Sobaanuro
Bagingi Bâli riiri bandu ba mwiꞌkondo lya Laawi, mu mbaga ya Harooni.
(a) Mu Kihango kya Keera, abagingi bâli bandu ábakataluulwa imwa Rurema (Muharuuro 18.1-7). Bâli noꞌmukolwa gwoꞌkuyimanga ha kati kaꞌbandu kandi iri abemeezi na Rurema, mu kukizi batangira amatuulo noꞌkugiriisa ubwikumbe.
(b) Amaruba imwaꞌBaheburaniya gali mu yerekana kwo Yesu ye mugingi mukulu weꞌKihango Kihyahya. (Baheburaniya 5.1-5; 7.27; 8.3-6). Mu Kihango Kihyahya, ngiisi mukirisito akwiriiri ukukolera Rurema nga mugingi (1 Peturu 2.5, 9; Bwigule 1.6; 5.10).
Balaawi Bâli riiri bandu ba mwiꞌkondo lya Laawi mugala Yakobo, gunali muguma mu milala yaꞌBahisiraheeri. Yabo Balaawi bo bâli kizi betula Akajumba keꞌKihango, bo bakanataluulwa na Rurema gira bakizi tabaala abagingi baage ku mukolwa gwa mu nyumba yage, bakizi tabaala na ku gindi mikolwa yage (Bukengeeze 10.8).
Baleevi
(a) Mu Kihango kya Keera, abaleevi bâli bandu ábâli kizi deta amagambo go babwirwa na Rurema. Ubuleevi bwa baguma baabo bukayandikwa mu Mandiko Meeru. Na kwakundi, hâli riiri abandi baleevi beꞌbibeesha ábakadeta amagambo geꞌmwabo boonyene buzira kubwirwa na Rurema.
(b) Mu Kihango Kihyahya, Yohana woꞌkubatiiza, na Yesu, bali mu detwa kwo bâli baleevi. Na kwakundi, yiryo iziina «muleevi» liri mu koleesibwa mu kudeta hiꞌgulu lyaꞌBakirisito ábali mu yigulirwa ubuleevi ku bushobozi bwoꞌMutima Mweru (Mikolezi 13.12; 1 Bakorindo 14.1-40).
Basadukaayo Bâli riiri bandu ba mwiꞌbanga liniini mu Bayahudi. Bâli yemiiri naaho ibitaabo bitaanu byo Musa akayandika. Si bâli kizi lahira kwo ndaabwo buzuule, kwo ndaanabo baganda, kwo kiri neꞌbisigo ndaabyo (Mikolezi 23.8).
Basamariya Bâli riiri batuulaga ba mu poroveesi yeꞌSamariya. Iyo poroveesi yâli riiri ha kati keꞌkihugo kyeꞌBuyahudi neꞌGalilaaya. Bashokuluza baabo ba mu Bahisiraheeri bâli kizi yanga ibinyamahanga, halinde abaabo Bayahudi banakizi baneena kwo batakiri Bayahudi nirizina (2 Baami 17.24-41).
Berizebuuli Liri iziina lyo Shetaani akahaabwa, bwo ali mutwali weꞌbisigo (Mataayo 10.25; 12.24, 27; Mariko 3.22; Luka 11.15, 18-19).
Bigiriza beꞌmaaja Bâli riiri bandu ábâli hiiti umukolwa gwoꞌkukizi yiga amagambo ágakayandikwa mu bitaabo bitaanu bya Musa. Bâli hiiti noꞌmukolwa gwoꞌkugayigiriza mu bandu. Baguma baabo bâli riiri ba mu Naama Ngulu yaꞌBayahudi (Mataayo 2.4).
Bukize Kuli kundu kwoꞌmundu ali mu fuusibwa mu bukeni, kandi iri mu malwazi, kandi iri mu gandi makayu ga kwingi-kwingi (Mariko 1.32-34). Mu Bibiriya, umugeeza gwalyo guyajabusiri. Ubukize bwa Rurema, buli mu tuhanguula kwo tutuulanwe, bunatushwekuule ukulyoka mu bushobozi bwaꞌmabi. Mu Kihango Kihyahya, Yesu ali mu menyeesa yubwo bukize kwo buli mulongekana ku njira yoꞌkufwa kwage ku kibambo. Ubukize buli mu tuhanguula ukusigala tuyimaaziri, ku kyanya Rurema ali mu twa imaaja (Yohana 3.36).
