Snurak verin kasiko'u ra ovu renarir-yamarira ra
1 Kasiko'u ra eka mryenar!
Mia bira vava'at isa roak ovu Duila'a Yesus,
ba musti myot-orang afa ovi renabir-yamabira rfalak ra,
tevek inovan ma myotu wean inyai.
2-3 Ubu nfareta na'a Ni Surat Ralan a ne,
“Myalang renabir-yamabira ra.”
Inukun i Ubu nala yai betfasa nala ovu Ni tnorung a.
Ia nala tnorung yai ma nfalak ne,
“Wean i myalang renabir-yamabira ra,
na Ubu veka nala Ni kalolin a verin mia,
ovu bira vava'at a mnanat na'a lanit ivavan ini.”*
4 Brana ovi yanabira roak,
deka myotu ma yanabira ra rangrova mia,
tevek bira vaivatul ra ovu afa ovi myotu ra.
Na'uk msyurak ovu myair ira tali afa ovi Duila'a Yesus nair ra.
Snurak verin tamata sansinir ra ovu tamata ovi rfareta ira
5 Terang a valing ovi myeluk tamata sansinir,
mia musti myalang urun bira dawan ovi rna'a lanit ivavan ini,
ovu myot-orang afa ovi rfalak ra.
Ralabira urun ma myot-orang afa ovi rfalak ra ovu byobar Ubu,
wean lahir i myot-orang Duila'a Yesus Ni afa ovi nfalak ra.
6 Deka myotu watan ma bira dawan ra ralarira lolin wean i mimunuk mnya'a isa,
boma rsi'ik ma rfadawang mia.
Na'uk mkyarya ovu ralabira urun,
velik ne wol rna'a.
Myotu wean inyai,
na wean lahir i mkyarya roak verin Yesus Kristus,
ovu myot-orang roak afa ovi Ubu ralan nfalak ma myotu a.
7 Deka mkyarya watan tevek rkiwal mia,
na'uk mkyarya ovu ralabira urun.
Deka minovak na'a ralabira ra ne,
mkyarya verin tamata ra watan,
na'uk wean lahir i mkyarya verin Duila'a.
8 Mingnanang ne,
tamata iki watan,
velik ne tamata sansinir te wol tamata sansinir,
wean i notu afa ovi lolin ra,
na Duila'a veka naval ni rala lolin a.
9 Tamata ovi fyareta tamata sansinir ra,
mia musti myotu vali lolin a wean inyai verin bira tamata sansinir ra,
ovu deka vaibira aleman ma fyabobar ira.
Mingnanang,
tevek mia duabira vali na'a lanit ratan ovu Ia wol nfili tamata.
Tamata ovi rorang Yesus musti rala Ubu Ni ngrebat a ma al rotu rihi ovu nait sian ra
10 Terang a valing averi,
mane ufakbosal roak ning snurak a,
ba ufalak verin mia ne,
fara bira vava'at ra isa ovu Ubu lalawatan,
boma Ni ngrebat i dawan ila'a,
nfangrebat ralabira ra.
11 Suldadu ra wean i mane rti rotu rihi,
na rasusan munuk lahir rira bakreat ra ma rung a reluk ira,
boma al rteri ira tali rira musu ra.
Mia weabira vali suldadu avyai,
ba musti myung-myeluk mia ovu afa ovi Ubu nala roak verin mia ma ala myangal nitdawan ni siweang ra.
12 Ita wol totu rihi ovu tamata,
na'uk totu rihi ovu nait sian ra ovu rira ngrebat ra,
ovu vali rira fareta ra munuk.
Totu rihi vali ovu nait sian ovi rfareta na'a lanit a,
ovu vali nait sian rira raja ovi rfareta vali lanit ivavan ini.
13 Ba myung-myeluk lahir bira bakreat ovi Ubu nala roak verin mia,
ma myangal nala nitdawan.
