Balaamu agashaanira Abahisiraheeri
23
1 Uyo Balaamu anabwira Balaaki: «E mwami, unyubakire ututanda tulinda. Mango wayusa, unandeetere ishuuli zirinda, neꞌbipanga birinda.» 2 Mwami Balaaki anagira nga kwoꞌyo Balaamu amúbwira. Ku ngiisi katanda, banakizi biika kweꞌshuuli nguma-nguma, neꞌkipanga kiguma-kiguma.3 Haaho, Balaamu anabwira Balaaki: «Usigalage ubwatiiri hano haꞌmatuulo gaawe. Hali ikyanya Nahano angakoli nyijira. Na ngiisi byo aganyereka, byebyo, byo ngayiji kubwira.»
Balaamu anazamuuka, halinde anahika áhayiheriiri kwiꞌrango. 4 Neꞌri akaba akola yaho, Rurema anamúhulukira kwo. Balaamu anamúbwira: «Keera nayubaka ututanda tulinda, na ku ngiisi katanda nabiika kwiꞌtuulo lyeꞌshuuli nguma-nguma, neꞌkipanga kiguma-kiguma.»
5 Nahano anamúbwira ngiisi byo agaadeta, ti: «E Balaamu, ugalukire imunda Balaaki, unamúbwire ngiisi kwo nakubwira.»
6 Kwokwo, Balaamu anagaluka, anagwanana Balaaki aki yimaaziri ha butambi liꞌtuulo lyoꞌkusiriiza. Naꞌbatwali booshi beꞌMohabu bâli riiri ho. 7 Ulya Balaamu anatangaga yubu buleevi:
«Mwami Balaaki andumira, njaage i Haraamu, na nyije hano.
Ee! Bwo ye mwami weꞌMohabu, andumira ukulyoka mu migazi yeꞌsheere.
Anambwira: “Yijaga, undaakire beene Yakobo.
Ee! Uyiji daaka Abahisiraheeri.”
8 Aahago! Kuti kwo ngabadaaka, na Rurema atabadaasiri?
Kuti kwo nangabatwira ulubaaja, na Nahano atabatwiriiri lwo?
9 Kwo nyimaaziri hano mu maala, kwiꞌrango, mbabwini.
Ngweti ngabalangiriza hano ku mugazi.
Balya bandu, bahandwirwi neꞌgindi milala, banatuuziri boonyene.
10 Yaba beene Yakobo, si balyagagi kanyegete nga mushenyu.
Aaho! Nyandi úwangaki baharuura?
Nyandi úwangaharuura kiri neꞌkihande kyabo kiguma kya kana?
Bwangaba bwija, nvwe nga boohe mu kati koꞌkuli.
Ee! Kwokwo kwo kwangaba kwija.»
11 Uyo Balaamu, lyeryo mwami Balaaki anamúnaakira: «Maki gano wagiraga? Nakuleeta hano, kwo uyiji daaka abagoma baani. Si ho wangabadaasiri, keera wabagashaanira.» 12 Uyo Balaamu, ti: «E waliha, si mbangwirwi naaho ukudeta ngiisi byo Nahano ambwiziri!»
Balaamu atanga ubuleevi bwa kabiri
13 Ha nyuma, mwami Balaaki anashubi bwira Balaamu: «Uyije tugendanwe ahandi, ngiisi ho wangashobola ukubona ikimaanye kyabo naaho, si batali booshi. Leero, unabandaakire.»
14 Lyeryo, Balaaki anatwala Balaamu mu ndalo yeꞌSofiimu, kwiꞌrango lyeꞌPisiga. Yaho kwakundi, anahayubaka ututanda tulinda. Ku ngiisi katanda, anakizi tanga kwiꞌtuulo lyeꞌshuuli nguma-nguma, neꞌkipanga kiguma-kiguma.
15 Balaamu anabwira Balaaki: «E mwami, utee sigala hano haꞌmatuulo gaawe. Niehe, ngagenda haliira, gira ngendi gwanana na Nahano.»
16 Uyo Balaamu, iri akahikaga ho, banagwanana na Nahano. Anamúheereza indumwa, anabuli múbwira: «Ugalukire imunda Balaaki. Ino indumwa, umúbwire yo.»
17 Kwokwo, Balaamu anagalukira imunda Balaaki, anagwana aki yimaaziri ha yago matuulo gaage, ali kuguma naꞌbatwali beꞌMohabu. Balaaki anamúbuuza: «Aahago! Biki byo Nahano akubwira?»
18 Ulya Balaamu anatanga ubuleevi kwokuno:
«E Balaaki mugala Zipoori! Yinamuka, undege amatwiri.
19 Rurema atali nga mundu, mbu abeeshe.
Atanali nga mundu mbu ayishuhize.
Ngiisi byo agweti agaadeta, ali mu bigira.
Na ngiisi byo ali mu lagaania, ali mu bikola.
20 Lolaga! Keera Rurema ambwira kwo ngizi bagashaanira.
Na bwo yenyene keera akabagashaanira, ndangaki bihindula.
21 Mu beene Yakobo, ndaabwo buligo bwo mbabwini kwo.
Yabo Bahisiraheeri, ndaago magoorwa go bagalonga.
Nahano Rurema wabo, batuliinwi.
Keera abamenyeesa kwo ye mwami wabo.
22 Rurema keera akabalyosa i Miisiri,
anahiitagi imisi nga ya mbogo.
23 Beene Yakobo, ndaalyo idaaki íryangabahuma kwo.
Ndaanabwo bulozi úbwangaba neꞌmisi hiꞌgulu lyabo.
Buno, abandu bagakizi deta hiꞌgulu lyaꞌBahisiraheeri, ti:
“Rurema keera akabagirira ibisoomeza bya kahebuuza.”
24 Emwe! Bakoli yimaaziri nga ndare ngazi.
Banakoli sikamiri nga ndare njosi.
Bali nga ndare, bwo batagahunira,
halinde batee vwajagira ku byo bayita,
banabe keera banywa ku muko gwabyo.»
25 Uyo mwami Balaaki anayami bwira Balaamu: «Iri utangashobola ukubadaaka, ulekage ukubagashaanira.»
26 Balaamu anamúshuvya: «Ka ndakakubwira kwo ngiisi byo Nahano agambwira, byebyo byo nganagira?»
27 Mwami Balaaki anashubi múbwira: «Uyije ngutwale ahandi. Ngeeka ho Rurema angayemeera undaakire yaba bandu.»
28 Kwokwo, Balaaki anatwala Balaamu mwiꞌrango lyoꞌmugazi Pehoori. Yaho, umundu ali mu yami langiiza hala mwiꞌshamba. 29 Balaamu anashubi múbwira: «Unyubakire ututanda tulinda, unandeetere ishuuli zirinda, neꞌbipanga birinda.»
30 Balaaki anagira nga kwo amúbwira. Ku ngiisi katanda, anakizi tanga ituulo lyeꞌshuuli nguma-nguma, neꞌkipanga kiguma-kiguma.