Bulangashane Mu Bibiriya, igambo «bulangashane» liri mu yerekana akamaro noꞌbushobozi bwoꞌmundu mulebe. Ubulangashane bwa Rurema buli mu yerekana ngiisi kwo ali (Zaburi 19.2; 111.3). Imbere lya byoshi, buli mu yerekana ukuba ho kwage, noꞌbuhamu bwage, noꞌbutwali bwage. Yukwo kuba ho kwage, kuli mu yerekana kwo ashobwiri ukuhaana ubulamu. Ubulangashane bwa Rurema bukayiyerekana mu kundu kwa Yesu yenyene (Hisaaya 40.5; Yohana 1.14). Abemeezi nabo, bashobwiri ukulonga ku yubu bulangashane ku kyanya kyoshi bahindulwa na Rurema. Ukugalulira Rurema ubulangashane, kuli kuyemeera kwo ali Mukulu, anali Munabushobozi bwoshi.
Bwami bwa mwiꞌgulu – Bwami bwa Rurema Yaga magambo «Bwami bwa Rurema» kuli kudeta kwo Rurema ali mwami. Ganali mu deta ikihugo kyo Rurema agaaba mwami wakyo. Kandi iri ikyanya kyo Rurema agaaba Mwami. Mu Kihango Kihyahya, ubwami bwa Rurema bukatangira kuguma na Yesu. Bukoli ba ho, halikago ngiisi kwo bwâye be, kukiri mu lindirirwa (Mariko 1.15; Luka 4.43). Mu Myazi Miija nga kwo ikayandikwa na Mataayo, akakoleesa igambo Bwami bwa mwiꞌgulu (Mataayo 3.5) ahandu hoꞌBwami bwa Rurema.
Bweru – Butaluule Kundu kwa Rurema. Mu Kihango kya Keera, liri mu yerekana ukuhandulwa kwoꞌmundu kandi iri kindu, binataluulwe ukuba bindu bya Rurema. Kyo kitumiri twangadeta: «mulala mutaluule», «kaaya kataluule», «muhumaanano mutaluule». Kuli mu yerekana uburambe bwo ukuyihandula neꞌbyaha.
F
Faraho Liri iziina lyo bâli kizi buuza mwaꞌbaami beꞌMiisiri.
H
Hadamu Ye mushosi wa mbere, úkabumbwa na Rurema ku njusho yage (Ndondeko 1.26). Iziina «Hadamu», mugeeza gwalyo: «mundu».
Handu Heeru, Handu Heeru bweneene Inyumba íyâli riiri mu lubuga lweꞌnyumba ya Rurema yâli mbandule mwo kubiri: Ahandu Heeru naꞌHandu Heeru bweneene. Yaho hombi, hâli handwirwi noꞌmulondo. Yugwo mulondo gukalalaanuka ukulyokera hiꞌgulu halinde hiꞌdako ku lusiku Yesu Kirisito akafwa. Halya Handu Heeru bweneene, umugingi mukulu naaho úwâli kizi hayingira, liguma ku mwaka.
Harija Kiri kyuma kyeru íkiri mu keyengana, kinali kyeꞌkishingo kihamu. Abandu bali mu kitula mweꞌfwaranga, neꞌbirugu byeꞌkishingo (Ndondeko 13.2; Kulyoka 3.22; Mataayo 27.3).
Harooni Ali riiri mukulu wa Musa (Kulyoka 6.20). Na mu bagingi, ye kabiikwa na Rurema ubwa mbere. Abandi bagingi booshi ábakaba mu Bahisiraheeri, bakalyoka mwiꞌkondo lyage (Mikolezi 7.40; Baheburaniya 5.4; 7.11; 9.4).
Hiburamu – Hiburahimu Iziina Hiburamu likayiji hinduka ukuba Hiburahimu, kuli kudeta: «Yishe weꞌmilala» (Ndondeko 17.4). Hiburahimu, ikyanya Rurema akamúhamagala, anasimbaha, anagendi tuula i Kaanani nga kinyamahanga (Ndondeko 12.4-5; Baheburaniya 11.8-10). Ye shokuluza waꞌBahisiraheeri booshi.
Hisake Mugala Hiburahimu ku mukaage Saara. Akabutwa ku muhango gwa Rurema ku kyanya yishe âli kola hoofi neꞌmyaka igana (Ndondeko 21.1-3).
