सरदिसता कलिसियातोर्क पेनदा पोल्लें
3
1 सरदिस सहरता कलिसियाता दूताक इल्हा रासा. बोनगा अय्ते पेनदा एडुं सुक्कां आनि एडुं आत्मां मंतां ओर बतल इंतोर इत्ते, निमे कियाना कबाह्क नाकु एरपाटे; निवद निमे “जीवाते मंतन” इंचि इनकुंचंतिन गानि अस्सल इत्ते निमे हासि मंतिन. 2 निमे तेल्विते मन, पेनदा मुन्ने नीवा कबाह्क पुरा आताप नाक दिस्सेक हिल्ले. अदुनहाटीं, मय्सि मत्ता कबाह्कुन पुरागा कीम. मायसि होनालय आता विस्वासमतुन गट्टिगा कीम. 3 अदुनहाटीं केंजता बोदातुन निमे बल्हा ओप्कुत्तिनो अदुन मति कीम. मति कीसि अल्हे ताका आनि मनसु मार्सकुन. ओक्कला निमे जेगर्ता मनाकोंटे, नना वरोर दोंगानलेसि वांतन, नना बद वेलाक निहागा वांतन, दाना पत्तागुडा नीकु दल्गो. 4 गानि सरदिस सहरता इच्चुर विस्वासुल्क, ओरा कपडिंक डाग अंटाकोंटा इरताप, ओरा ताकमळतुन बेस इरतुर. ओर तेल्ला कपडिं केरताप सत्तेमते नावातोनि ताकनुर; ओर अल्हा ताकना लायक मंतुर. 5 बोरय्ते गेल्सांतोर, ओन्कु इसोंटा तेल्ला कपडिं केर्समड जर्गार आनि नना ओना पोर्रोल्तुन पिस्वरता पुस्तकमताल तंचि पोहोन. अल्हेने नावा बाबाना मुन्ने आनि दूताना मुन्ने ओना पोर्रोल ओपकुंतन. 6 पवित्र आत्मा सरदिसता कलिसियातोर्कुन बतल वेहांता अदुन, बोन्कु अय्ते केव्क मंता ओर बेस केंजिरकांटि.पिलदेलपियाता कलिसियातोर्क पेनदा पोल्लें
7 पिलदेलपिया सहरता कलिसियाता दूताक इल्हा रासा. बोरय्ते पवित्र आनि सत्तेमतोर मंतोर, ओर दाविदना अदिकारता चाबि इर्रंतोर, ओर तेंडता तल्पुन बोरे बंद किया पर्रोर आनि ओर बंद कीता तल्पुन बोरे तेंडा पर्रोर, ओर बतल इंतोर इत्ते, 8 निमे कियाना कबाह्क नाक एरपाटे, नीवा ताकत तक्को मंता गानि नावा पोल्ले केंजतिन आनि नावा पोर्रोलतुन एतोन इंचि इना हिल्लिन. अदुनहाटीं हूळा! नीवा मुन्ने उंदि तल्पु कुल्ला कीसि इरतन, अदुन बोरे बंद किया पर्रुर. 9 हूळा! नना देय्यमता सास्त्रम कराहना लोता लोकुल्कुन निहागा तायंतन, ओर “मोमोट यहुदि आंदुम इंचि इंतुर” ओर यहुदि आयुर गानि ओर आबद्दम वळ्कसेक मंतुर. नना ओर्कुन निहागा तायसि नीवा काल्क मोळ्का गोटांतन. अस्के नना मितोनि बच्चोन पावरम कींतन इंचि ओर्क तेळियंता. 10 निमे ओप्के पीसि नावा पोल्लेते ताकतिन अल्हेन, ना पोल्लों केंजति. अदुनहाटीं ई दुनियाता लोकुल्कुन पट्टु हूळालय बतलय्ते परिक्सा वायाना मंता, अंटेताल नीकुन कापाळंतन. 11 नना बिरानेन निहागा वांतन. नीवा किरिटमतुन निहागटाल बोरे गुंजा मन्नि इंचि, निहागा बतलय्ते विस्वासम मंता अदुन इंका गट्टिगा पीसि ताका. 12 बोरय्ते गेल्सांतोर, ओन नना नावा पेनदा गुळिते बस्केन पलाते पेय्साकोंटा उंदि कंबा तिरागा निपसंतन. नना ओन पोर्रो नावा पेनदा पोर्रोल, नावा पेनदागटा स्वर्गमताल हिळु वायाना पूना येरुसलेमता पोर्रोल आनि नावा पूना पोर्रोल रासंतन. 13 पवित्र आत्मा पिलदेलपियाता कलिसियातोर्कुन बतल वेहांता अदुन, बोन्क अय्ते केव्क मंता ओर बेस केंजिरकांटि.
लोदिकियाता कलिसियातोर्क पेनदा पोल्लें
14 लोदिकिया सहरता कलिसियाता दूताक इल्हा रासा. बोरय्ते आमीन इननोर, बरोसाता लायक, निजम गवाइ वेहानोर, इंका पेन तयार कीता अन्निटवुने मोदोल मनकल आसि मंतोर, इव पोल्लें ओनव आंदूं. 15 निमे कियाना कबाह्क नाकु एरपाटे, विस्वासमते निमे सल्लागा हिल्लिन गरम हिल्लिन. निमे सल्लगा हिलाकोंटे गरम मंचि मत्ते बेस आसि मनवळ. 16 निमे सल्लगा हिल्लिन, गरम हिल्लिन एच्चगा मंतिन. अदुनहाटीं नीकुन नना ना तोडदाल पलाते कक्कंतन 17 निमे अय्ते, “नना श्रीमंतुन, नहगा अन्नि मंतां, नाकु बतल तक्को हिल्ले”, इंचि इनकुंचंतिन. गानि नीकु इदु एरपाट हिल्ले गदा, निमे पेद्दा हेडसोत्तोन, गति हिल्वोन, गरिबोन, गुड्डिन, कुळकें मंतिन इंचि. 18 अदुनहाटीं, निमे विस्वासम लोप्पो निजम मत्ता मनकल आयानाहाटीं नना नीकु उंदि उपायम वेहांतन अद बतल इत्ते, तळमिते सुद्द कीता बंगारम निमे नहागटाल एता. दानहेंदाल निमे सिरमंतुन आकिन. कुळकें मत्ताद हूळसि सिग्गु होनामन्नि इंचि केर्रालय तेल्ला कपडि नहागटाल एता. कळ्क बेस दिस्सनाहाटीं कळ्कुने वाटालय मत्तु अस्सा. 19 बोन-बोन अय्ते नना पावरम कींतन, ओनकु गट्टिगा वेह्चि, सुद्रांचा गोट्टंतन. अदुनहाटीं इरगा जोसुने मंचि मनसु मार्सकुन्नु. 20 हूळा, नना तल्पुनगा नित्तिसि तल्पुन टोक-टोक तंतस्के; बोरय्ते ना लेंग केंजसि तल्पु तेंडांतोर, नना ओनगा लोप्पो दांतन, होंचि ओनतोनि कलियसि गाटो तिंतन आनि ओर नातोनि तिंतोर. 21 बल्हा अय्ते नना गेल्सि नावा पेनबाबानतोनि ओना राजगद्देपोर्रो होंचि उदुतान. अल्हे बोरय्ते गेल्सांतोर ओन नना नातोनि नावा राजगद्देपोर्रो उपसंतन. 22 पवित्र आत्मा लोदिकियाता कलिसियातोर्कुन बतल वेहांता इत्ते, बोन्कु अय्ते केव्क मंता ओर बेस केंजिरकांटि.