Paulus nala salam verin tamata ovi rorang Yesus na'a kota Roma
1 Terang a valing averi,
ya'a inak ma ufamalik verin mia vata i naran Febe.
* Teradida ini tamata lolin ia.
Ia nkarya al nlobang tamata ovi rorang Yesus rira sidovung na'a kota Kengkrea.*
2 Wean i nti ma nalola mia,
na mtyorung ma myala ia wean terad a valid ra na'a Duila'a,
tevek inovan ma tamata ovi rorang Yesus rotu wean inyai.
Mlyobang ia,
wean i nera lablobang tali mia,
tevek ia nlobang tamata rivun roak,
ovu nlobang vali ya'a.
3 Ya'a inak ma ala salam verin Priskila ovu Akwila.
Amamunuk amkarya verin Kristus Yesus.*
4 Amar ovi rti roak veli,
na ira wol rbobar ma rmata al rlobang ya'a.
Ufalak fara weninyai verin ira,
ovu wol mane ya'a watan,
na'uk tamata ovi wol Yahudi na'uk rorang Yesus,
rira sidovung ra munuk,
rfalak vali fara weninyai verin ira.
5 Ala salam vali verin tamata ovi rorang Yesus rira sidovung i rasdovu ira na'a rira rahan.
Ala salam verin Epenetus,
terang i ulobang urun ia.
Na'a propinsi Asia,
na ia norang lan Kristus,
beti tamata liak ra.
6 Ala salam vali verin Maria.
Ia nkarya ma al nlobang ma dawan mia.
7 Ala salam verin Andronikus ovu Yunias.
Terang irua ini tamata Yahudi ira vali wean ya'a,
ovu lan ra'abu'i vali ira ovu ya'a.
Ira rorang lan Kristus beti ya'a,
ovu vali ira reluk rasul ovi tamata ra ralang ira.
8 Ala salam verin Ampliatus,
terang i ulobang urun ia.
Ia ni vava'at isa roak ovu Duila'a wean vali ya'a.
9 Ala salam vali verin Urbanus,
terang i amamunuk amkarya verin Kristus.
Salam vali verin ning kida Stakhis i ulobang urun ia.
10 Ala salam vali verin Apeles i nfaturu roak ne,
not-orang afa ovi Kristus nfalak ra,
velik ne ntuan susa dawan.
Salam vali verin tamata ovi rna'a Aristobulus ni rahan.
11 Ala salam vali verin Herodion,
terang ini tamata Yahudi ia vali wean ya'a.
Salam vali verin tamata ovi rorang Yesus na'a Narkisus ni rahan.
12 Ala salam vali verin Trifena ovu Trifosa.
Ira rkarya ma dawan urun verin Duila'a.
Salam vali verin Persis i ulobang urun ia.
Ia nkarya ma dawan vali verin Duila'a.*
13 Ala salam vali verin Rufus ovu renan a.
Rufus ni inorang verin Duila'a notu ma tamata rivun ralang ia.
Renan a,
wean watan ya'a renang a.
14 Ala salam verin Asinkritus,
Flegon,
Hermes,
Patrobas,
Hermas ovu vali terad a valid ovi irmunuk rasdovu ira.
15 Salam vali verin Filologus,
Yulia,
Nereus ovu uran a,
Olimpas ovu vali tamata ovi rorang Yesus,
irmunuk rasdovu ira.*
16 Ba lokat mia ka'i myala salam vali verin terabir-valibira ra ovu msyivoan mia ovu Ubu Ni lolin a.
Tamata ovi rorang Yesus rira sidovung ra munuk,
rala salam vali verin mia.
Paulus nfalyawang afa lolin ovi tamata ovi rorang Yesus musti rotu na'a rira vava'at ra
17 Terang a valing averi,
era urun verin mia ma msyi'ik wabira ma lolin na'a tamata ovi rotu ma bira sidovung a nama'ar,
ovu vali rweang mia ma myorang rira afa ovi rair ra.
Ira rair afa ovi wol kena ra,
ovu wol wean lahir afa ovi mryenar roak.
Ba fyaroa lahir tenabira tali ira!
18 Ufalak wean inyai,
tevek tamata avyai wol rkarya verin dida Duila'a Kristus,
na'uk rfikir watan tenarira ra ma rfakena afa ovi ralarira rfalak ra.
Ira rala vaivatul lolin ovu rfadawang tamata ra ma rlabir nala tamata ovi rira dardirin wol rangrebat na'a rira inorang a.
19 Tamata ra munuk rarenar roak ne,
mia myot-orang lalawatan afa ovi Ubu nfalak ra.
Wean inyai,
bi ralang a lolin urun.
Na'uk era ma mkya'a ma fyikir ma lolin na'a afa ovi lolin ra,
ovu deka myotu afa ovi sala te sian ra.
20 Ubu i notu ma dida vava'at ra malinan a,
veka not-visal lahir nitdawan ni ngrebat a,
ovu notu ma nsoak na'a wahabira ralan ra.
Fara dida Duila'a Yesus nala Ni rala lolin verin bir tinemun.*
21 Ning kida Timotius i amrua amkarya,
nala salam vali verin bir tinemun.
Lukius,
Yason ovu Sosipater,
rala vali salam verin mia.
Terang irtelu ini tamata Yahudi ira wean vali ya'a.
22 Ya'a Tertius,
utulis Paulus ni vaivatul ra na'a ni surat ini,
ala salam vali verin mia,
tevek itmunuk torang Duila'a Yesus.
23 Gayus nala salam vali verin mia.
Ya'a Paulus,
una'a teri ni rahan,
ovu tamata ovi rorang Yesus rira sidovung i rasdovu ira na'a ni rahan.
Erastus i nasusan fareta ni kubang a,
nala salam vali verin mia.
Terad i Kwartus nala salam vali verin mia.
Paulus nfadawang Ubu naran a
25 Mya ma tfadawang Ubu naran a!
Ia Ni ngrebat a notu ma ita bisma torang lalawatan Ia,
tevek mryenar roak Ubu Ni Ivar Lolin i nfamalik Yesus Kristus.
Ufamalik Ivar Lolin yai wean lahir afa ovi Ubu nfalyawang verin ya'a.
Ivar yai,
lan ana neluk afa fanfonak ma tamata rivun wol rka'a.
26 Na'uk fiang ini Ubu nfavotuk roak Ivar yai,
ovu nfareta ami ma amfalyawang Ivar yai verin tamata ra munuk.
Ubu nana'a lalawatan,
ovu afa ovi nabi ra rtulis roak rotu ma tamata ra munuk rka'a roak Ivar yai,
boma rorang Ubu ovu rot-orang Ni afa ovi nfalak ra.
27 Tfadawang Ubu!
Ubu ikisa watan Ia.
Ia a'uk sa'i Ni kaka'a dawan na'a afaka watan.
Inovan ma tfadawang Ia,
nata ti wol ni wahan,
tevek afa ovi Yesus Kristus notu ra.
Kena urun.
Ning surat a lawan watan ini.Salam tali ya'a,
Paulus