na'a Kristus.
Ivar Lolin yai lan ana,
wol nfavotuk obin.
Rvatuk ya'a ma una'a bu'i ralan,
tevek ufamalik Ni Ivar Lolin yai.
4 Miflurut verin ya'a,
boma bisma ufalyawang nala Ni Ivar Lolin yai ma lyawan,
ma inovan ovu Ubu ralan a.
5 Na'ut i mia tamata inorang ra mimunuk tamata ovi wol rorang Kristus,
na musti ralabira urun na'a afa ovi myotu ra,
ovu afa ovi fyalak ra.
Deka miwahak bira amar,
na'uk mdyava linga'an ma fyamalik Duila'a.
6 Musti mingrihi ngalalahang watan,
boma bira vaivatul ra rfaloling ralarira ra,
ovu rotu ma inarira urun.
Bira fikiran ra musti blawat,
boma mkya'a ma byalat tamata iki watan,
wean i norat mia,
ovu vaivatul ovi kena ra.*
Paulus ni vaivatul ovi rban-muri lalean a ovu ni salam a
7 Terad a valid Tikhikus i tlobang urun ia yai,
veka nfamalik munuk verin mia na'a afa ovi rkena ya'a.
Ia not-orang lalawatan afa ovi Duila'a nfalak ra ovu amamunuk amkarya verin Ia.
8 Usinir ia ma ti nalola mia ma nala surat ini verin mia,
boma mkya'a mami vava'at a,
ma nfaloling ralabira ra.
9 Ya'a ufalak ma irua Onesimus rti.
Onesimus yai ntali bira ahu vali.
Ia not-orang lalawatan afa ovi Duila'a nfalak ra,
ovu amlobang urun ia.
Irua veka rfamalik munuk na'a afa ovi amtuan roak na'a ini verin mia.
10 Ning kida i Amrua amna'a bu'i ralan,
naran Aristarkhus,
nala salam verin mia.
Barnabas ni tiniman i naran Markus nala salam vali verin mia.
(Ya'a ufaivar lan roak ia verin mia,
ma wean i nma ma ntuan mia,
na msyi'ik ma lolin watan ia.)
11 Yesus i rfanara ia ne,
Yustus,
nala vali salam verin mia.
Tali tamata Yahudi ovi rorang roak Duila'a Yesus,
na Aristarkhus,
Markus,
ovu Yustus ira a'uk sa'i rkarya ovu ya'a ma amfaivar verin tamata liak na'a i wean inba ma Ubu nfareta tamata ra wean lahir Raja.
Ira rlobang urun ya'a ma rfangrebat ralang a.
12 Epafras nala vali salam verin mia.
Ia ntali vali bira sidovung i na'a Kolose.
Ia nkarya verin Kristus Yesus ovu iva'un urun ma naflurut verin mia.
Naflurut,
boma bira dardirin a nangrebat na'a bira inorang a,
ma mkya'a lahir ma myot-orang afa ovi Ubu ralan nfalak ra.
13 Ya'a ufalak urun ne,
Epafras nkarya urun verin mia ovu tamata ovi rna'a kota Laodikia ovu Hierapolis.
14 Mami kida Dokter Lukas i amlobang ia,
ovu Demas,
rala salam vali verin mia.
15 Ya'a Paulus ala salam verin terad a valid tamata ovi rorang Yesus na'a Laodikia.
Ala salam vali verin terad i naran Nimfa,
ovu tamata inorang rira sidovung i rasdovu ira na'a ni rahan a.*
16 Wean i byas munuk roak surat ini verin tamata ovi rorang Yesus rira sidovung na'a Kolose ma mimunuk mryenar,
na mkyirim vali verin tamata ovi rorang Yesus rira sidovung na'a Laodikia ma rbas.
Mia musti byas vali surat i utulis verin sidovung na'a Laodikia.*
17 Fyalak verin Arkhipus ne,
“Motu munuk karya i Duila'a nala verin oa,
tevek mu vava'at isa roak ovu Yesus.”
18 Ya'a Paulus ala salam verin mia.
Ya'a ka'i utulis vaivatul ovi rban-muri na'a surat ini,
boma mkya'a ne,
aksa ya'a utulis surat ini.
Deka miblufang ya'a,
tevek una'a bu'i ralan obin.
Uflurut verin Ubu ma fara nala Ni rala lolin verin mia.
Ning surat a lawan watan ini.Salam tali ya'a,
Paulus