Rarali Yesus na'a Betlehem
1 Na'ut i beti rarali Yohanes,
na Kaisar Agustus* nfareta ni tamata ra ma rtulis munuk tamata ovi rarenar tali fareta Roma,
nararira ra.
2 Inyai beti fasa rtulis nararira ra na'a daftar,
boma rka'a lahir ne,
tamata ifira munuk na'ut inyai.
Ira rotu daftar yai na'ut i Kirenius notu gubernur na'a propinsi Siria.
3 Ba tamata ra munuk rti rira ahu ra ma rtulis nararira ra.
4-5 Yusuf notu vali wean inyai.
Ia ntali ahu Nazaret i nana'a propinsi Galilea ma nti Raja Daud ni kota a,
naran Betlehem,
na'a propinsi Yudea,
tevek ubun a nusin Raja Daud.
Yusuf nti ma rdaftar naran a ovu Maria i ntavun teri roak ia.
Na'ut inyai,
na Maria nbarlewan roak.*
6 Na'ut i rna'a Betlehem,
na Maria ni amar kena roak ma nrali Ia.
7 Yanan iya'an ini,
brana Ia.
Maria nkuma yanan a ovu sikar,
beti nfanuba Ia na'a wan i afwatan ra ba'i rafna'an na'a,
tevek rahan siwelat ma rafnerung teri na'a nngora roak.
8 Ovan yai,
na domba duarira ra rna'a vali ngrova dardirin ovi rfaseri Betlehem a,
ma rwanar rira domba ra.
9 Brian munuk,
na Duila'a Ni sansinir isa ntali lanit ratan nma ma nfaturu tenan a verin ira.
Duila'a vanan i nfitik nyadat nsoru ira,
ba rbobar urun i lahir.
10 Duila'a Ni sansinir yai nfalak verin ira ne,
“Deka byobar,
tevek ufamalik ivar lolin verin mia,
ovu verin tamata ra munuk ma veka inabira lolin urun i lahir.
11 Ovan ini vali na'a Raja Daud ni kota,
na rarali roak Duila'a Kristus.
* Ia Raja i nsikat tamata ra tali rira salasilan ra,
ma rira vava'at kakiwal.
12 Ni faneak a wean ini:
mia veka mtyuan kasiko'u yanat isa,
rkuma Ia ovu sikar ma rfanuba Ia na'a wan i afwatan ra ba'i rafna'an na'a.”
13 Brian munuk,
na Duila'a Ni sansinir yai ovu Ni sansinir liak ra vali,
rivun ila'a ira rvotuk.
Rir tinemun rfadawang Ubu ma rfalak ne,
14 “Fara traning Ubu!
Ia sa'i dawan Ia ovu nana'a wan i karatat lia munuk a.
Na'a lanit ivavan ini,
fara malinan verin tamata ovi Ubu naflahar roak ira.”
Domba duarira ra rsi'ik Ubu Ni sansinir ra tali lanit ratan, rivun ila'a ira rvotuk (Lukas 2:13)
15 Ti ma Duila'a Ni sansinir avyai rti talik ira ma rarata ewal lanit ratan,
na domba duarira ra rsifalak afa verin ira ne,
“Mya ma tati Betlehem ma tsi'ik afa i Duila'a nfalak roak verin ita.”
16 Ba rfarlan lahir ma ti rtuan Maria irua Yusuf,
ovu vali kasiko'u yanat i ntuba wan i afwatan ra ba'i rafna'an na'a.
17 Ti ma rsi'ik kasiko'u yanat yai,
na rfamalik lahir afa ovi Duila'a Ni sansinir yai nfalak na'a kasiko'u yanat yai.
18 Tamata ovi rarenar afa ovi domba duarira rfamalik yai,
rtalkaka munuk lahir.*
19 Na'uk Maria nfikir watan afa avyai ma nanovak na'a ralan a.
20 Nata domba duarira avyai rewal ira ma raraning Ubu ovu rfadawang Ia,
tevek afa ovi rarenar ra ovu afa ovi rsi'ik ra,
kena lahir ovu afa ovi Duila'a Ni sansinir yai nfalak a.
