Paulus ni surat verin tamata ovi rorang Yesus na'a propinsi Galatia
Paulus nala salam verin tamata ovi rorang Yesus rira sidovung ra na'a propinsi Galatia
1-2 Ya'a,
Paulus,
ukirim surat ini verin tamata ovi rorang Yesus rira sidovung ra na'a propinsi Galatia.
Tamata ra wol rfili ya'a ma eluk rasul,
na'uk Yesus Kristus ovu Yamadida Ubila'a i nfava'at ewal Ia tali matmatan a,
ka'i nfili ya'a.
Amamunuk terad a valid ovi rorang Yesus amna'a ini.*
3 Amaflurut verin Yamadida Ubila'a ovu Duila'a Yesus Kristus ma fara nala Ni rala lolin verin mia,
ovu notu ma ralabira ra malinan watan.
4 Ia not-orang afa ovi Yamadida Ubila'a ralan nfalak a ma nmata,
tevek dida salasilan ra.
Notu wean inyai ma naling ita tali tamata rira afa sian ovi rotu ra ovu ranovak ra.
5 Tfadawang a'uk Ia,
nata ti wol ni wahan!
Kena urun.
Paulus ralan nwa'uk tamata ovi rorang Yesus na'a Galatia, tevek wol rorang Ubu Ni Ivar Lolin a
6 Ya'a ubrian mia,
tevek wol mnanat lahir obin ma myorang Kristus,
na mifla talik roak Kristus Ni rala lolin i nala verin mia,
ma myorang ivar liak i tamata boku rfalak ne,
lolin vali.
7 Velik aba,
ivar liak wol mnga'un,
na'uk tamata boku rlabir bira fikiran ra ovu afa sala ovi rair ra,
ovu inar ma rkati Ubu Ni Ivar Lolin i nfamalik Kristus.
8 Na'uk velik ne ami te Ubu Ni sansinir tali lanit ratan nfamalik ivar i naling ia tali Ubu Ni Ivar Lolin i amfamalik roak verin mia,
na fara Ubu nukun ia ma nana'a yafwan kakiwal.
9 Ami amfalak lan roak verin mia,
na'uk fiang ini ufalak fasa ewal ne,
tamata iki nfamalik ivar i naling ia tali Ubu Ni Ivar Lolin i mryenar roak tali ami,
na fara Ubu nukun ia ma nana'a yafwan kakiwal.
10 Ba udava wahang ralan na'a tamata ra,
te otu ma Ubu ralan a lolin?
Ya'a wol usahak ma otu ma tamata ra inar ya'a.
Wean i udava wahang ralan na'a tamata ra,
na Kristus wol Ni sansinir verin ya'a.
Ubu nera Paulus ma neluk Ni rasul
11 Terang a valing averi,
ya'a ufalak urun verin mia ne,
Ubu Ni Ivar Lolin i ufamalik roak yai wol ntali tamata rira fikiran ra.
12 Tamata ra wol rala Ivar Lolin yai verin ya'a,
ovu wol tamata isa vali nair Ivar Lolin yai verin ya'a,
na'uk Yesus Kristus ka'i nfavotuk lahir Ivar Lolin yai verin ya'a.
13 Mia mryenar roak ning vava'at lan a,
na'ut i orang agama Yahudi ni adat ra.
Ya'a uwi-uwa ma dawan tamata ovi rorang Yesus,
ovu udava linga'an ma ot-visal rira sidovung ra.
14 Uka'a ma lolin afa ovi agama Yahudi rair ra,
nlia tali ning kida ovi tuvu isa ovu ya'a.
Ba ya'a iva'ung urun ma ufabana adat ovi ubumam-nusimami ra rair roak a.
15 Na'uk amar ovi una'a kevralan obin,
na Ubu nfili roak ya'a ovu nera ya'a ovu Ni rala lolin a.
16 Ubu nfalyawang Yanan a verin ya'a ma uka'a lahir Ia,
boma ti ufamalik Ivar Lolin yai verin tamata ovi wol Yahudi ra.
Na'uk amar i Ubu nfili ya'a,
na wol uti ma era snurak tali tamata.
17 Ya'a vali wol uva'al uti Yerusalem ma utuan tamata ovi rna'a lan roak rasul,
na'uk uti lahir wan lean vu dawan i naran Arab,
beti ewal ya'a na'a amar liak ma uma kota Damsyik.*
18 Varat itelu nelak roak,
beti uva'al uti Yerusalem ma utuan Petrus.
Una'a ni rahan amar vutu rahin ilima.*
19 Utuan Yakobus i a'an lalean verin Duila'a Yesus,
na'uk wol utuan rasul liak ra.*
20 Ufwaba lahir na'a Ubu wahan ralan a ma ufalak ne,
afa ovi ufamalik roak verin mia yai kena urun,
wol usiklabir!
21 Nata uti propinsi Siria ovu propinsi Kilikia.
22 Tamata ovi rorang Kristus,
rira sidovung ra na'a propinsi Yudea,
wol rka'a ya'a obin.
23 Ira rarenar watan tamata ra rfalak ne,
“Tamata yai lan ana,
nwi-nwa ma dawan ami,
ovu nkiwal ma nvisal mami inorang,
na'uk fiang ini ia nfamalik Ubu Ni Ivar Lolin!”
24 Ba raraning Ubu,
tevek Ni afa ovi notu roak na'a ning vava'at a.