Amiiji geꞌMeriba
20
1 Mu mwezi gwa mbere, Abahisiraheeri booshi bâli mali hika mwiꞌshamba lyeꞌSiini, banashumbika i Kadeeshi. Ikyanya bâli kola ho, Miryamu anafwa, banamúziika.2 Yaho bâli shumbisiri, ndaago miiji ágâli riiri ho. Kwokwo, abandu banazunguluka Musa na Harooni, 3 iri banalongooza Musa: «Ikyanya beene witu bakayitwa imbere liꞌheema lya Nahano, bwangábiiragi bwija tufwire kuguma. 4 Aahago! Kituma kiki mwatuleeta hano mwiꞌshamba? Ka mbu lyo tuyiji herera mwo, kuguma neꞌbitugwa biitu? 5 Kituma kiki mukatulyosa i Miisiri, mwanatuleeta mu gano malibu? Si hano ndaayo ngano, ndaanayo mitiini, ndaanayo mizabibu, kandi iri makomamanga. Kiri naꞌmagoloovi, ndaago.»
6 Musa na Harooni banalyoka áhali yabo bandu, banagendi yimanga ha mulyango gwiꞌheema lyeꞌmihumaanano, banagwa buubi imbere lya Nahano. Neꞌri bakaba balyagagi yaho, lyeryo, ubulangashane bwage bwanabatanguulira.
7 Nahano anabwira Musa: 8 «Uyabiirage ingoni yawe. Mwe na mukulu wawe wa Harooni, mukuumanie yaba bandu. Mango baba bakoli kumaniri imbere lyawe, unabwire luliira lwala kwo lushyokage mwaꞌmiiji. Haaho, amiiji gagalyoka mu lwala, halinde yaba booshi banalonge ukuganywa, kuguma neꞌbitugwa byabo.»
9 Kwokwo, Musa anayabiira irya ngoni, imbere lya Nahano. 10 Musa na Harooni, banakuumania balya booshi imbere lyoꞌlwala. Musa anababwiririra: «E bahuni, munyuvwirizagye. Ka muloziizi tumùlyokeze amiiji mu yulu lwala?»
11 Lyeryo Musa anabangula ukuboko, anashulika irya ngoni ubugira kabiri ku lwala, amiiji ganayami lushyoka mwo. Yabo booshi, bananywa kuguma neꞌbitugwa byabo.
12 Haliko, Nahano anabwira Musa na Harooni kwokuno: «Si mutambiisiri kwoꞌmulangaaliro, mutananzimbahiri imbere lyaꞌBahisiraheeri! Kwokwo, mutakiri mwe mugabahisa mu kihugo kyo ngabaheereza.»
13 Yaho handu, hali mu detwa Amiiji geꞌMeriba. Mukuba, haaho, haꞌBahisiraheeri bakahambanwa na Nahano, kundu âli mali yerekana ubulangashane bwage mu kati kaabo.
Mwami weꞌHedoomu ahangirira Abahisiraheeri
14 Ikyanya Abahisiraheeri bâli ki riiri i Kadeeshi, Musa anatumira mwami weꞌHedoomu indumwa, ti: «E mwami, twehe tuli beene winyu, Abahisiraheeri. Ku yukwo, utuyuvwirize. Amalibu gooshi go tukalonga, ugayiji-yiji. 15 Bashokuluza biitu bakagenda i Miisiri. Neꞌyo munda, tukahisa imyaka mingi tutuuziri yo. Balya Bamiisiri bâli kizi libuza bashokuluza biitu, kiri na nyiitu kwakundi. 16 Haliko, ikyanya tukatakira Nahano mu kumúlirira, anatuyuvwa, anatutumira umuganda wage, gira ayiji tulyosa i Miisiri. Na buno, tukolaga hano i Kadeeshi, mu kaaya ákabibikiinwi neꞌkihugo kyawe.
17 «Ku yukwo, twakuyinginga, we kongwa, utulekage tulenge mu kihugo kyawe. Ikyanya tugalenga mwo, ndaayo ndalo yo tugashereeza, kiri zeꞌmizabibu. Tutaganayegeera ibirigo biinyu, mbu tuvwome mwaꞌmagoloovi. Mu lugeezi lwitu, tugakulikira injira ya namuhirye naaho, buzira kubambala ilulyo kandi iri ilumosho, halinde tunahulukaane ikihugo.»
18 Ulya mwami weꞌHedoomu, analahira: «Nanga! Iri mwangalenga mu kihugo kyani, ngayami mùlwisa neꞌngooti.»
19 Abahisiraheeri banamúshuvya: «Tugayilengera ku njira ya namuhirye naaho. Neꞌri twanganywa ku miiji giinyu, twe neꞌbitugwa biitu, tugagaliha. Byo twakuhuuna naaho, utuhanguule tulenge. Ndaakyo kindi kyo tukuloziizi kwo.»
20 Ulya mwami weꞌHedoomu anashubi shuvya: «Nanga! Mutahangwirwi ukulenga hano.» Lyeryo, ibihagange bingi byaꞌBahedoomu byanayija, gira biyiji balwisa. 21 Na bwo yabo Bahedoomu batakabahanguula kwo balenge mu kihugo kyabo, kyanatuma Abahisiraheeri batagalenga mwo, banalooza igindi-gindi njira.
Harooni afwa
22 Abahisiraheeri booshi, banayimuka yaho i Kadeeshi, banagenda halinde ku mugazi Hoori. 23 Yaho i Hoori hâli ku lubibi lweꞌkihugo kyeꞌHedoomu.
Kwokwo, Nahano anabwira Musa na Harooni: 24 «Mukulu wawe wa Harooni akola agaafwa, agwane bashokuluza baage. Na íbitumiri atagayingira mu kihugo kyo nꞌgaheereza Abahisiraheeri, bwo mwembi mukangayiriza i Meriba. 25 Kwokwo, uyabiirage Harooni na mugala wage wa Heryazaari, munateramanwe ku mugazi Hoori. 26 Mango mwahika ho, unamúhogole ibyambalwa byage byoꞌbugingi, unabiyambike mugala wage Heryazaari. Mukuba, haaho, ho Harooni agafwira.»