32
1 «Ewe igulu! Tegeereza! Ngola ngayimba.E kihugo, yuvwiriza amagambo gaani.
2 Amigirizo gaani, muleke gafukumuke ku mbuto, nga nvula yoꞌmunjogi-njogi.
Amagambo gaani, gashaabuke nga kimi ku kishuka.
3 Ngayivuga iziina lya Nahano, Rurema witu.
Imikolezi yage ikwaniini.
Neꞌnjira zaage zooshi, ziri zoꞌkuli.
Rurema witu ali mwemeera, ndaanago mahube go ali mu gira.
Ayamiri ali mu gira íbikwaniini, na íbiri byoꞌkuli.
5 «Haliko, mwe bandu ba kino kibusi, mukoli bihuusiri.
Mugweti mugashobania íbiri byoꞌkuli.
Munakoli gwasirwi neꞌshoni, bwo mutakiri baana ba Rurema.
6 Muli bandu bahwija, munakoli sirehiri,
Aaho! Ka kwokwo, kwo mugakizi kolera Nahano?
Aaho! Ka Nahano atali ye yisho?
Ka atanali ye kamùbumba, anamùsikamya?
7 «Mukengeere isiku za keera.
Mukizi salira ku bibusi íbikalenga.
Mubuuze bayisho, na bashokuluza biinyu,
bagamùganuulira íbikaba.
8 Rurema úli hiꞌgulu lya byoshi, ikyanya akagabulira abandu ibihugo,
lyo akanayami bahandula.
Akabiikira ngiisi mulala ulubibi,
ukukulikirana noꞌmuharuuro gwaꞌbaganda.
9 Haliko, Abahisiraheeri bo bandu baage.
Yabo beene Yakobo bali beꞌmwage.
10 «Nahano akagwana abandu baage mwiꞌshamba,
ahandu imirunga yâli kizi mokera.
Anakizi baliisa, noꞌkukizi bayigiriza.
Anakizi bakingira nga mboni yiꞌsu.
11 Anaba nga nyunda úli mu hinda hiꞌgulu lyeꞌngisha yayo,
agweti agakomeereza ibyana byage ukubalala.
Ali mu yajuula ibyubi, gira abitege,
anabitwale ku byubi byage.
12 Nahano yenyene âli kizi rongoora abandu baage.
Ndaaye gundi mu biri mu yikumbwa úwâli kizi mútabaala.
13 «Akabaleeza mu marango,
anabaliisa imimbu ya mu yikyo kihugo.
Anabadahira ubuuki mu nyaala,
anabamegeza imizehituuni ku lwajwe.
14 Banakizi kama amata mu ngaavu, na mu bibuzi, na mu mbene.
Banakizi longa inyama zeꞌbyanabuzi, na zeꞌbipanga, na zeꞌbihebe.
Banakizi lya ingano nyiija.
Banakizi kanda idivaayi mu mizabibu, banakizi ginywa.
15 «Kwokwo, kundu Abahisiraheeri bakajega, haliko banahuna imbere lyage.
Emwe! Bakalya, banajega, banafiika.
Ha nyuma, banajanda Rurema wabo, kundu ye kababumba.
Bakagayiriza lukiza wabo, kundu ali lwala lukomu.
16 Abahisiraheeri bakamúvyula mwoꞌluugi, mu kuyikumba ibindi-bindi íbiri mu yikumbwa.
Bakamúyagaza, mu kukizi biyikumba, binali bya kuyagazania naaho.
17 Bâli kizi tangira imizimu amatuulo goꞌkusiriiza, itanali ye Rurema.
Si iri migisi yo batashubi yiji.
Yâli riiri mihyahya, ítayijikiini.
Kiri na bashokuluza baabo, batakagimenya.
18 «E Bahisiraheeri, si keera mukagayiriza Lwala, anali ye kamùbuta.
Mukayibagira Rurema, anali ye tumiri muli bagumaana.
19 Ikyanya abaana ba Nahano, abatabana naꞌbanyere, bakagira kwokwo,
anabona, anaraakara, anabalahira.
