Paulus newal ia nti Efesus
1 Apolos na'a kota Korintus obin,
na Paulus nbana raa ma nti naran kota Efesus.
Na'a inyai,
na ntuan tamata boku ovi rorang roak Yesus,
2 ma norat ira ne,
“Terang a valing averi,
tali amar i beti myorang Yesus,
na mtyorung ma Ubu nala Ni Roh ma nleal ralabira ra te wahal?”
Ira rfalak ne,
“Wahal obin.
Ami wol amrenar lahir ne,
Ubu Ni Roh nana'a.”
3 Ba Paulus norat ira ne,
“Wean inyai,
na myorang aka na'ut amar i rbaptis mia?”
Ira rfalak ne,
“Ami amorang afa ovi Yohanes nair verin tamata ovi nbaptis ira.”
4 Paulus nfalak ne,
“Yohanes nbaptis tamata ra ma nfaturu ne,
rahil roak ma rtalik tali rira salasilan ra.
Ia nfalak verin tamata ra ma musti rorang tamata i veka nma yai.
Tamata yai naran Yesus.”
5 Ti ma rarenar afa ovi nfalak ra,
na inar ma rbaptis ewal ira na'a Duila'a Yesus naran a.
6 Paulus nfadoku liman a na'a ira,
na Ubu Ni Roh nsuta ma nleal lahir ira ma rala vai ovi wol rka'a ra.
Ira rarenar lahir tali Ubu ma ti rfamalik Ni vaivatul ra verin tamata ra.
7 Tamata avyai ka'a bi vutu rahin irua.
8 Paulus nana'a inyai vulan itelu ma ba'i nti Yahudi rira rahan falurut ma nsiair,
ovu wol nbobar tamata ra.
Ia ni dardirin nangrebat ma nfamalik Ubu Ni Fareta verin ira,
boma rorang Yesus ma nfareta vali ira.
9 Na'uk boku ulurira vatu ma rafena ma rorang afa ovi nfalak ra,
ma rfalak sian Duila'a Yesus Ni Linga'an verin tamata rivun.
Ba Paulus nban-talik ira,
ma novun tamata ovi rorang Yesus ma rti skola isa.
Tamata isa naran Tiranus ntaha skola yai,
ma lokat amar Paulus nair ira na'a inyai.
10 Paulus na'a inyai varat irua ma nfamalik Duila'a Yesus,
ba tamata ovi rleal propinsi Asia,
velik ne Yahudi te wol Yahudi ira,
na rarenar Ubu Ni vaivatul ra.
Skewa yanan ra wol rfaret-nala nait sian ra ma rti talik tamata isa
11 Ubu nala ngrebat verin Paulus ma notu mujizat ovi tamata ra wol rarea obin.
12 Ba tamata ra rala lesu te kadaravit ovi Paulus npake roak,
ma rti tamata ovi nawar ira ma rkena tamata avyai,
na lolin lahir ira.
Ira rkena tamata ovi nait sian ra rleal ira ovu lesu te kadaravit avyai,
na nait sian ra rafla talik tamata avyai.
13 Tamata Yahudi ifira ba'i rbana tia ma,
ma raling vatuk nait sian ra tali tamata ra.
Ira rarenar Paulus nfamalik Yesus,
ba rala vali Duila'a Yesus naran ma raling vatuk nait sian ra.
Ira rfalak ne,
“Hei nait sian averi,
ami amala Yesus i Paulus nfamalik Ia yai naran a,
ma amaling vatuk mia tali tamata ini!”
14 Yahudi rira mela falurut isa naran Skewa.
Ia yanan brana ifitu rala vali Yesus naran ma raling vatuk nait sian ra.
15 Amar isa mane raling vatuk nait sian tali tamata,
na'uk nait sian yai nfalak verin ira ne,
“Uka'a roak Yesus irua Paulus,
na'uk mia ini tamata aba?”
16 Ba tamata i nait sian nleal ia yai nwatil ma ntaha tamata avyai,
ma nfar-visal ira ovu nving vatuk rira kadaravit ra.
Ramngala ovu rabluhu lahir,
ba rafla talik ni rahan a.
17 Tamata Yahudi ovu tamata ovi wol Yahudi ra munuk na'a Efesus rarenar afa yai ma rbobar urun,
ba rfadawang Duila'a Yesus.
18 Tali tamata ovi rorang roak Yesus na'a inyai,
na rivun ira rma ma rtorung ma rfamalik verin tamata rivun na'a afa sian ovi rotu ra.
19 Tamata rivun ovi rtaha afa te rotu rira afnitu ra rasdovu munuk rira buku* ovi rtaha ra,
ma rasnuri ma tamata rivun rsi'ik.
Ira rarekan buku ovi rasnuri fyawarira ra,
ba ni fyawan kubang perak rivun vutlima.*
20 Wean inyai,
na Ubu nfaturu Ni ngrebat a ma Ni vaivatul ra ti rsoru wan inba watan ovu tamata ovi rorang Yesus rtafal ma rivun.
