Abahisiraheeri bahima mwami Hoogi
3
1 «Ha nyuma, twanazamuuka, twanakulikira injira yoꞌkugenda mu kihugo kyeꞌBashaani. Mwami wakyo, Hoogi, kuguma naꞌbasirikaani baage, banayiji tuyitangiira hoofi lyeꞌHedireyi, gira batulwise. 2 Haliko, Nahano anambwira: “Uyo mwami Hoogi, utamúyobohe. Keera namúbiika mu maboko gaawe, kuguma naꞌbasirikaani baage booshi, kiri neꞌkihugo kyage. Ugamúgira nga kwo ukagira mwami Sihooni waꞌBahamoori, úwâli tuuziri i Heshibooni.”3 «Kwokwo, kwo Nahano, Rurema witu akatuhimira mwami Hoogi weꞌBashaani, naꞌbasirikaani baage. Twanabaminika, tutanasiga kiri weꞌkitwe-kibona. 4 Twanayami gwata imbira utwaya twage twoshi. Ndaako kiri na kaguma ákakatuhaga. Utwaya twoshi two tukagwata imbira, twâli riiri makumi galindatu. Yutwo twaya, twâli twa mu kihugo kyeꞌHarigobu. Na Hoogi weꞌBashaani ye wâli twaziri yo.
5 «Yutwo twaya twoshi, twâli zitiirwi bweneene. Inzitiro zaatwo, zâli shuumiri. Kiri neꞌnyiivi zaatwo, zâli kizi hamikwa neꞌnyigaliro. Hâli riiri kwakundi utwaya tuniini twingi, útutâli tuzitire. 6 Ngiisi handu, tukahasivya, mu kukizi yita abashosi naꞌbakazi, kiri naꞌbaana, nga kwo tukagira mu twaya twa mwami Sihooni weꞌHeshibooni. 7 Si ibitugwa, kuguma neꞌbindu byo tukagwana mu twaya, byohe tukabishahula.
Musa abunduula ikihugo kyeꞌGiryadi
8 «Ku yikyo kyanya, twanagwata ikihugo kya balya baami babiri baꞌBahamoori, ábâli tuuziri i kajabo koꞌlwiji Yorodaani, ha kati koꞌlwiji Harinooni noꞌmugazi Herimooni. 9 (Yugwo mugazi Herimooni, Abasidooni bali mu guhamagala Siryoni. Si Abahamoori boohe, bali mu guhamagala Seniiri.) 10 Tukagwata imbira utwaya twoshi twa mu migazi. Twanagwata kiri neꞌkihugo kyoshi kyeꞌGiryadi, na kyeꞌBashaani, halinde i Saleka neꞌHedireyi. Yutu twaya twombi, twâli tweꞌmwa mwami Hoogi weꞌBashaani.»
11 (Mwami Hoogi, ye wâli ki sigiiri mu Barefahimu. Ingingo yage, ikatulwa mu byuma. Yanâli neꞌmeetere zina, ku meetere hoofi zibiri. Iyo ngingo halinde zeene, ikiri mu kaaya kahamu kaꞌBahamooni, i Raba.)
Imilala íyâli tuuziri uluhande lweꞌsheere yeꞌYorodaani
12 «Kwokwo, kwo tukagwata kirya kihugo kyoshi íkiri uluhande lweꞌmbembe lwaꞌkaaya keꞌHaroweri, ku ngombe yoꞌlwiji Harinooni. Yikyo kimaanye kya mu migazi yeꞌGiryadi, kuguma noꞌtwaya twayo, nanakiheereza beene Rubeni, na beene Gaadi. 13 Ha nyuma, nanaheereza ikihande kya beene Manaasi ikimaanye kyeꞌsheere, íkyâli sigiiri ku Giryadi, kuguma neꞌBashaani yoshi, ngiisi hoꞌyo Hoogi âli twaziri. Ikihugo kyoshi kyeꞌHarigobu, na kyeꞌBashaani, biri mu hamagalwa kihugo kyaꞌBarefahimu.