Myotu wean inyai,
boma wean i mtyuan angangal,
na mdyiri watan na'a bira inorang.
Wean i myangal nala munuk roak afa avyai,
na bira inorang a veka nangrebat watan verin Ubu,
ovu myangal lalawatan afa avyai,
wean i rangal ewal mia.
14 Wean lahir suldadu ra ba'i rala ngesa al rngesa ira ma ti rotu rihi,
na mia wean vali ira,
ba misusan bira vava'at a ovu afa ovi kena ra.
Bira dardirin a musti nangrebat na'a bira inorang a,
ovu bira vava'at ra rmalola ovu kena watan.
Wean lahir suldadu ra roru ravit tma'an al rteri tenarira ra,
na bira afa lolin ovi myotu ra,
rotu ma nteri vali mia.*
15 Suldadu ra rbaki rira tatea a al rteri earira ra ma al nlobang ira,
boma wol rleka,
ovu rafla ma lolin.
Mia weabira vali inyai,
ba musti ralabira urun ma fyamalik Ubu Ni Ivar Lolin i nala malinan a.
Myotu wean inyai,
boma bira inorang a nangrebat.
16 Wean lahir suldadu ra rtaha tarteri al rteri tenarira ra,
na mia musti wean vali ira ma myorang urun Ubu,
al myotu teri vali mia.
Myotu wean inyai lalawatan,
boma bis myangal nala nitdawan ni dubil ovi ronga ra.
17 Wean lahir suldadu ra raklulu kalulu tma'an ma al rteri ulurira ra,
na mia musti mkya'a mnga'un ne,
Ubu nsikat mia tali bira salasilan ra,
ma bira vava'at kakiwal.
* Wean lahir suldadu ra rngesa rira nahin blawat ra,
ba mia musti myala Ubu Ni vaivatul i Ni Roh a nala roak verin mia,
ma myangal nitdawan.
18 Ba na'ut inba watan,
na miflurut verin Ubu ma myera Ni Roh a ma nlobang mia ma mkya'a ne,
wean inba ma miflurut na'a afaka watan.
Mia musti msyi'ik wabira lalawatan na'a bira falurut ra,
ovu deka mtyalik ma miflurut verin tamata inorang ra munuk.
19 Miflurut vali verin ya'a,
boma lokat amar,
na Ubu veka nala munuk vaivatul ovi veka ufalak ra,
ovu vali notu ma ubrahi ma ufamalik Ni Ivar Lolin i lan ana,
Ia wol nfavotuk obin.
20 Duila'a Yesus nfili ya'a ma eluk Ni tamata sansinir ma ufabana Ni Ivar Lolin a,
ma fiang ini una'a bu'i ralan.
Na'uk era verin mia ma miflurut verin ya'a,
boma ubrahi ma ufamalik Ivar Lolin yai,
tevek Ubu ralan nfalak ma wean inyai.
Paulus ni vaivatul situli ra
21 Terang a valing averi,
terad a valid i naran Tikhikus,
ntaha surat ini verin mia ovu veka nfamalik munuk afa ovi otu ra ovu ning ivar a,
boma mkya'a ning vava'at ovu ning karya ra.
Tikhikus i tlobang urun ia yai,
iva'un ma nfabana Duila'a Ni karya.
22 Ba wean inyai,
bi usinir ia ma ti nalola mia,
boma nfamalik mami vava'at ra ma mkya'a,
ma nfaloling ralabira ra.
23 Fara Yamadida Ubila'a ovu Duila'a Yesus Kristus nala Ni malinan a verin mia tamata inorang ra munuk na'a Efesus,
ovu vali notu ma msyilobang mia ma myorang a'uk Kristus.
24 Era ma Ubu nala Ni kalolin a verin mia munuk,
tamata ovi ralabira urun ma mlyobang Duila'a Yesus Kristus,
nata ti wol ni wahan.
Ning surat i utulis ini,
lawan watan ini.Ya'a Paulus,
ala salam verin mia