Vangoa-vanga na'a kota Efesus
21 Paulus notu munuk roak afa avyai,
beti ralan nfalak ma nahu propinsi Makedonia ovu propinsi Akhaya ma nti Yerusalem.
Ia nfalak ne,
“Uti roak Yerusalem,
beti uti vali kota Roma.”
22 Ba nsinir Timotius irua Erastus ma ula ira rti Makedonia.
Tamata irua yai ba'i rlobang Paulus.
Ia nana'a propinsi Asia amar ifira ewal.
23 Ka'a bi amar yai,
na vangoa-vanga ma dawan na'a Efesus,
tevek Paulus nfamalik Duila'a Yesus Ni Linga'an a verin tamata ra.
24 Tamata isa na'a inyai naran Demetrius nkarya perak.
Ia nfakadi tukan rivun ma rlobang ia ma rotu rahan ko'u tali perak ma al rdava kubang,
ba uturira ma dawan.
Rahan ko'u avyai felarira wean rahan dawan i raraning rira ubu vata Artemis na'a.
25 Ia nasdovu ni tukan ra ovu tukan liak ovi rkarya perak vali ma nfalak verin ira ne,
“Kida averi!
Mia mkya'a roak ne dida kubang dawan na'a karya ini.
26 Mia msyi'ik ovu mryenar afa ovi Paulus nfalak ra.
Ia nfalak ne,
ubu ovi tamata ra rotu wol urun,
ma nweang nala tamata rivun ma rorang ia na'a Efesus ini ovu na'a propinsi Asia!
27 Beta ne tamata ra veka rfalak sian dida karya.
Nlia tali inyai,
na dida ubu vata Artemis ni rahan falurut veka wol fyawan,
ovu veka rta sorat ni dawan.
Velik ne tamata ra na'a Asia ovu lanit ivavan munuk raraning Artemis,
na'uk veka rablufang ia.”
28 Ti ma rarenar afa ovi nfalak ra,
na rangrova urun,
ba rafwak ne,
“Ita,
tamata Efesus,
dida ubu vata Artemis sa'i dawan ia!”
Tamata Efesus raraning rira ubu vata i rfanara ia ne, ‘Artemis’ (Kisah 19:28)
29 Ba vangoa-vanga dawan na'a kota ralan.
Nata tamata rivun rtaha tamata irua tali Makedonia.
Isa naran Gayus,
na isa vali naran Aristarkhus.
Tamata irua ini ba'i rfatuang Paulus na'a ni banbanan a.
Ba rlia soli-sasan ira rti wan dawan i tamata rivun rasdovu ira na'a.*
30 Paulus mane ti ndiri tamata rivun avyai fruarira ra,
na'uk tamata ovi rorang Yesus rfalak teri ma deka nti.
31 Ni kida ifira ovi rdoku propinsi yai ni fareta rsinir tamata ma ti rfalak ma lolin verin ia,
ma deka nti wan dawan yai.
32 Amar yai vali na'a wan dawan yai ralan a,
na tamata ra rasdovu ira ma rafwak a'ar tia ma watan.
Etal dawan tali ira wol rka'a ne,
afakinimi rasdovu ira na'a inyai.
33 Tamata Yahudi ra rala'ing tamata isa naran Aleksander ma ti ndiri tamata rivun waharira ralan ra,
beti rfalak ma nangrihi.
Ba nala liman a ma al notu faneak ma deka vair,
boma nlotar tenan.
34 Na'uk ti ma tamata rivun ovi wol Yahudi ra rka'a roak ne,
Aleksander tamata Yahudi ia,
na irmunuk rafwak fasa lahir,
ma ti naran jam irua ne,
“Ita tamata Efesus dida ubu vata Artemis sa'i dawan ia!”
35 Nata kota yai ni sekretaris notu ma tamata rivun avyai deka vairira ma nfalak ne,
“Hei,
tamata Efesus averi!
Tamata ra munuk rka'a roak ne,
Efesus ini kota i nwanar dida ubu vata Artemis i ni dawan nlia munuk afakataka,
ni rahan falurut a.
Ita twanar vali ni walut vatu i ntali lanit nsuta.
36 Wol tamata isa nangal nala afa ovi ufalak ini,
ba deka vaibira ma minovak ma lolin veki.
37 Tamata ovi myovun roak ira mya ini,
wol rbori afa ovi rna'a dida rahan falurut ralan,
ovu wol rfalak sian dida ubu vata.
38 Wean i Demetrius ovu tukan ovi rovu ia mane rmangadu tamata isa,
na eka rti wan i fareta ni tamata ovi ba'i rfaleka inukun verin tamata ra,
ovu verin gubernur,
ma rmangadu ira.
39 Na'uk wean i ralabira ra rfalak ma fyamalik bira susa liak ra,
na eka fyalak na'a fareta ovu tamata rivun waharira ralan ra.
40 Tevek inlangin a sarseri roak ma Roma rira tamata fareta ra rfasala lahir ita ne,
totu mi vangoa-vanga dawan,
ba wol dida vaivatul lolin isa ma al tlotar ita na'a vangoa-vanga ini!”
41 Ia nfalak munuk wean inyai,
beti nsinir ira ma rsilyaha tali wan yai.