Suudu Baabiila toowndu
11
1 Wakkati oon, adunaaru fuu wo sii ɗemngal gootal woodunoo. 2 Nde yimɓe eggirannoo faro lettugal ndeen, ɓe tawi njaayri ley leydi Sinar de ɓe koɗi toon.3 Ɓe mbi'onduri:
— Ngaree piyen pereeje, nduppen ɗe faa ɗe cemmbiɗa, ɗe laatoo hono kaaƴe.
Ɓe ngaɗi pereeje, ɓe keɓi katin loofe ɗaatuɗe hono taari, ɗe laatanii ɓe loofal nyimreteengal.
4 Ɓe mbi'i:
— Ngaree mahanen ko'e men huɓeere e suudu toowndu, faa ndu meema kammu. Ngaɗanen ko'e men innde, heɓa taa caakoɗen e adunaaru fuu.
5 Joomiraaɗo jippii faa ndaara huɓeere e suudu toowndu ndu ɓiɓɓe Aadama nyiɓi nduun.
6 Joomiraaɗo wi'i:
— Ndaar, ɓe fuu wo ɓe lenyol gootol e ɗemngal gootal. Ɗum wo fuɗɗoode golleeji maɓɓe tan. Joonin ko ɓe anniyii gollude fuu, walaa ko haɗata ɓe waɗude ɗum. 7 Ngaree njippoɗen, njiiɓen haalaaji maɓɓe, taa ɓe paamra.
8 Noon Joomiraaɗo sankitiri ɓe e adunaaru fuu. Ɓe celi nyiɓude huɓeere ndeen. 9 Ɗum waɗi nde inndiraa Baabiila,* sabo toon Joomiraaɗo jiiɓi ɗemngal adunaaru fuu, toon du o sankiti ɓe e adunaaru ndu fuu.
Yimɓe ƴuuruɓe e Saam
10 Inan ƴuuruɓe e Saam: Nde Saam heɓunoo duuɓi 100 ndeen, rimi Arfacada. Ɗuum wo duuɓi ɗiɗi caggal ilam tuufaanu. 11 Saam wuuri duuɓi 500 caggal rimeede Arfacada. O rimi katin ɓiɓɓe worɓe e rewɓe. 12 Arfacada waɗi duuɓi capanɗe tati e joy de rimi Saala. 13 Caggal rimeede Saala, Arfacada wuuri duuɓi 403. O rimi ɓiɓɓe worɓe e rewɓe.
14 Saala waɗi duuɓi 30 de rimi Eber. 15 Caggal rimeede Eber, Saala wuuri duuɓi 403. O rimi ɓiɓɓe worɓe e rewɓe.
16 Eber waɗi duuɓi 34 de rimi Palek. 17 Caggal rimeede Palek, Eber wuuri duuɓi 430. O rimi ɓiɓɓe worɓe e rewɓe.
18 Palek waɗi duuɓi 30 de rimi Rewu. 19 Caggal rimeede Rewu, Palek wuuri duuɓi 209. O rimi ɓiɓɓe worɓe e rewɓe.
20 Rewu waɗi duuɓi 32 de rimi Seruk. 21 Caggal rimeede Seruk, Rewu wuuri duuɓi 207. O rimi ɓiɓɓe worɓe e rewɓe.
22 Seruk waɗi duuɓi 30 de rimi Nahor. 23 Caggal rimiide Nahor, Seruk wuuri duuɓi 200. O rimi ɓiɓɓe worɓe e rewɓe. 24 Nahor waɗi duuɓi 29 de rimi Tera. 25 Caggal rimeede Tera, Nahor wuuri duuɓi 119. O rimi ɓiɓɓe worɓe e rewɓe.
26 Tera waɗi duuɓi 70 de rimi Abram e Nahor e Haran.
Ƴuuruɓe e Tera
27 Inan ɓiɓɓe Tera: Tera rimi Abram e Nahor e Haran. Haran rimi Luudu. 28 Haran arti bammum Tera maayde. O maayi e leydi ndi o rimaa e muuɗum ndiin, ley ngenndi Kaldiya'en mbi'eteendi Uur. 29 Abram e Nahor ɓaŋani ko'e muɓɓen rewɓe. Jom suudu Abram ina wi'ee Saaray. Jom suudu Nahor ina wi'ee Milka ɓii Haran. Haran woni baaba Milka e Yiska. 30 Saaray wo debbo dimaro. O walaano ɓiɗɗo.