Domba duarira ra ti rtuan Maria irua Yusuf, ovu vali kasiko'u yanat a (Lukas 2:16)
Yusuf irua Maria rovun Yesus ti verin Duila'a na'a Yahudi rira Rahan Dawan Falurut
21 Ti ma Ni amar iwalu roak,
na rsunat kasiko'u yai,
ovu rfanara Ia ne,
Yesus.
Ubu Ni sansinir tali lanit ratan nfalak lan roak naran ini,
na'ut i renan a wol nlewan Ia obin.
22 Amar naran roak ma Yusuf ovu Maria rot-orang Musa ni inukun ra ma rfamerat tenarira ra.
Na'ut inyai,
na rovun vali Yesus ma rti Yerusalem ma rfaturu ne,
rfadoku munuk Yesus Ni vava'at a verin Duila'a.*
23 Rfadoku roak na'a Duila'a Ni Inukun ra ne,
“Brana iya'an ra munuk musti rfamerat ira ma al rfaturu ne,
ira veka rkarya watan verin Duila'a.”*
24 Amar yai,
na rot-orang vali Duila'a Ni inukun ra,
ma rala kakahu irua te modarlaka yanat irua ma reluk rira korban verin Ubu.
25 Na'a Yerusalem,
na tamata isa naran Simeon.
Ia ni vava'at nmalola ovu not-orang munuk afa ovi rna'a Duila'a Ni inukun ra.
Ia nanaban amar i Ubu veka nma ma nfaloling tamata Israel ralarira ra.
Ubu Ni Roh a nfatuang vali ia.
26 Ubu Ni Roh a nfalyawang roak verin ia ne,
ia wol bisma nmata,
ti naran i nsi'ik Raja i ntevut dida salasilan ra.
27 Ubu Ni Roh nfalak verin Simeon ma nti Rahan Dawan Falurut ni lean a.
Na'ut inyai,
na Yusuf ovu Maria rovun Yesus ma rti ralan ma rot-orang afa ovi rna'a Musa ni inukun ra.*
28 Simeon nala kasiko'u yanat yai ma nsaka Ia,
beti nfadawang Ubu ma nfalak ne,
29 “Duila'a,
fiang ini fwakena roak Mu tnorung a verin ya'a.
Ya'a eluk Mu sansinir,
ba velik ne umata,
na'uk wol akataka,
tevek umata ovu malinan.
30 Usi'ik roak Ia i msinir ma nma,
ma nsikat ami tali mami salasilan ra,
ma mami vava'at kakiwal.
31 Oa fwadoku lan roak ma nma,
boma tamata ra munuk rsi'ik Ia.
32 Ia wean lyawan i nyeba linga'an a verin tamata ovi wol Yahudi ra ma rorang Oa,
ovu vali tali afa ovi veka notu ra,
na tamata ra munuk ralang Mu tamata Israel ra.”
33 Kasiko'u yai renan ovu yaman a rtalkaka lahir na'ut i rarenar afa ovi Simeon nfalak na'a yanarira a.
34 Nata Simeon naflurut verin Ubu ma naflahar ira,
ovu nfalak verin Maria ne,
“Ubu nfadoku roak ma kasiko'u ini veka nfaleka ma rivun tamata Israel ovi rafena ma rorang Ia,
ovu vali nsikat tamata rivun tali rira salasilan ra,
ma rira vava'at kakiwal.
Ia neluk faneak tali Ubu ma nfangnanang tamata ra na'a afa ovi Ubu nfalak ra,
na'uk tamata rivun veka rangal Ia.
35 Wean inyai,
na afa ovi tamata ra rfikir a veka rvotuk.
Nlia tali inyai,
na oa veka fwarnuang lahir lalau dawan i wean nahin blawat nsungu ralam a.”