20 Anadeta: “Yaba, bakoli bihuusiri ngana-ngana.
Batanali bemeera.
Kwokwo, ndagaki batanduula.
Aaho! Leka tulole ngiisi ho bagaherera.
21 Ikyanya bakakolera imigisi yabo, itanali ye Rurema, lyo bakanvyula mwoꞌluugi.
Bakandaakaza neꞌmigisi yabo ya busha-busha.
Ku kasiisa, ngola ngagashaanira abandi bandu, halinde nabo bayuvwe uluugi.
Emwe! Ngabayagaza, mu kugashaanira ugundi mulala, gunali muhwija.
22 Uburaakari bwani, buli mu yaka nga muliro,
bunali mu yika, halinde i nakwere.
Buli mu siriiza íbiri mu mera kwiꞌdaho.
Buli mu jigiivya haashi, halinde indaliro zeꞌmigazi.
23 Yabo Bahisiraheeri, ngabalunda kwoꞌbuhanya bukayu,
na mbalashe-lashe mweꞌmyambi yani yoshi.
24 Bagashalika bweneene, halinde banajambe ngana-ngana.
Bagaminikwa niꞌshuushira, naꞌgandi malwazi.
Ngahanguula inyamiishwa ndangi zikizi bajanganula.
Banakomwe neꞌmijoka íri neꞌmbola, inali mu yibulula kwiꞌdaho.
25 Abaana baabo, bagayitirwa mu mitalimbwa.
Booshi mu nyumba, bagahuumirwa, banahole.
Imisore, imitabana neꞌminyere, igahuumirwa,
kuguma naꞌbaana ábakiri mu yonga, kiri naꞌbashaaja.
26 «“Nâli desiri kwo ngabaminika lwoshi-lwoshi,
halinde bataki kengeerwe mu kihugo.
27 Haliko nꞌgayoboha kwaꞌbagoma baabo baganjekeereza.
Banganakengeera bayiteba, ti:
‘Nahano atali ye kabaminika,
Si twe tukabahima.’
28 «“Yabo bandu, ndaabwo bwenge bahiiti.
Batanali mu sobanukirwa.
29 Báki be bitegeereza, nga ábali mu sobanukirwa.
Bangamenyiri ngiisi kwo bagaahera.
30 Aaho! Koꞌmugoma muguma naaho angayimwiri Abahisiraheeri kihumbi?
Kaꞌbagoma babiri bangayimwiri Abahisiraheeri bihumbi ikumi?
Aahabi! Bitangashobosiri. Kundu kwokwo niehe, nie Nahano, ulwala lwabo,
nie kaleka abagoma baabo babahime.
31 «“Abagoma baabo, bayiji-yiji kwo ye bali mu yikumba,
atali nga Rurema waꞌBahisiraheeri.
32 Abagoma biitu bali ngoꞌmulandira úgwabyalwa mu ndalo zeꞌSoodoma na zeꞌGomora.
Bali nga muzabibu úguli neꞌmihuli milulu, inali mwo kolobwe.
33 Umutobo gwayo, guli nga mbola zoꞌmujoka.
Gugweti ulubola nga lweꞌkiloba.
34 «“Lolagi buno! Yaga gooshi, nie Nahano, ngasingwiri mu mbiikiro.
Nagasingula bwija, ho gatagateereka.
35 Ndoziizi ukuyihoola, na mbaheereze ngiisi íbibakwaniini.
Ulusiku lwo bagashereezibwa kwo, lukola hoofi.
Bagayami teerwa noꞌbuhanya kinaliguma.”
36 «Abahisiraheeri bagerwa naaho bo bagasigala.
Imisi yabo, inabe keera yamala.
Baguma baabo, banabe bakola baja.
Haaho, Nahano agabayuvwirwa indengeerwa,
anabaheereze íbibakwaniini.
37 Agabuuza, ti: “Buno, bo bali mu yikumba balyagagi hayi?
Si bâli kizi gendi yibisha imwabo!
