Feccagol laamu Israa'iila
(2 Kabaaruuji 10:1–11:4)
12
1 Robo'am yehi Sikem sabo Israa'iilankooɓe fuu na keɗii mo faa ngaɗa mo kaananke. 2 Nde Yerobo'am ɓii Nebat nannoo ɗum fu, tawi na woni Misira to suuɗowinoo nde doggunoo kaananke Suleymaana ndeen. O warti leydi Israa'iila. 3 Ɓe nelani mo, o wardi e jamaare Israa'iila fuu. Ɓe kaaldi e Robo'am, ɓe mbi'i:4 — Bammaa ronndiino min donngal teddungal, joonin le, sey koynanaa min maccangaaku teddungu ngu o tampiniranno min nguun, kuyfinanaa min donngal teddungal ngal o ronndi min ngaal de min ɗowtane.
5 Robo'am jaabii ɓe wi'i:
— Njehee de ngartowon caggal balɗe tati.
Nii jamaa oon sankitorii. 6 Ndeen kaananke Robo'am filii tindinooje to mawɓe tindinannooɓe bammum Suleymaana. O ƴami ɓe o wi'i:
— Ɗume haani mi jaabo jamaa Israa'iila o?
7 Mawɓe ɓeen njaabii mo, mbi'i:
— Si ni hannden a jaɓii laataade gollanoowo yimɓe ɓe, a jaabake ɓe haala lobba fu, ɓe laatoto gollanooɓe ma faa abada.
8 Ammaa Robo'am yoppi tindinooje mawɓe ɗeen, de filii tindinooje to jokolɓe bandiraaɓem, mawnidinɓe e muuɗum. 9 O wi'i ɓe:
— Yimɓe ɓe na mbi'a kam mi huyfinana ɗum'en donngal ngal baaba am yowuno dow muɓɓen. Ɗume kaanumi jaabaade ɓe?
10 Ndeen jokolɓe ɓeen mbi'i mo:
— Ngam yimɓe ɓeen mbi'i: «Bammaa teddini donngal amin de sanaa kuyfinanaa min ngal», inan ko njaabotoɗaa ɓe: «Honndu am famardu ndu, na ɓuri busal baaba am tekkude. 11 Si ni baaba am yowiino dow mooɗon donngal teddungal fu, min kaa, mi ɓeydan teddeefi maggal. Si baaba am eeltiriino on dorri guri fu, min kaa wo dorri ɗi njamndi njuwoori eeltirammi on.»
12 Nde balɗe tati ɗeen njottinoo fu, Yerobo'am e yimɓe ɓeen fuu ngarti hono no Robo'am wiirunoo ɓe noon. 13 Kaananke Robo'am yoppi tindinooje mawɓe ɗeen de jaabii ɓe jaabagol mettungol. 14 O jaaborii ɓe no jokolɓe ɓeen tindiniri mo noon, o wi'i:
— Si baaba am ronndiino on donngal teddungal fu, miin mi ɓeydan ngal. Baaba am eeltiriino on dorri guri, ammaa miin kaa dorri ɗi njamndi njuwoori eeltinirammi on.
15 Ndelle Robo'am hettindanaaki yimɓe ɓeen. Nii Joomiraaɗo waylitiri ko waɗi ɗuum faa tabintina haala muuɗum ka haaldunoo Yerobo'am ɓii Nebat e hunnduko annabi Ahiya mo wuro Silo.
16 Nde Israa'iilankooɓe fuu paamunoo kaananke hettindanaaki ɗum'en fu, njaabii, mbi'i:
— Minen kaa baka amin walaa e Daawda. Ndongu walaa hakkunde amin e ɓii Yesa. En koota gure men! Accen Daawda oon haybana suudu muuɗum!