I
Isaama Guli muti gwoꞌkuhemeesa irobe lyoꞌkugira mweꞌmikate. Kiri kindu íkiri mu gagiisa. Kyo kitumiri iri mu shushanizibwa naꞌmigirizo mabi gaꞌBafarisaayo. (Mataayo 16.11; 13.33; Mariko 8.15; 1 Bakorindo 5.6-8; Bagalatiya 5.9).
Ishengero Yiri igambo, liri mu detwa ku kiso kyaꞌbemeezi baꞌhandu halebe. Linali mu koleesibwa mu kudeta hiꞌgulu lyaꞌbemeezi booshi beꞌkihango kihyahya kya Yesu, ábali ahandu hooshi (Mikolezi 2.47; 9.31).
Ituulo lyoꞌkusiriiza
(a) Mu Kihango kya Keera, amatuulo goꞌkusiriiza, gâli galya abandu bâli kizi tangira Rurema hiꞌgulu lyoꞌkuyinwaniisa, kandi iri kukogwa ibyaha, kandi iri kudeta kongwa.
(b) Ku zeene, mu Kihango Kihyahya, amatuulo goꞌkusiriiza gatakiri naꞌkamaro.
K
Kahisaari Liri iziina lya mwami mukulu waꞌBarumi. Uyo mwami ye wâli kizi ba mutwali weꞌbihugo, kandi iri mahanga mingi (Mataayo 22.17-21; Mariko 12.14-17).
Kajumba keꞌkihango Yako kajumba, kakalinganizibwa mu mbahwa zaꞌkasiya, kanâli kabugiirize kweꞌnooro. Mwo mwanâli singwirwi amabuye gabiri mabaaje, ganayandisirwi kweꞌmaaja nga kwo Rurema akaziheereza Musa ku mugazi Sinaayi (Kulyoka 25.10-22). Kâli kizi yerekana ukuba ho kwa Rurema mu bandu baage (Muharuuro 10.33-36).
Kashasha ka Nahano Yesu Kirisito ye katangira yibi byokulya byeꞌngoome ku kirya kyanya âli kumaniri naꞌbigirizibwa baage ku lusiku lukulu lweꞌPasaka yage yeꞌmbeka. Yaka «kashasha» biri byokulya byoꞌbukengeeze: umukate neꞌdivaayi biri mu yerekana ulufu lwa Kirisito. Umukate gali magala ga Yesu neꞌdivaayi guli muko gwage úgukayoneka hiꞌgulu lyaꞌbandu booshi. Yugwo muko, gwo guli mu kwiza ikihango kihyahya (1 Bakorindo 10.21; Mataayo 26.26-28).
Katanda Kindu kyo bâli kizi yubaka naꞌmabuye, banakizi tangira kwaꞌmatuulo goꞌkusiriiza (Ndondeko 22.9).
Kibambo Byâli biti bibiri bikomere kuguma, byaꞌBarumi bâli kizi koleesa mu kuyita umundu úwagira ibala. Uyo mundu, bâli kizi múbamba amaboko naꞌmagulu. Iri umundu ángabambirwi, iri adaakwa (Bukengeeze 21.23; Bagalatiya 3.13). Yesu naye akabambwa, lyo abetula idaaki liitu.
Kihango Iri ndangaano yoꞌkunywana kwaꞌbandu babiri, kandi iri ingingwe. Rurema akagira ikihango naꞌbandu baage, nga Nuhu (Ndondeko 9.9-17), na Hiburahimu (Ndondeko 15.18), naꞌBahisiraheeri (Kulyoka 19.5-6), naꞌBakirisito booshi (Luka 22.20, 1 Bakorindo 11.25).
Kirisito Liri iziina lyeꞌkigiriki (Mataayo 16.16, 20; 26.63; Mariko 8.29.; Luka 3.15; Yohana 1.41), na mu kiheburaniya «Masiya» (Zaburi 2.2; Danyeri 9.25). Umugeeza gwalyo «úkashiigwa amavuta mu kutoolwa». Yesu âli kizi hamagalwa Kirisito, bwo ye Rurema akatoola kwo abe Lukiza, anabe ye Nahano.
Kubiika umundu kwaꞌmaboko Kuli mu girwa mu kugashaanira umundu (Mariko 10.16; Luka 24.50), kandi iri mu kumúbiika mu mukolwa gwa Rurema (Mikolezi 6.6; 13.3; 1 Timoteyo 4.14).