36 Vata isa naran Hana nana'a vali inyai.
Ia nabi ia,
ovu yaman a naran Fanuel.
Fanuel ini ntali Israel rira arun dawan i naran Asyer.
Ia tuvu ila'a roak ia.
Na'ut i nsifa ana,
nva'at ovu awan a varat ifitu watan,
na awan nmata.
37 Ba tali amar yai,
na ia nvaru lahir,
ovu ni varat vutwalu rahin ifa'at roak.
Ovan a amar,
na ia nana'a lalawatan Rahan Dawan Falurut a ma nfadawang Ubu,
ntolat,
ovu vali naflurut.
38 Na'ut inyai vali,
na Hana nma ma nfadawang Ubu,
ovu nfamalik na'a kasiko'u yai verin tamata ra munuk.
Tamata avyai rnaban amar i Ubu veka nma ma nsikat tamata Yerusalem tali tamata ovi rira sian ira.
39 Ti ma Yusuf ovu Maria rotu munuk roak afa ovi rna'a Duila'a Ni inukun ra,
beti rewal ira rti rira ahu Nazaret i na'a propinsi Galilea.
40 Kasiko'u yai nmela ma dawan roak ia,
ma tenan a nangrebat.
Ia Ni kaka'a dawan tali Ubu,
ovu Ubu nala Ni rala lolin verin Ia.
Yesus nana'a Yahudi rira Rahan Dawan Falurut na'ut i Ni varat vutu rahin irua
41 Lokat varat na'ut amar i Yahudi ra rangnanang amar i uburir-nusirira ra rdir-talik Mesir,
na Yesus renan ovu yaman a ba'i rti Yerusalem ma rovu snoba dawan yai.*
42 Na'ut i Yesus Ni varat vutu rahin irua roak,
na ira rti Yerusalem wean i ba'i rti lokat varat a na'a amar dawan yai.
43 Amar dawan yai nlia roak beti rewal ira,
na'uk Yesus nana'a watan Yerusalem.
Renan ovu yaman a wol rka'a ne,
nana'a inyai obin.*
44 Ira rnarin ne,
Ia novu vali tamata rivun ovi irmunuk rbana yai.
Ba rbana amar lolan roak,
beti rdava Ia na'a rira tiniman ra ovu rira kidabela ra.
45 Na'uk wol rtuan Ia,
ba rewal ewal ira rti Yerusalem ma rdava Ia.
46 Amar itelu nelak roak,
beti rtuan Ia na'a Rahan Dawan Falurut ralan a.
Ia ndoku ovu Yahudi rira dawan ovi rair Musa ni inukun ra ma nrenar afa ovi rfalak ra,
ovu norat afa tali ira.
47 Tamata ovi rna'a inyai munuk rtalkaka lahir na'a afa ovi nfalak ra ma al nvalat ira,
tevek Ni kaka'a dawan tali Ubu.
48 Ti ma renan ovu yaman a rsi'ik Ia,
na rtalkaka lahir,
ba renan nfalak verin Ia ne,
“Baba,
notu afakinimi motu wean inyai verin ami?
Amrua yamam a amdava Oa,
nata ralamami raruan roak!”
49 Yesus nfalak verin renan ovu yaman a ne,
“Notu afakinimi mdyava Ya'a?
Mia wol mkya'a ne,
Ya'a musti una'a Yamang a Ni rahan a?”
50 Na'uk Yesus renan ovu yaman a wol rfan-aran afa ovi nfalak verin ira yai.
51 Nata Yesus newal Ia ovu renan a yaman a ma rti Nazaret.
Ia not-orang lalawatan afa ovi renan-yaman a rfalak ra.
Renan a nanovak watan afa ovi rvotuk yai na'a ralan a.
52 Yesus nmela ma dawan roak Ia,
ovu Ni kaka'a dawan tali Ubu ntafal ma nmela.
Ubu nlobang urun Ia,
ovu vali tamata ra inar dalang Ia.