Israa'iilankooɓe ɓeen kooti gure muɓɓen. 17 Ndelle Robo'am laami yimɓe Israa'iila wonɓe leydi Yahuuda tan. 18 O neli Adoraam, hooreejo golle tilsuɗe, to yimɓe ɓeen ammaa ɓe paɗɗi ɗum kaaƴe faa maayi. Kaananke Robo'am harii ƴeeŋi torkooru puccu muuɗum de doggiri Urusaliima. 19 Illa ndeen Israa'iilankooɓe muurtani lenyol Daawda faa warde hannden. 20 Nde yimɓe Israa'iila paamunoo gartol Yerobo'am fu, noddi ɗum kawrital, de ngaɗi ɗum kaananke dow Israa'iila fuu. Ndelle yimɓe lenyol Yahuuda tan njokki suudu Daawda.
21 Nde Robo'am wartunoo Urusaliima fu, hawrondini yimɓe Yahuuda e yimɓe Benyamin, worɓe 180 000 faa kaɓda e lenyi Israa'iila keddiiɗi ɗiin. Imo filonoo wartirde laamu dow makko kanko ɓii Suleymaana oon.
22 Ammaa konngol Laamɗo wari to nelaaɗo muuɗum bi'eteeɗo Semaya de wi'i:
23 — Haaldu e Robo'am ɓii Suleymaana kaananke Yahuuda e yimɓe Yahuuda e Benyamin, e yimɓe heddiiɓe ɓeen fuu, mbi'aa ɓe: 24 «Inan ko Joomiraaɗo wi'i: Taa kaɓde e banndiraaɓe mooɗon yimɓe Israa'iila. Mono fuu hoota wuro muuɗum, sabo huunde nde, wo to am ƴuuri.»
Ɓe njaɓi haala Joomiraaɗo kaan, ɓe njeccii gure maɓɓe hono no Joomiraaɗo wi'iri ɓe noon.
No Kaananke Yerobo'am waɗiri ga'i kaŋŋe ɗiɗi
25 Yerobo'am nyiɓii wuro Sikem dow baamle Efrayim de jooɗii toon. O yalti toon o nyiɓi wuro Paniyel. 26 Ndeen o wi'i ley ɓernde makko: «Laamu na waawi yeccaade e lenyol Daawda. 27 Si yimɓe na keddii na njaha Urusaliima faa cakkanowa Joomiraaɗo kirsamaaji ley suudu Dewal Joomiraaɗo Mawndu toon fu, ɓerɗe muɓɓen njeccoto to kaananke Robo'am. Ndeen ɓe mbara kam de ɓe njeccoo to Robo'am kaananke Yahuuda oon.» 28 Yerobo'am miili e ɓernde muuɗum, waɗi nga'oy kaŋŋe ɗiɗoy de wi'i yimɓe muuɗum:
— On tampii e yaade faa Urusaliima ɗowtowaade. Ndaaree, inan allaaji mooɗon burtinɗi on Misira, onon Israa'iilankooɓe!
29 O joƴƴini ngootiri dow waamnde wuro Baytila, keddiindi du, wuro Dan. 30 Ɗum laati sabaabu hakke. Yimɓe na njaha ɗowtowaade faa Dan, soɓɓirre leydi ndiin. 31 Yerobo'am waɗi du nokkuuje cakkirɗe, suɓii almaami'en hakkunde yimɓe ɓe njeyaaka e lenyol Lewi. 32 Ley lewru jeetataɓurdu, nyalaande sappo e joyaɓerde lewru nduun, Yerobo'am waɗi iidi, iri iidi gaɗeteeɗo ley Yahuuda. O waɗi kirsamaaji dow hirsirde. Noon o waɗiri Baytila toon du, imo hirsana nga'oy koy o tafi koy kirsamaaji. Baytila toon du, o joƴƴini almaami'en saabe nokkuuje cakkirɗe ɗe o waɗi ɗeen. 33 O ƴeeŋi dow hirsirde Baytila ndeen ley nyalaande sappo e joyaɓerde lewru jeetataɓurdu. Ndeen woni nyalaande nde o suɓii faa laatanoo yimɓe Israa'iila iidi. O wuli ure dow hirsirde ndeen.