No Suleymaana moƴƴiniri laamu muuɗum
4
1 Kaananke Suleymaana laamii dow leydi Israa'iila fuu. 2 Inan howruuɓe makko ɓurɓe fuu teddude: Ajariyaahu ɓii Sadok woni almaami. 3 Eliihooref e Ahiya ɓiɓɓe Siisa ngoni winndanooɓe laamiiɗo. Yahuusafat ɓii Aahilooda woni kokkoowo kabaaruuji. 4 Benaya ɓii Yehoyada waɗaa hooreejo sordaasiiɓe. Sadok e Abiyatar ngaɗaa almaami'en. 5 Ajariyaahu ɓii Natan waɗaa hooreejo dow dawranooɓe leydi. Jaabud ɓii Natan du woni almaami tindinoowo kaananke. 6 Aahisaar woni kawjantooɗo suudu laamordu. Adoniiram ɓii Abiida du kam waɗaa mawɗo golleeji tilsinaaɗi*.7 Suleymaana waɗi dawrooɓe 12 dow Israa'iila fuu. Dawrooɓe ɓeen kawjanto nguurey kaananke e yimɓe suudu laamordu. Gooto fuu na hakkilana gollal ngaal lewru wooturu ley hitaande. 8 Inan inɗe dawrooɓe ɓeen:
Ben-Hura na dawrana baamle Efrayim,
9 Ben-Dukara na dawrana leydi Maakas e Sa'alabim e Bayti-Semes e Eloon-Bayti-Hanaan,
10 Ben-Hasad na dawrana Aaribata e Sookuha e leydi Hefer fuu.
11 Ɓii Ben-Abiinadabu na dawrana leydi baamle Dor. Oon dewluno Taafat ɓii Suleymaana.
12 Ba'ana ɓii Aahilooda na dawrana Tanak e Megiddo e Bayti-Se'an ɗakkol Saaretan leydi Yesre'el e leydi hakkunde Bayti-Se'an faa yottii Abel-Mihola to Yokme'am.
13 Ben-Geber mo Ramot-Galaad, na dawrana Gure Ya'iir ɓii Manasa leydi Galaad, e Arigob leydi Basan e gure mawɗe 60, gure deeniraaɗe kokuuji mawɗi gooduɗi jamɗe alhan.
14 Aahinadaabu ɓii Iddo ardii Mahanayim,
15 Ahiimata ardii ley leydi Naftali, kam du dewliino Baseemat ɓii Suleymaana.
16 Ba'ana ɓii Husay ardii leydi Aser e Beyalot,
17 Yehosafat ɓii Paruuha ardii leydi Isakar,
18 Simey ɓii Ela ardii leydi Benyamin.
19 Geber ɓii Uri mo leydi Galaad dawranta leydi kaananke Amorinkooɓe bi'etenooɗo Sihon tawti ndi Oga laaminooɗo leydi Basan. Kanko tan dawranta leyɗe ɗeen fuu.
20 Yimɓe Yahuuda e Israa'iila na ɗuuɗi hono njaareendi daande maayo. Iɓe nyaama iɓe njara, iɓe ngondi e seyo.