Rimeede Isiyaaka
21
1 Joomiraaɗo miccitii Saaratu hono no wiirunoo noon, waɗani ɗum ko aadinoo ɗuum. 2 Saaratu hooƴi reedu. O rimani Ibrahiima ɓiɗɗo e ley nayeewu muuɗum, fodde wakkati mo Laamɗo wi'unoo ɗum oon. 3 Ibrahiima inndiri ɓinngel gorel ngeel Isiyaaka (ɗum na fiirta «imo jala»). 4 Caggal balɗe jeetati Ibrahiima taadi ɓiyum Isiyaaka hono no Laamɗo yamiri ɗum noon. 5 Duuɓi Ibrahiima wo 100 nde rimananoo Isiyaaka ndeen. 6 Saaratu wi'i:— Laamɗo hokkii kam jaleeɗe, neɗɗo fuu nanɗo ɗum jaldan e am.
7 O ɓeydi katin, o wi'i:
— Moy waawunoo wi'ude Ibrahiima, Saaratu muynan ɓiɓɓe? Ammaa mi rimanii mo ɓiɗɗo gorko e nayeewu makko!
No Ibrahiima riiwiri Hajara e Ismaa'iila
8 Isiyaaka mawni, de entaa. Ibrahiima waɗi weltaare mawnde nyannde o entanoo ndeen. 9 Nde weltaare ndeen waɗetenoo ndeen, Saaratu yi'i ɓiɗɗo gorko mo Hajara Misiranke debbo rimani Ibrahiima oon, ina jalnoroo Isiyaaka. 10 O wi'i Ibrahiima:
— Riiwu korɗo o e ɓiyum! Ɓiyiiko oon rondataa e ɓiyam Isiyaaka.
11 Konngol ngool naawi Ibrahiima sanne saabe ɓiyum Ismaa'iila oon. 12 Ammaa Laamɗo haaldi e Ibrahiima wi'i:
— Taa mettin ɓernde maa saabe suka maa e korɗo maa oon. Ko Saaratu wi'i fuu, njaɓaa, sabo e Isiyaaka kemrataa lenyol. 13 Ɓii korɗo oon du, mi waɗan ɗum lenyol sabo wo o ƴuwdi maaɗa.
14 Ibrahiima dawi beetee law, hooƴi buuru e sumalle ndiyam, wakkini Hajara, hokki ɗum suka oon de dillini ɗum. Oon dilli, heddii ina yiiltoo ley ladde Beerseba. 15 Nde ndiyam sumalle ɗaam timmoynoo fu, o yoppi suka oon ley lekki pamari gomma. 16 O toowti haddi fiɗande kural, o jooɗii. O wi'i e ɓernde makko:
— Taa mi yi'a maayde suka oon.
Nde o jooɗinoo ndeen, o ɓanti daande makko, o woyi. 17 Laamɗo nani daande cukalel ngeel. Maleyka Laamɗo ƴeewnii illa dow kammuuli noddi Hajara, wi'i ɗum:
— Ɗume danyi maa Hajara? Taa hulu, sabo Laamɗo nanii daande suka oon ɗo o woni ɗoon. 18 Umma joga suka oon e junngo maa, tinna e makko sabo mi waɗan mo lenyol manngol.
19 Laamɗo omti gite makko. Ndeen o yi'i ildude ndiyam. O yehi, o hebbini sumalle oon, o yarni cukalel ngeel.
20 Laamɗo wondi e suka oon. O mawni, o jooɗowii ley ladde Paran. O laatii piɗoowo kure. 21 Nde o jooɗoynoo ley ladde ndeen, inniiko ɓaŋani mo debbo jeyaaɗo Misira.
No Ibrahiima waɗiri aadi hakkunde muuɗum e Abimelek adidiri aadi e Abimelek
22 Wakkati oon, Abimelek e hooreejo sordaasiiɓe muuɗum bi'eteeɗo Pikol, mbi'i Ibrahiima:
— Laamɗo ina wondi e maa e ko ngaɗataa fuu. 23 Joonin kaa, hunanam dow innde Laamɗo, a jambataako kam, a jambataako ɓiɓɓe am, a jambataako taaniraaɓe am, saabe mbooɗirka ka ngaɗanmaami kaan. Hunanam a moƴƴinanan kam miin e leydi ndi koɗuɗaa e mum ndiin hono no moƴƴiniranmaami noon.
24 Ibrahiima jaabii, wi'i:
— Mi hunanake ma.
25 Ammaa Ibrahiima feli Abimelek dow kabaaru ɓunndu ndu gollooɓe Abimelek teeti nduun. 26 Abimelek jaabii, wi'i:
— Mi anndaa moy waɗi ɗum. A humpitaay kam. Wooɗi, du mi nanaay ɗum si wanaa hannden.
27 Ibrahiima hooƴi na'i e be'i e baali, de hokki Abimelek. Ɓe ngaɗidi aadi. 28 Ibrahiima suɓii borti jeɗɗi. 29 Abimelek haaldi e Ibrahiima, wi'i:
— Borti jeɗɗi ɗi ittuɗaa ɗiin, ɗume ɗi ngoni?
30 Oon jaabii, wi'i:
— A nanngan borti jeɗɗi ɗiin e junngo am, ɗum laatoo seedaaku kollungu wo miin wasi ɓunndu nduun.
31 Ɗum waɗi de ɓe inndiri nokku oon Beerseba (ɗum na fiirta «Ɓunndu hunayeere») sabo toon ɓe kunodii.