Kutenguula Kuli kushisha ikikoba kyoꞌmwana woꞌbutabana mu kukishaaza. Kali kalangikizo keꞌkihango kyo Rurema akagira naꞌBahisiraheeri (Ndondeko 17.9-12). Yukwo kutenguulwa, kyo kyâli riiri kyereso kyoꞌkuyerekana kwo keera bakataluulwa imwa Rurema (Barumi 4.11). Mu Kihango Kihyahya, ukutenguulwa nirizina gutali mugeeza gwa ku magala, si kuli kuyiyeruusa mu mutima mu kuhindulwa ku njira yoꞌMutima gwa Rurema (Bukengeeze 30.6; Yeremiya 4.4, 9.25; Barumi 2.29; Bakolosaayi 2.11).
Kuyikumba Kuli kuheereza Rurema ulushaagwa ulumúkwaniini (Mataayo 4.10; Ndondeko 20.5). Izabuuri ziri mu yerekana ngiisi kwaꞌbandu bakayikumba Rurema ukukulikirana na ngiisi kwo ali, na ngiisi byo ali mu kola.
Kuyishalisa Kuli kuyilahiza ibyokulya ku kihe kirebe. Abahisiraheeri ba keera bâli kizi gira kwokwo mu kuyibiika haashi imbere lya Rurema, ku kyanya kyoꞌkumútabaaza (Danyeri 9.3; Luka 2.37).
Kuyiyeruusa - Kukogwa ibyaha
(a) Ku njira yeꞌmaaja za Musa, mwaꞌBayahudi bâli kizi bwirwa ngiisi kwo bagayiyeruusa ku kyanya baloziizi ukuba neꞌngoome na Rurema, kandi iri ikyanya bagagendi múyikumba. Ikyanya umundu alya ibyokulya byoꞌmuziro, kandi iri ahuma ku kindu kyoꞌmuziro, kandi iri agwatwa naꞌmalwazi malebe, kandi iri atasimbaha imaaja ndebe za Rurema, uyo iri akoli yulubiiri. Ali kwiriiri ukuyiyeruusa mu kuyikaraba, noꞌkutanga ituulo lyoꞌkusiriiza (Balaawi 12.6-8; 14.1-32).
(b) Mu Kihango Kihyahya, ukuyiyeruusa kuli mu detwa ku biri mu kati koꞌmundu, mu kuyiyubaara ikyanya akagira ibyaha. Yesu naaho ye mu tuyeruusa (Baheburaniya 9.11-14; 1 Yohana 1.7).
Kyanabuzi Abayahudi bâli tuula noꞌmugeeza gwoꞌkutanga ikyanabuzi, gira libe ituulo lyoꞌkukogwa ibyaha. Yesu naye, akafwa hiꞌgulu lyoꞌkuguluula abandu mu byaha byabo. Kyo kitumiri Yohana woꞌkushukula akamúyerekana, kwo ye kyanabuzi kya Rurema íkigashaaza ibyaha byaꞌbandu (Yohana 1.29, 36).
L
Lukiza Ali mundu úli mu fuusa ugundi mundu mu lufu. Yesu Kirisito ye Lukiza witu. Na ngiisi yeshi úli mu múbiika kwoꞌbwemeere, ali mu ba ayikiza neꞌkihano, anali mu ba akola noꞌbulamu bweꞌmyaka neꞌmyakuula (Yohana 3.16).
Lukogo Kiri kigabi kyo tukalonga bwalafwa imwa Rurema, kundu tutâli kikwaniini (Bahefeso 2.8). Ulukogo lwage lukayerekanwa bweneene mu kututumira Yesu. Ku njira yeꞌkibambo, kwo akayerekana ngiisi kwo atukuuziri (Bahefeso 1.7-8).
Lushembe Kiri kindu kyo bâli kizi yambika umwami kwiꞌtwe ku lusiku ayima. Kuguma na yibyo, yaho keera, ngiisi úkahima mu ndangwe, kandi iri mwiꞌzibo, âli kizi yambikwa ulushembe lwoꞌkuyerekana kwo ahima (1 Bakorindo 9.24-25). Ubugira kingi mu Bibiriya, yiryo igambo liri mu koleesibwa mu kuyerekana ngiisi kwaꞌBakirisito bagahaabwa ulushembe lwoꞌbuhimi yaho mwiꞌgulu. (2 Timoteyo 4.8; Bwigule 2.10).
