Amatuulo ágatangwa naꞌbimangizi
7
1 Ulusiku Musa akayusa ukushinga iheema lyeꞌmihumaanano, analitaluula imwa Nahano mu kulishiiga kwaꞌmavuta. Anataluula kiri neꞌbirugu byalyo byoshi, kuguma naꞌkatanda, neꞌbirugu byako.2 Ha nyuma, abimangizi beꞌmilala yaꞌBahisiraheeri, banayegeera ukutanga amatuulo, banali bo baabalya ábakaharuura abandu. 3 Banayija hiꞌheema lyeꞌmihumaanano, bagweti bagaleetera Nahano amagaare galindatu goꞌkubululwa, ágâli tumbikiirwi, kuguma neꞌshuuli ikumi na zibiri. (Ngiisi bimangizi babiri bakateekera igaare liguma-liguma. Na ngiisi mwimangizi, akaleeta ishuuli nguma-nguma yeꞌmwage.)
4 Nahano anabwira Musa kwokuno: 5 «Yago matuulo gaabo, ugayakiirage. Yago magaare, na yizo shuuli, ukizi bikoleesa ku mikolwa yiꞌheema lyeꞌmihumaanano. Ugabiheereza beene Laawi, bikizi batabaala mu mikolwa yabo.»
6 Kwokwo, yago magaare, Musa anagayabiira, kuguma na yizo shuuli, anabiheereza Abalaawi.
7 Beene Girishooni, anabaheereza amagaare gabiri neꞌshuuli zina, ukukulikirana neꞌmikolwa yabo.
8 Beene Meraari, anabaheereza amagaare gana neꞌshuuli munaana, ukukulikirana neꞌmikolwa yabo. Hitamaari mugala umugingi Harooni, anaba ye gakizi shungika imikolwa yabyo.
9 Halikago, ku luhande lwa beene Kohaati, Musa atakabaheereza kiri igaare liguma, kandi iri ishuuli nguma. Mukuba boohe, imikolwa yabo, bâli kizi betula ibikolanwa byeruusibwa ku bitugo byabo boonyene.
10 Ku kyanya akatanda kakataluulwa mu kushiigwa kwaꞌmavuta, abimangizi banatanga amatuulo imbere lyako. 11 Nahano anabwira Musa kwokuno: «Yako katanda, mu kukandaluulira, ngiisi mwimangizi agakizi yija, muguma-muguma ku lwage lusiku, gira ayiji tanga iryage ituulo.»
12-83 Iyo milala, kwo yâli ikumi niꞌbiri, ngiisi kirongoozi kyâli kizi tanga gaago-gaago matuulo.
Isahaani nguma-nguma íkatulwa mu bilo bishatu byeꞌharija, neꞌgarama magana gabiri na makumi gataanu. Noꞌmutanga muguma-muguma úgukatulwa mu kilo kiguma kyeꞌharija neꞌgarama magana galinda na makumi gataanu. Yibyo, bikulikiriini neꞌngerero za mwiꞌheema lyeꞌmihumaanano. Yizo sahaani neꞌyo mitanga, byoshi byâli yijwiri mwaꞌmatuulo goꞌmushyano mulembu, mufushe mwaꞌmavuta. Na kwakundi, hâli isahaani nguma-nguma íkatulwa mu garama igana niꞌkumi, zeꞌnooro, yanâli yijwiri mwoꞌmubadu.
Ngiisi muguma wabo akatanga ituulo lyoꞌkusiriiza lwoshi, shuuli nguma-nguma yeꞌnjuuke, neꞌkipanga kiguma-kiguma, neꞌkyanabuzi kyoꞌmwaka muguma, kiguma-kiguma. Hâli niꞌtuulo lyoꞌkukogwa ibyaha, kihebe kiguma-kiguma, niꞌtuulo lyoꞌkuyerekana ingoome shuuli zibiri-zibiri, neꞌbipanga bitaanu-bitaanu, neꞌbibuzi bitaanu-bitaanu byoꞌmwaka muguma.
Yabo bimangizi, bâli kulikiriini kwokuno:
Ulusiku lwa mbere, hâli Nasooni mugala Haminadabu, woꞌmulala gwa Yuda.
