Imbibi zeꞌkihugo kyoꞌmuhango
34
1 Nahano anamenyeesa Musa, 2 kwo abwire Abahisiraheeri kwokuno: «Mukolaga mugayingira mu kihugo kyeꞌKaanani. Yikyo kihugo, ngamùheereza kyo, kibe kyeꞌmwinyu. Imbibi zaakyo zo zeezino: 3 Uluhande lweꞌkisaka, lugatondeerera kwiꞌshamba lyeꞌSiini, hoofi noꞌlubibi lweꞌkihugo kyeꞌHedoomu. Noꞌluhande lweꞌsheere, lugatondeerera ikisaka kyeꞌNyaaja yoꞌMuunyu. 4 Lunanyooke, lunazamuuke i Hakarabiimu, lunalenge mwiꞌshamba lyeꞌSiini, lunagenderere ikisaka, halinde i Kadeeshi-Barineya. Ukulyokera yaho, lunanyookere i Hazaari-Hadaari halinde i Hazimooni. 5 Ukulyoka yaho i Hazimooni, lunashubi hinduuka, halinde ku lwiji lweꞌMiisiri, lunahekere ku Nyaaja Mediterane.6 «Iyo Nyaaja Mediterane, yo igaaba lubibi lwinyu lweꞌmuga.
7 «Uluhande lweꞌmbembe, lugatondeerera ku Nyaaja Mediterane, halinde ku mugazi Hoori. 8 Ukushaagira yaho, lunagenderere i Lebo-Hamaati, halinde i Zedadi. 9 Lunagenderere kandi i Zifurooni, halinde i Hazaari-Henani. Lwolwo, lwo lugaaba lubibi lwinyu lweꞌmbembe.
10 «Ulubibi lwinyu lweꞌsheere, lugatondeerera i Hazaari-Henani, halinde i Shefamu. 11 Ukulyokera yaho, lunayikire i Ribila, isheere yeꞌHayini. Ha nyuma, lunanyookere ku mudulumuko úguli isheere yeꞌnyaaja yeꞌGalilaaya. 12 Lunamanuke, mu kukulikira ulwiji Yorodaani, halinde ku Nyaaja yoꞌMuunyu. Zeezo, zo mbibi zeꞌkihugo kiinyu.»
13 Musa anabwira Abahisiraheeri na kwokuno: «Kyekino, kyo kihugo Nahano akadeta kwo mukigabaane ku milala mwenda neꞌkitolo, mu kutaara ikibare. 14 Si beene Rubeni, na beene Gaadi, neꞌkimaanye kya beene Manaasi boohe, keera bakalonga ubwabo buhyane. 15 Kwo iri milala ibiri neꞌkitolo, ikalonga agaabo matongo uluhande lweꞌsheere yoꞌlwiji Yorodaani, ha kajabo keꞌYeriko.»
Heryazaari bo na Yoshwa, bayimangira ukugaba ikihugo
16 Nahano anashubi bwira Musa kwokuno: 17 «Umugingi Heryazaari, na Yoshwa mugala Nuuni, bo bagagabulira abandu amatongo. 18 Mu ngiisi mulala, uyabiirage umwimangizi muguma-muguma, gira abatabaale. 19 Amaziina gaabo, go gaaga:
Woꞌmulala gwa Yuda, hali Kalebu mugala Yefune,
20 Na woꞌmulala gwa Simyoni, hali Semweri mugala Hamihudi.
21 Na woꞌmulala gwa Binyamiini, hali Heridaadi mugala Kisiloni.
22 Na woꞌmulala gwa Daani, hali Buuki mugala Yogiri.
23 Na woꞌmulala gwa Manaasi mugala Yusefu, hali Hanyeri mugala Hefodi.
24 Na woꞌmulala gwa Hifurahimu mugala Yusefu, hali Kemweri mugala Shifutani.
25 Na woꞌmulala gwa Zabulooni, hali Herizafaani mugala Parinaki.
26 Na woꞌmulala gwa Hisakaari, hali Perityeri mugala Hazaani.
27 Na woꞌmulala gwa Hasheeri, hali Ahihudi mugala Shelomi.
28 Na woꞌmulala gwa Nafutaali, hali Pedaheri mugala Hamihudi.»
29 Baabo, bo bashosi Nahano akatoola, gira bagaburire Abahisiraheeri ikihugo kyeꞌKaanani.