Lusiku lwa Nahano – Lusiku lwa Kirisito
(a) Mu Kihango kya Keera: lidesirwi bweneene mu bitaabo byaꞌbaleevi mu kudeta hiꞌgulu lyoꞌlusiku Abahisiraheeri bagatwirwa kwoꞌlubaaja, bakabuli longa ukukizibwa (Yuheeri 1.15; Hamoosi 5.18-20; Yuheeri 3.1-5).
(b) Mu Kihango Kihyahya, liri mu deta hiꞌgulu lyoꞌlusiku lweꞌmberuuka (1 Batesaloniki 5.2). Lunali mu detwa «lusiku lwa Kirisito» (Bafiripi 2.16), kandi iri «lulya lusiku» (2 Timoteyo 4.8).
Lusiku lukulu Ngiisi mwaka, Abahisiraheeri bâli kizi shambaalira isiku ngulu. Yizo siku ngulu, zâli kizi bakengeeza ubwija bwa Rurema na ngiisi byo akabagirira mu siku za bashokuluza baabo. Na yizo siku ngulu zo zeezi:
(a) lweꞌbitunda Yulu lusiku lukulu, luli mu kizi shambalirwa ha nyuma lyeꞌmimbu, ku kyanya abandu booshi bashambiiri. Ku yikyo kyanya, Abahisiraheeri bâli kizi yubaka ibitunda byo bâli kizi beera mwo iyinga lyoshi. Bâli kizi gira kwokwo, mu kukengeera imyaka makumi gana yo bashokuluza baabo bakabeera mu bitunda mwiꞌshamba ku kyanya bakalyoka i Miisiri, batázi yingira mu kihugo kyo Rurema akabalagaania (Balaawi 23.34-36; Yohana 7.2-52).
(b) lweꞌMikate Mizira Saama Ikyanya Ipasaka yaꞌBayahudi yâli kizi yuta, luno lusiku lukulu nalwo lunatangire. Yulwo lusiku, lwâli kizi mala iyinga lyoshi. Ikyanya Abahisiraheeri bakahuluka mu kihugo kyeꞌMiisiri, batakalindira mbwiꞌrobe liheeme bakabuli gira umukate. Kyo kituma mu kugira yulu lusiku lukulu, bali mu kizi lya imikate mizira saama (Kulyoka 12.15-20).
(c) lweꞌPasaka Ku lusiku lweꞌPasaka, Abahisiraheeri bali mu kengeera ngiisi kwo Rurema akabafuusa mu buja mu kihugo kyeꞌMiisiri. Ku yikyo kyanya, Rurema akalungika umuganda wage ukuyita ifula zooshi mu Miisiri. Si Abahisiraheeri boohe, ngiisi mushosi akabaaga ikyanabuzi, anashiiga umuko gwakyo ku bihamambiro byoꞌmulyango gweꞌnyumba yage. Kwokwo, iri ulya muganda âli kizi bona yugwo muko, atanayingire mwiꞌyo nyumba. Kyo kitumiri mu kugira yulwo lusiku lukulu, ngiisi mbaga yaꞌBahisiraheeri iri mukizi baaga ikyanabuzi kyoꞌkulya. Yizo siku zeꞌPasaka, bâli kizi zishambaalira i Yerusaleemu (Kulyoka 12.7-13). (Ipasaka yaꞌBahisiraheeri itali yo nguma neꞌPasaka yaꞌBakirisito bali mu kizi shambaalira mu kukengeera ukuzuuka kwa Yesu. Haliko ukufwa kwage noꞌkuzuuka kwage kukaba mu siku zeꞌPasaka yaꞌBahisiraheeri.)
(d) lweꞌPendekosite Luli luguma lwa mu siku ngulu zaꞌBayahudi. Luli lusiku lweꞌmimbu. Abayahudi bâli kizi lushambaalira ku lusiku lwaꞌmakumi gataanu ha nyuma lyeꞌPasaka (Kulyoka 23.16). Ku zeene, yulu lusiku, Abakirisito bali mu kizi lushambaalira mu kukengeera ukuyija kwoꞌMutima Mweru ku bemeezi ba Yesu ba mbere. Yuku kukakoleka ku Pendekosite ya mbere ha nyuma lyoꞌkuzuuka kwa Yesu.