38 Ehee! Bâli kizi lya ibitugwa byo mwâli kizi tanga ituulo lyoꞌkusiriiza,
banâli kizi nywa amaavu go mwâli kizi batangira.
Aaho! Baabo, bayimukage, gira bayiji mùtabaala,
banabe bo bagayiji mùkingira.
39 «“Lolaga! Si nienyene nie Rurema!
Ndaaye gundi, átali niehe naaho.
Nie mu yita, na ndi nie mu lamiisa.
Ndi mu yita umundu, na njubi múheereza ubugumaana.
Keera namùkomeeresa. Haliko buno, ngola ngamùkiza.
Ndaaye úwanganyugutula umundu mu maboko gaani.
40 Buno, ndi mu golola ukuboko mwiꞌgulu, na ngyule kwokuno:
Ku kasiisa, niehe nyamiri ho imyakuula.
41 Ndi mu tyaza ingooti yani, na ngiyugihye.
Abagoma baani, ngola ngabatwira ulubaaja.
Ngola ngabayihoola.
Ngiisi ábagweti bagangayiriza, ngabahemba íbibakwaniini.
42 Ingooti yani, igatongeera abagoma baani.
Na ndobeke imyambi yani mu muko gwabo.
Ndaayo ndwani ígatoloboka,
Ábagwatwa imbohe, igabayita.
Inatole amatwe geꞌbirongoozi byabo.”
43 «Mwe bandu mweshi, mubandire Nahano akabuuli, awi yiyi yiyi!
Mukuba, ye mu yihoolera umuko gwaꞌbakozi baage.
Ali mu yihoola abagoma, noꞌkubaheereza ngiisi íbibakwaniini.
Haliko, abandu baage, kiri neꞌkihugo kyabo, ali mu biyeruusa.»
44 Yulwo lwimbo, Musa anayija bo na Yoshwa mugala Nuuni, banakizi deta amagambo gaalwo gooshi, halinde abandu booshi banaluyuvwa.
Amategeko mazinda ga Musa
45 Yago gooshi, ikyanya Musa akayusa ukugamenyeesa Abahisiraheeri, 46 anababwira: «Amagambo gooshi ga mu yizi maaja, keera namùheereza go zeene. Kwokwo, mugasingule bwija mu mitima yinyu. Munagayigirize naꞌbaana biinyu, halinde bakizi gasimbaha gooshi. 47 Mukuba, yizi maaja, kitali kindu busha imwinyu. Si ziri mu mùbiika mwoꞌbugumaana. Na ku njira yazo, mugalonga ukulama isiku nyingi mu kihugo íkiri i kajabo koꞌlwiji Yorodaani.»
Nahano amenyeesa kwo Musa akola agaafwa
48 Lwolwo lusiku, Nahano anabwira Musa: 49 «Ugendi shona ku mugazi Habariimu, mu kihugo kyeꞌMohabu. Guli i kajabo kaꞌkaaya keꞌYeriko. Ushone kwiꞌrango lyoꞌmugazi Nebo, unalangiize ikihugo kyeꞌKaanani. Mukuba, yikyo kihugo, kyo ngaheereza Abahisiraheeri, bukizi ba ubuhyane bwabo.
50 «Ikyanya ugaaba keera wagushona kwo, ugafwira haaho, unagende imunda lukalamuka. Kiri na mwene winyu wa Harooni keera akafwira ku mugazi Hoori. Naye akagenda imunda lukalamuka. 51 Mwe na Harooni, mwembi mukambubira bweneene imbere lyaꞌBahisiraheeri. Mukuba, ikyanya mwâli riiri haꞌmiiji geꞌMeriba halya i Kadeeshi, mwiꞌshamba lyeꞌSiini, mutakabayereka kwo ndi Rurema woꞌkuli. 52 Kwokwo, kundu ngaheereza Abahisiraheeri yikyo kihugo, haliko, wehe, ugakilangiiza naaho ku hala, utanâye ki yingire mwo.»