No Nuuhu naatiri Laana mawka kaan
7
1 Joomiraaɗo wi'i Nuuhu:— Naatu laana kaan, aan e koreeji maa fuu, sabo aan tan nji'umi wo ponnditiiɗo e ley jamaanu o. 2 Kooƴaa daabaaji dagiiɗi ɗiin fuu jeɗɗi jeɗɗi, ɗi ngonda e maaɗa, gorel e dewel. Daabaaji ɗi ndagaaki ɗiin du ɗiɗi ɗiɗi, gorel e dewel. 3 Pooli piirooji du jeɗɗi jeɗɗi, gorel e dewel, faa sii majji heddoo e adunaaru. 4 Sabo caggal balɗe jeɗɗi mi tomnan ƴuwoonde e adunaaru balɗe 40 jemma e nyalooma. Ko wuuri ko tagumi fuu, mi ittan ɗum e adunaaru ndu. 5 Nuuhu waɗi ko Joomiraaɗo yamiri ɗum fuu.
6 Nuuhu ina woodunoo duuɓi 600 nde ilam tuufaanu warannoo e adunaaru ndeen. 7 Nuuhu e jom suudu muuɗum e ɓiɓɓe muuɗum worɓe e deekiraaɓe muɓɓen naati laana kaan faa kisa ilam tuufaanu. 8 Daabaaji dagiiɗi e ɗi dagaaki fuu e pooli e kulle ladooje, 9 fuu naaddi e Nuuhu ley laana kaan. Ɗi naatiri ɗiɗi ɗiɗi, gorel e dewel, hono no Laamɗo yamiri Nuuhu noon.
10 Caggal balɗe jeɗɗi ɗeen, ilam tuufaanu fuɗɗi na yoola adunaaru. 11 Ley hitaande ndeen duuɓi Nuuhu wo 600. Ley lewru ɗiɗaɓurdu e ley nyalooma muuɗum sappo e jeɗɗaɓo, ilduɗe mawɗe cukkitii e adunaaru, julanɗe kammu du cukkitii. 12 Ƴuwoonde toɓiri dow adunaaru balɗe 40, jemma e nyalooma. 13 Ley nyalooma oon Nuuhu naati laana kaan, kam e jom suudu muuɗum e ɓiɓɓe muuɗum Saam e Haam e Yaafasu e rewɓe muɓɓen tato. 14 Kamɓe e kulle ladde fuu, ngel fuu e sii muuɗum, daabaaji wuro, ngel fuu e sii muuɗum, ko ladata, ngel fuu e sii muuɗum, pooli, ngel fuu e sii muuɗum, naati laana kaan. 15 Ko tagaa ko foofata fuu, ɗiɗi ɗiɗi muɓɓen naaddi e Nuuhu ley laana kaan. 16 Ɗi fuu ɗi naatiri gorel e dewel no Laamɗo yamiri mo noon. Joomiraaɗo uddani Nuuhu dammbugal laana kaan.
17 Ilam tuufaanu waɗi dow adunaaru nduun balɗe 40. Ndiyam ɗaam heewi, ɗam ƴepti laana kaan, ka ƴuwi e leydi. 18 Diyeele ɗeen mawni, ɗe uddi adunaaru, heddii laana kaan ina roya dow majje. 19 Ɗe mawni e adunaaru nduun sanne, ɗe njooli baamle toowɗe fuu. 20 Diyeele ɗeen njooliri baamle ɗeen tooweefi piyanɗe 15. 21 Ko tagaa ko foofata e adunaaru fuu halki: pooli e daabaaji wuro e kulle ladde e ko ladata e yimɓe fuu.
22 Ko foofirta hinere ko wuuri e adunaaru fuu halki. 23 Laamɗo halki ko wuuri ko woni e adunaaru, ɗum woni yimɓe e daabaaji e ko ladata e pooli fuu. Nuuhu e ɓe wondi ley laana ɓeen tan ndaɗi.
24 Diyeele ɗeen keddii ina cuddi adunaaru faa waɗi balɗe 150.