(e) lwoꞌkuyeruusa inyumba ya Rurema Yulu lusiku lwâli kizi kengeeza Abahisiraheeri kwo mu mwaka gwa 165 imbere lyoꞌkubutwa kwa Yesu, hâli riiri umundu muguma ye Yuda Makabe, úkayeruusa inyumba ya Rurema. Akagishakuulula gira abandu bakizi huunira mwo Rurema. Akagigira kwokwo, mukuba abagoma ba Bahisiraheeri ábatâli yiji Rurema, bakagiyingira mwo, banagigirira mwaꞌmahimba mabi, banagiyulubaza (Yohana 10.22).
M
Maaja
(a) Yiri igambo liri mu tee deta hiꞌgulu lyeꞌmaaja zo Rurema akaheereza Abahisiraheeri ku njira ya Musa, ku kyanya bâli riiri ku mugazi Sinaayi (Kulyoka 20). Ku buguma, yizo maaja ziri mu detwa «maaja za Musa» kandi iri «maaja za Nahano» (Mataayo 5.17-20; Barumi 7.4-16; 13.8-10; Baheburaniya 7.18-19; 10.28; Yakobo 2.8-11).
(b) Ikindi kyanya «imaaja» ziri mu yerekana ibitaabo mwo ziyandisirwi. Kuli kudeta «ibitaabo bya Musa» (2 Bakorindo 3.15).
(c) Mu Kihango Kihyahya, igambo «maaja», liri mu deta hiꞌgulu lyeꞌbitaabo byoshi byeꞌKihango kya Keera (Yohana 10.34).
Manemane Gali makama geꞌkiti kirebe, ganali mu huumura bwija, ganali geꞌkishingo kikayu (Mataayo 2.11). Abayahudi bâli kizi gakoleesa nga muti gwoꞌkuhoohya ubulyanirwe ku magala (Mariko 15.23), banâli kizi gashiiga ku birunda imbere lyo kubiziika (Yohana 19.39).
Masiya (Lola Kirisito).
Muganda Yiri igambo lyonyene kuli kudeta «ndumwa ya Rurema». Mu Kihango kya Keera liri mu koleesibwa hingi mu kudeta hiꞌgulu lya Rurema yenyene. Kwakundi, liri mu detwa ku biremwa bya mwiꞌgulu nga kwo bizungulusiri ikitumbi kyoꞌbwami kya Rurema (Bwigule 1.20)
Muzabibu Guli mulandira, gunali mu limwa bweneene mu Bahisiraheeri. Imbuto zaayo ziri mu kandwa mweꞌdivaayi. Umuzabibu guli mugani gwaꞌBahisiraheeri (Hisaaya 5.7). Mu Yohana 15.1-5 Yesu akayideta kwo ye muzabibu nirizina gwa Rurema.
Mwana woꞌmundu Liri iziina lyo Danyeri akakoleesa mu kudeta hiꞌgulu lya ngiisi ye Rurema âye lungike, kwo ayiji kiza abandu mu byaha (Danyeri 7.13). Kiri na Yesu yenyene âli kizi yideta kwo ye «Mwana woꞌMundu» (Mariko 8.31; Luka 9.58). Kuguma na yibyo, âli riiri woꞌkukuzibwa bweneene (Mataayo 25.31; Mariko 8.38).
Mwigirizibwa Kuli kudeta «úli mu yiga imwoꞌmwigiriza», kandi iri «mukulikizi». Abigirizibwa ba Yesu bâli balya bandu ábâli kizi yuvwa amigirizo gaage, iri banamúkulikira hooshi (Luka 6.18; Mariko 8.34).
N
Nakwere - Kuzimu Hali handu haꞌbafwiri bali mu manukira (Ndondeko 37.35; Mataayo 11.23). Ábali yo, batangaki kola kandi iri kuyifwija. Yaho handu, hali mu detwa i nakwere (mu kigiriki, i hadeezi). Abafwiri balindiriiri yo halinde bayiji zuulwa. (Bwigule 20.13).
Ndumwa Bâli riiri bandu ikumi na babiri bo Yesu akatoola mu bigirizibwa baage, gira abatume bakizi ukugenda bagamenyeesa Imyazi Miija (Mataayo 10.2-4). Ha nyuma, Pahulu naꞌbandi, nabo banaba ndumwa zaage (Mikolezi 1.2, 13; Bagalatiya 1.11; Bwigule 21.14).