14 «Beene Yahiiri mugala Manaasi, banayabiira ikihugo kyoshi kyeꞌHarigobu, mu Bashaani, halinde ku lubibi lweꞌGeshuuri, noꞌlwaꞌBamakaati. Yaho handu, banakizi habuuza twaya twa Yahiiri. Halinde zeene, tukiri mu buuzibwa ku lyeryo iziina. 15 Beene Makiiri, ugundi mugala Manaasi, nabo nꞌgabaheereza ikihugo kyeꞌGiryadi.
16 «Beene Rubeni, na beene Gaadi, nꞌgabaheereza ikihugo kyoshi íkiri ha kati keꞌGiryadi neꞌHarinooni. Ulubibi lwabo lweꞌkisaka luli lulya lwiji Harinooni, lunagenderere halinde ku lwiji Yaboki, hanali ho babibikiinwi neꞌkihugo kyaꞌBahamooni. 17 Imuga, ulubibi lukulikiiri indekeera yoꞌlwiji Yorodaani, ha kati keꞌnyaaja yeꞌGalilaaya, neꞌNyaaja yoꞌMuunyu, halinde uluhande lweꞌsheere, mwiꞌdako lyoꞌmugazi Pisiga.
18 «Ku yikyo kyanya, nanamùkomeereza: “Nahano, Rurema winyu, keera akamùheereza kino kihugo íkiri uluhande lweꞌsheere lwoꞌlwiji Yorodaani. Buno, mwe bikalage byeꞌndwani mweshi, mujabukage imbere lya beene winyu, muli neꞌbilwaniiso biinyu. 19 Si bakiinyu, naꞌbaana, kuguma neꞌbitugwa boohe, bagasigala mu twaya two nꞌgamùheereza. Nyiiji kwo muli neꞌbitugwa katundu. 20 Kwokwo, mutee tabaala beene winyu, halinde ukuhisa ku kyanya nabo, Nahano agabaluhuusa, nga kwo keera akamùluhuusa. Bagatee gwata ikihugo kyo Nahano, Rurema witu abaheereza uluhande lweꞌmuga lwoꞌlwiji Yorodaani. Ha nyuma, munagalukage mu kino kihugo kyo nꞌgamùheereza.”
21 «Ku kyekyo kyanya, nanakomeereza Yoshwa: “Keera wayibonera ngiisi kwo Nahano Rurema wawe akayita balya baami babiri baꞌBahamoori. Kwo na kwokwo, kwo aganagira naꞌbaami beꞌkihugo kyo mugajabukira mwo, i kajabo keꞌYorodaani. 22 Abandu beꞌyo munda, mutakizi bayoboha. Si Nahano yenyene, ye gamùlwira.”
Musa akalahirirwa ukuyingira i Kaanani
23 «Ku yikyo kyanya, nanahuuna Nahano, ti: 24 “E Nahano woꞌbushobozi bwoshi, ndi mukozi wawe. Keera ukatondeera ukunyereka ubukalage bwawe, noꞌbushobozi bwawe. Na mu bindi íbiri mu yikumbwa mwiꞌgulu, kandi iri mu kihugo, ndaabyo íbyangahasha ukugira amagambo mahamu gaꞌkahebuuza nga go ugweti ugaagira. 25 Kwokwo, nakuyinginga, we kongwa, uleke njabuke ulwiji Yorodaani, naani mbone yikyo kihugo kiija. Mbone kiri neꞌmigazi miija, kuguma neꞌmigazi yeꞌLebanooni.”
26 «Haliko, mwe mukatuma Nahano akandakarira, atanandwaza. Si akambwira: “E Musa, yiri igambo, utaki shubi ndesa hiꞌgulu lyalyo. 27 Zamuukiraga kwiꞌrango lyoꞌmugazi Pisiga. Unabande amasu uluhande lweꞌmuga, na lweꞌmbembe, na lweꞌkisaka, na lweꞌsheere. Yaho hooshi, uhaloleekeze bwija. Haliko yulu lwiji Yorodaani lwo ubwini, utâye lujabuke.