A ye jigiya min di aw ma tuma min na a ye aw wele tuma min na, aw ka o dɔn (Efesekaw 1, 18).

Ka jigiya sɔrɔ, o ye ka da a la kosɛbɛ ko nege dɔ bɛna dafa sɔɔni. Krecɛn jigiya ye Ala ka layiduw tiimɛni makɔnɔni ye. Jigiya bɛ Ala ka layidu bɛɛ de kan, nka kɛrɛnkɛrɛnnenya la, minnu ɲɛsinnen bɛ an ka ɲɛnamaya ma saya kɔfɛ, Ala ni Yesu ɲɛkɔrɔ, Yesu seginni, dugukolo kura ani sankolo kura.

Ka jigiya sɔrɔ, o kɔrɔ ye ko a ma "kɛ" fɔlɔ, nka ka da a la ni dannaya ye ko an ka jigiya bɛna dafa. O jigiya sugu bɛ se ka nɔba bila an ka ɲɛnamaya la. Sanni an ka jigin siran ni jɔrɔnanko la, an bɛ se ka ɲɛnamaya kɛ nisɔndiya ni hɛrɛ la. Nka an man kan ka ɲinɛ ko an ka jigiya jusigilan ka kan ka sabati ani ka da a kan. Ni an jigi sinsinnen bɛ hadamaden wɛrɛw kan walima fanga wɛrɛw kan minnu tɛ Ala ɲɛnama ye, siga t’a la ko an bɛna jigitigɛ. Jigiya min sinsinnen bɛ Ala kan, a Denkɛ Yesu kan ani Ni Senu kan, o dɔrɔn de bɛ layidu minnu makɔnɔ, olu tiimɛni garanti.

- Delili : 1 .An ka barika da Ala ye a ka layiduw kosɔn ani jigiya min b’an kan a la. Aw ka siran ni haminankow bila a bolo.

- Bibulu kalan : 1 .Nin tɛmɛsira ninnu kalan ani ka dɔ sugandi min bɛna to i hakili la: Yuhana 10, 28; Efesekaw 3, 20 fo 21; Jirali 21, 4nan na.

- Mɔgɔ yɛrɛ ka miirili : 1 .Yala i bɛ hami tuma bɛɛ wa? Yala i bɛ siran ko jugu dɔ bɛ se ka kɛ i ka ɲɛnamaya kɔnɔ walima i diyanyemɔgɔw ka ɲɛnamaya kɔnɔ wa? Ala b a ka layidu tiimɛ cogo min na, o misali caman bɛ Bibulu kɔnɔ: Nuhun, Ibrahima ni Sara, Yakuba, Yusufu, Ruti, Anɛ, Nehemi... I ka nin mɔgɔ dɔ kalan, k’i janto Ala taara ni nin tigi ye cogo min na, kɛrɛnkɛrɛnnenya la waati gɛlɛnw na.

- Ka ɲɛsin mɔgɔ wɛrɛw ma :Karti cɛɲi dɔ dilan ni Bibulu tɛmɛsira dɔ ye min bɛ dusu don mɔgɔ kɔnɔ, k’o di i teri dɔ ma min mago bɛ a la. I bɛ se fana ka tɛmɛsira ci SMS, WhatsApp walima fɛɛrɛ wɛrɛw fɛ.