Ngamiya Ingamiya kiri kitugwa kihamu íkishobwiri ukukizi mala isiku nyingi kítashalika, kandi iri kunyooterwa duba. Ingamiya zishobwiri ukubetula imiteekerwa yeꞌbilo igana na makumi galimunaana (180 kg) kuguma noꞌmulaazi wazo. Zidesirwi bweneene mu myazi ya Hiburahinu, na Hisake, na Yakobo. Kyâli kizira Umuhisiraheeri ukulya inyama yeꞌngamiya (Ndondeko 12.16; 30.43; Hayubu 1.3.)
Nuhu Âli riiri mundu úwâli kwaniini imbere lya Rurema ku kyanya amabi gâli luguusiri. Byanahika ikyanya kyo Rurema akayiyuvwa kwo atangaki kejeerera yago mahube. Nuhu naaho neꞌmbaga yage bo bakakira, mukuba Rurema akamúbwira kwo ayubake amashuba gira bakayingire mwo. Nuhu akaramba imyaka mingi, abagala banayiji ba bashokuluza beꞌmilala mingi (Ndondeko 6–9; 1 Peturu 3.20).
Nyumba yeꞌmihumaanano yaꞌBayahudi Iziina lyaꞌhandu Abayahudi bâli kizi kuumana ngiisi lusiku lweꞌSabaato ku kyanya kyeꞌKihango Kihyahya. Yumwo, mwaꞌbandu, neꞌbirongoozi byabo bâli kuumana mu kuyigiriza imaaja, na mu kuyikumba Rurema (Luka 4.16).
P
Paradiizo Hali handu hiija haꞌbandu ba Rurema bali mu gendi luhuukira ha nyuma lyoꞌkufwa kwabo (Luka 23.43; 2 Bakorindo 12.4; Bwigule 2.7).
Punda Kitugwa kyo bâli kizi koleesa mu kukibetuza imiteekerwa (Muharuuro 22; 1 Samweri 9-10; Zakariya 9.9). Yesu mu kuyingira mu kaaya keꞌYerusaleemu, akashonera ku mwana wa punda (Mataayo 21.1-11).
R
Rabi Lyâli riiri iziina lyoꞌlushaagwa mu Bayahudi, noꞌmugeeza gwalyo «Mwigiriza wani». (Yohana 1.38).
S
Sabaato Mu Bayahudi, Isabaato lwâli riiri lusiku lwa kalinda mwiꞌyinga, kuli kudeta lwigalira. Yulwo lusiku, lukataluulwa imwa Rurema, ndaanaye mundu úwâli hangwirwi ukulukola kwo (Kulyoka 20.8-11; Bukengeeze 5.12-15; Mataayo 12.1-14; 27.62).
Sayuni Mu Kihango kya Keera, iziina «Sayuni» liri mu koleesibwa mu kudeta akaaya keꞌYerusaleemu. Guli mugazi gwaꞌBahisiraheeri bakayubakira kweꞌNyumba ya Rurema mu kaaya keꞌYerusaleemu (2 Samweri 5.7; 1 Baami 8.1). Mu Kihango Kihyahya, hali ikyanya yiri iziina liri mu koleesibwa mu kudeta hiꞌgulu lyeꞌYerusaleemu ya mwiꞌgulu (Baheburaniya 12.22-24).
Shetaani Liri iziina lyoꞌmutima gwaꞌmabi. Ye yimangiiri ubushobozi ubuli mu hagana naꞌbaana ba bandu kiri na Rurema yenyene (Hayubu 1.6; 2.1; Zakariya 3.1; Bwigule 12.10).
Y
Yakobo Yakobo wa Kihango kya Keera âli riiri mugala Hisake bo na Rebeka, na shookulu wage ye wâli Hiburahimu. Rurema akamúyinika iziina Hisiraheeri, lyo likanayiji ba iziina lyoꞌmulala gwabo. Akabuta baana ikumi na babiri boꞌbutabana noꞌmunyere muguma. Yabo batabana bo bashokuluza beꞌmilala ikumi niꞌbiri yaꞌBahisiraheeri. Ubugira kingi mu mandiko geꞌKihango kya Keera, iziina Yakobo liri mu yerekana ikihugo kyeꞌHisiraheeri.