1 Terang a valing averi,
ulobang urun mia.
Ubu notu Ni tnorung avyai verin ita.
Ba wean inyai,
na ita musti tfaroa tenadida ra ovu raladida ra tali afa ovi ngra-ngrodi ra munuk.
Totu wean inyai ma al nfaturu lahir ne,
talang urun Ubu,
ba tasahak urun ma dida vava'at ra rmerat urun.*
Paulus inan lolin, tevek tamata ovi rorang Yesus na'a kota Korintus rahil roak ma rtalik tali afa sian ovi rotu ra
2 Terang a valing averi,
amera verin mia ma myala ami na'a ralabira ra.
Ami wol amotu sala verin tamata isa vali,
te wol amfaruki tamata isa,
ovu wol amdava utumami tali tamata isa vali.
3 Ya'a ufalak wean inyai,
na wol mane ufasala mia.
Ufalak lan roak ne,
mia mnya'a roak ralamami ra,
ba isa roak ita,
ti naran i tmata a.
4 Ya'a ungrihi verin mia ovu ni malolan a watan,
ovu vali ufadawang mia.
Na'ut i amtuan susa rivun,
na mia fyaloling ralang a,
ovu ralang lolin urun,
tevek mia.
5 Na'ut i amaran Makedonia,
na wol mami amar ma amyari ami.
Na'a afaka watan,
na amtuan susa.
Tamata ovi wol rtali tamata ovi rorang Yesus rira sidovung rfalak sian ami,
ovu inar ma rsingarahi ovu ami,
ovu ambobar vali afa boku na'a ralamami ra,
tevek amfikir mia.
6 Na'uk Ubu nfaloling tamata ovi ralarira ra lalau.
Ia nsinir Titus nma ma nfaloling ralamami ra.
7 Ami ralamami ra lolin na'ut i Titus nma,
na'uk nlia tali inyai,
na ralamami ra lolin urun tevek nfamalik ne,
mia fyaloling ralan a.
Ia nfamalik vali verin ami ne,
mia myaseak urun ma mtyuan ya'a,
ovu myahil roak tali bira afa ovi lan a myotu ra.
Nfalak vali ne,
fiang ini ralabira urun roak ma iva'ubira ma myotu afa ovi ufalak ra.
Afa avyai rotu ma ralang a ntafal ma lolin urun i lahir.
8 Ba velik ne otu roak ma ralabira lalau ovu ning surat yai,
na'uk wol ahil tali afa i otu yai.
Kena urun,
tevek amar i utulis surat yai,
na ahil tevek uka'a ne,
surat yai notu ma ralabira lalau,
na'uk ralabira i lalau yai wol mnanat.*
9 Na'uk fiang ini ralang a lolin urun.
Ning rala lolin yai wol ntali ralabira i lalau yai.
Na'uk ralabira lalau i notu ma myahil ma mtyalik tali bira salasilan ra,
wean lahir i Ubu ralan nfalak a,
ba wol amfaruki mia.
10 Ralabira i lalau yai wean lahir i Ubu ralan a nfalak a,
ovu notu ma tamata ra rkati rira fikiran ra ma rahil ma rtalik tali rira salasilan ra.
Ia nsikat tamata avyai tali rira salasilan ra,
ma rira vava'at kakiwal.
Wean i tamata ra rahil wean inyai,
na wol rfarnuang roak ne,
sian a nana'a ralarira ra.
Na'uk tamata ralarira lalau i ntali watan afa ovi tamata ralarira rfalak ra,
veka notu ma tamata ra rira matmatan kakiwal.
11 Eka minovak na'a ralabira lalau i Ubu ralan a nfalak yai.
Ralabira lalau yai notu ma ralabira urun ovu mlyotar nala tenabira ra.
Afa yai notu vali ma mingrova tamata ovi rotu salasilan ra,
ovu byobar,
betane salasilan yai notu ma myot-orang vali.
Ralabira i lalau yai notu vali ma myaseak ma mtyuan ya'a,
ovu iva'ubira ma myotu afa ovi ufalak ra.
Wol mane inyai watan,
na'uk mibrahi vali ma myukun lahir tamata i notu sala.
Afa ovi myotu munuk roak yai rfaturu lahir ne,
wol bira sala.
12 Wean inyai bi utulis roak surat yai verin mia,
na'uk wol mane utulis surat yai verin tamata i notu sala a.
Wol utulis surat yai vali verin tamata ovi rfarnuang sala i tamata liak isa notu a.
Na'uk utulis surat yai verin mia munuk,
boma na'a Ubu wahan ralan a,
na ka'i mkya'a lahir ne,
bira silobang a dawan urun verin ami.
13 Bira afa ovi myotu ra rotu ma ralamami lolin urun.
Nlia tali inyai,
na ralamami ra lolin urun,
tevek amrenar ne,
mia myotu ma Titus ralan a lolin urun ovu ralan a malinan.
14 Na'ut i Titus wol nti nalola mia obin,
na ufamalik roak bira lolin a verin ia.
Mia wol fyama'it ya'a,
tevek myot-orang lahir afa ovi amfalak roak verin ia.
Afa ovi ufalak roak verin mia yai kena lahir ovu afa ovi amfalak verin Titus,
ma al amfadawang mia.
Ba tali inyai,
na nfaturu lahir ne,
afa ovi amfalak verin Titus yai kena lahir.
15 Fiang ini ia nlobang urun mia,
tevek nangnanang ne,
myot-orang lahir afa ovi nfalak roak verin mia yai,
ovu vali na'ut i ti nalola mia,
na myalang urun ia.
16 Ya'a ralang a lolin urun,
tevek na'a afaka watan,
na orang urun mia.