Ulusiku lwa kabiri, hâli Netaneeri mugala Swari, woꞌmulala gwa Hisakaari.
Ulusiku lwa kashatu, hâli Heryabu mugala Helooni, woꞌmulala gwa Zabulooni.
Ulusiku lwa kana, hâli Herizuuri mugala Shedeeri, woꞌmulala gwa Rubeni.
Ulusiku lwa kataanu, hâli Shelumyeri mugala Shuri-Shadayi, woꞌmulala gwa Simyoni.
Ulusiku lwa kalindatu, hâli Heryasafu mugala Deweri, woꞌmulala gwa Gaadi.
Ulusiku lwa kalinda, hâli Herishama mugala Hamihudi, woꞌmulala gwa Hifurahimu.
Ulusiku lwoꞌmunaana, hâli Gamalyeri mugala Pedashuri, woꞌmulala gwa Manaasi.
Ulusiku lwoꞌmwenda, hâli Habidaani mugala Gidyoni, woꞌmulala gwa Binyamiini.
Ulusiku lwiꞌkumi, hâli Ahyezeeri mugala Hamishadayi, woꞌmulala gwa Daani.
Ulusiku lwiꞌkumi na luguma, hâli Pagweri mugala Hokarani, woꞌmulala gwa Hasheeri.
Ulusiku lwiꞌkumi na zibiri, hâli Ahira mugala Henani, woꞌmulala gwa Nafutaali.
84 Yabo bimangizi, amatuulo go bakatanga ku lulya lusiku lukulu, mu kutaluula akatanda, umuharuuro gwo gwoguno: Isahaani ízikatulwa mu harija ikumi na zibiri, neꞌnzoozo zeꞌharija, zoꞌkubiika mwoꞌmuko ikumi na zibiri, neꞌbikombe íbikatulwa mu nooro ikumi na bibiri. 85 Ngiisi sahaani yeꞌharija, yâli gweti ubuzito bweꞌbilo bishatu neꞌgarama magana gabiri na makumi gataanu. Na ngiisi kirembe, kyâli gweti ubuzito bweꞌkilo kiguma neꞌgarama magana galinda na makumi gataanu. Yibyo birugu byoshi, byâli gweti ubuzito bweꞌbilo makumi gabiri na bina, ukukulikirana neꞌngerero za mwiꞌheema lyeꞌmihumaanano.
86 Tulya turaaye ikumi na tubiri útukatulwa mu nooro, twâli yijwiri umubadu. Na ngiisi kaguma kâli noꞌbuzito bweꞌgarama igana ukukulikirana neꞌngerero za mwiꞌheema lyeꞌmihumaanano. Twoshi haguma, twâli gweti ubuzito bweꞌgarama kihumbi na magana gabiri.
87 Ibitugwa byoshi íbikatangwa, gabe matuulo goꞌkusiriiza lwoshi, umuharuuro gwabyo, zâli shuuli ikumi na zibiri, neꞌbipanga ikumi na bibiri, neꞌbipanga bito byoꞌmwaka muguma ikumi na bibiri. Hanâli amatuulo goꞌmushyano, neꞌbihebe ikumi na bibiri íbikaleetwa biꞌtuulo lyoꞌkukogwa ibyaha. 88 Ku biloziri amatuulo goꞌkuyerekana ingoome, bakaleeta ishuuli makumi gabiri na zina, neꞌbipanga makumi galindatu, neꞌbihebe makumi galindatu, neꞌbipanga bito byoꞌmwaka muguma makumi galindatu. Yago matuulo go bakataluula, banagatanga ku katanda.
89 Ku kyanya kyoshi Musa âli kizi yingira mwiꞌheema lyeꞌmihumaanano gira aganuule na Nahano, âli kizi yuvwa izu lyage. Lirya izu, lyâli kizi shaaga ha kati ka balya bamakerubi babiri ábakatulwa mu nooro. Bâli teresirwi ku Kajumba keꞌKihango. Ee! Ku yeyo njira, kwo Nahano âli kizi múganuuza.