No Daawda acciri yonki Sawulu ɗiɗaɓerde
26
1 Yimɓe wuro Sif ngarii tawi Sawulu wuro Gibeya, mbi'i mo:— Yalla a faamaay Daawda na suuɗii dow waamnde Hakila huccitinde e ladde Yesimon naa?
2 Ndelle Sawulu yaadi e worɓe muuɗum ujunaaje tato suɓaaɓe to ladde wi'eteende Sif faa o filowoo Daawda toon. 3 Nde Sawulu yottinoo waamnde Hakila huccitinde e wuro Jesimon ndeen, ndaaki ɗakkol laawol. Wakkati oon du Daawda na heddii ley ladde ndeen. Nde o yi'unoo Sawulu na jokki mo fu, 4 o nuli horooɓe, ndeen o tennyori Sawulu warii. 5 Ndeen Daawda wurtii yehi nokkuure to Sawulu daaki toon. O yi'i nokkuure to Sawulu e Abineer ɓii Ner hooreejo sordaasiiɓe ɓeen mbaalata. Sawulu na fukkii ley ndaaka, sordaasiiɓe mum na piilii ɗum.
6 Daawda ƴami Ahimelek Hitiyankeejo e Abisay ɓii Seruya sakiike Yo'ab, wi'i:
— Moy jippodotoo e am to ndaaka Sawulu?
Abisay jaabii, wi'i:
— Miin yaadata e maaɗa.
7 Ndelle Daawda e Abisay njehi to sordaasiiɓe ɓeen wakkati jemma, de inan Sawulu na fukkii na ɗaanii ley ndaaka, labbo mum na ɗisi e leydi ɗakkol hoorem. Abineer e sordaasiiɓe na pukkii na piilii ɗum.
8 Abisay wi'i Daawda:
— Laamɗo wattii ganyo ma e ley junngo maaɗa hannden. Jonle accaa kam mi ɗisa mo labbo faa hewta leydi nde wootere tan. Kile ɗiɗi fuu mi haajaaka.
9 Ammaa Daawda wi'i Abisay:
— Taa halku mo. Moy waawi yowude junngom dow cubaaɗo Joomiraaɗo de tawee walaa feloore?
10 Daawda ɓeydi wi'i:
— Mi hunorake Joomiraaɗo buurɗo, sikke walaa Joomiraaɗo kam fiyata mo. Yalla wo wakkati makko warata de o ƴuwa, naa o naatan ley wolde de o maaya. 11 Ammaa Joomiraaɗo haɗam yowude junngo am dow cuɓaaɗo Joomiraaɗo. Ndelle hooƴu labbo wonngo ɗakkol hoore makko ngoon e jollooru ndiyam nduun, de ndillen.
12 Ndelle Daawda hooƴi labbo e jollooru ko wonnoo ɗakkol hoore Sawulu, de ɓe ndilli. Fay gooto yi'aay ɗum, faamanaay ɗum, fay gooto du fintaay. Ɓe fuu, iɓe ɗaanii sabo Joomiraaɗo wattii ŋoŋɗi tedduɗi dow maɓɓe. 13 Ndeen Daawda feƴƴiti naɗɗol ngool de darii faa dow waamnde ɗakkiinde ɗo ɓe ngoni ɗoon. Iɓe toowtunduri seeɗa. 14 Daawda feekii, noddi sordaasiiɓe e Abineer ɓii Ner, wi'i:
— Abineer, a nootataako naa?
De Abineer jaabii, wi'i:
— Aan woni moy, noddoowo kaananke o?
15 Daawda wi'i:
— Wanaa aan du wo a gorko naa? Moy woni nannduɗo yeru maaɗa ley Israa'iila? Ko waɗi ndelle a doomaay jooma kaananke o? Sabo dey, goɗɗo warii faa halka jooma kaananke o. 16 Ko ngaɗuɗaa ɗuum wooɗaa. Mi hunorake Joomiraaɗo buurɗo, oɗon njeyi wareede sabo on ndoomaay joom mooɗon, cuɓaaɗo Joomiraaɗo. Ndaar jonle toy labbo kaananke woni, de toy njollooru ndiyam wonnoondu ɗakkol hoore makko nduun woni.
17 Sawulu annditi daande Daawda de wi'i:
— Yalla ɗum wo daande maa, aan ɓiyam Daawda naa?
Daawda wi'i:
— Wo daande am, joomam kaananke.
18 Daawda ɓeydi wi'i:
— Joomam, dow ɗume ndiiwataa kam, miin maccuɗo maaɗa? Ɗume ngaɗumi? Bonanda oye woni e junngo am? 19 Jonle joomam kaananke, hettina haalaaji maccuɗo maaɗa. Si wo Joomiraaɗo saabii laatoɗaa ganyo am fu, o jaɓa sadaka am. Ammaa si wo yimɓe ngaɗi ɗum fu, ɓe laatoo huɗaaɓe yeeso Joomiraaɗo, sabo hannden ɓe ndiiwii kam taa mi heɓa ngeɗu am e ley ndongu Joomiraaɗo. Ɓe mbi'ii mi yaha, mi teddina alla'en woɓɓe. 20 Joonin du, taa accu ƴiiƴam am rufa e leydi to woɗɗi e Joomiraaɗo. Sabo aan kaananke Israa'iila, aɗa ummina wolde faa piloɗaa kootu tan. Aɗa jokki kam hono no goɗɗo loohorto gerral ley baamle.
21 Ndeen Sawulu wi'i:
— Mi waɗii ko boni. Wartu ɓiyam Daawda. Mi waɗataa ma ko boni saabe ko korsinɗaa nguurndam am ley gite maaɗa hannden ɗuum. Goonga, mi laatake hono puuyɗo, mi woofii sanne.
22 Daawda jaabii, wi'i:
— Inan labbo maaɗa, kaananke. Gooto e jokolɓe maa wara jaɓa ngo. 23 Joomiraaɗo na yoɓa mono fuu saabe laaɓal muuɗum e hoolnaare muuɗum. Joomiraaɗo wattii ma e ley juuɗe am hannden, ammaa mi foortataa junngo am dow cuɓaaɗo Joomiraaɗo. 24 Hono no korsinirmi nguurndam maaɗa hannden nii, Joomiraaɗo horsina nguurndam am de danna kam e torraaji fuu. 25 Ndeen Sawulu wi'i Daawda:
— Barke na woodani ma, aan ɓiyam Daawda. Goonga a waɗan kulle mawɗe, a gaynan ɗe fuu.
Ndeen Daawda adi laawol, Sawulu du hooti.