योहानुंक पेन हुपिस्ता पोल्लें
योहानुंक पेन हुपिस्ता पोल्लें
1
1 इव पोल्लें, वायाना कालमते बिरानेन जर्गानव आंदूं, इवुन येसु किरिस्तु ओना सेवाकुल्कुंक वेहना इंचि पेन ओन्कु अप्पाजेप्ता. अस्के येसु ओना उंदि दूतातुन योहान इनना वरोन सेवाकुनगा लोहचि, ओन्कु रासालय वेहतोर. 2 अस्के ओर पेनदा पोल्लेता बारेमते, येसु किरिस्तु गवाइता बारेमते आनि ओर हूळता अन्नि पोल्लेना बारेमते गवाइ वेहतोर. 3 पेनदाहेंदाल वाता इव बविस्यता पोल्लेन बोरय्ते हदवांतुर, केंजांतुर आनि अव्टे राससि मत्ता परकारम ताकंतुर ओर नसिबतुर आंदुर. बारित्ते इव पोल्लें जर्गना वेला दग्गेर्क एवता.योहान येसुना पोल्लेन एडुं कलिसियातोर्क वेहांतोर
4-5 आसिया राज्येमते मनना एडूं कलिसियातोर्क नना योहानुन बतल रासेक इत्ते, इंदके मनानद, मोदोलताल मत्तद आनि मुन्ने वायाना मंता आ पेनदाहेंदाल, दाना राजगद्देता मुन्ने मनना आ एडूं आत्मानाहेंदाल इंका बरोसालायक गवाइ मत्ता येसु किरिस्तुनाहेंदाल मीकु दया, सांति दोर्किकांटि. येसु हातोराव्टेटाल जीवाते तेदता मोदाटा मनकल आंदुर. ओर ई बूमिपोर्रोटा राजालोरा राजाल आंदुर. मना अंटोर्कुन पावरम कियानोर, इंका ओना नेत्तुरतुन पोंगागोटसि मनाकुन मना पापाल्कुनाल पाय्सतोर. 6 आनि मना पेन बाबाना पेद्दातनम आनि अदिकारम बस्केळ्क मननाहाटीं ओर मनाकुन पेनदा राज्येमतोर आनि पेर्मालोर्क कीतोर. आमीन!
7 हूळाट, येसु किरिस्तु मब्बु तेर्पेनाल वासेक मंतोर. अंटुर ओन हूळानुर. ओराव्टे ओरगुडा मंदनुर बोरय्ते ओन कोह्कतुर. दुनियातोर अन्नि वंसाल्कुना लोकुल्क सातितुन तंचेके दुक्कम कियानुर. हो इल्हे आयार आमीन!
8 “नन्नेने अल्पा आनि ओमेगाa आंदुन. नन्नेने मोदाटोन, इंदके मनानोन, इंका वायानोन आनि अन्निटकन्ना बलमतोनगुडा नन्नेने आंदुन” इंचि पेन इंता.
किरिस्तुना दर्सनम
9 नना योहानुन मिवा दादान आंदुन. येसु बोगांसता दुक्कमते, तिप्पल्कुने, राज्येमते आनि ओप्के पियमळते मीवातोनि दंटाते मंतन. नना पेनदा पोल्ले आनि येसुना बारेमते गवाइ वेहताहाटिं पतमोस इनना दिबेतगा बंद कीसि मंतन. 10 सामिना रोजुननाड इत्ते, अय्तारम, नना पवित्र आत्माते निंडिस मत्तन. नावा पजो तूताकोमता पेद्दा आवाज केंजा वाता. 11 “निमे बतल अय्ते हूळांतिन अदुन पुस्तकमते राससि, इपिसुस, स्मुरना, पेर्गमम, तुयतीरा, सरदिस, पिलेदिलपिया आनि लोदिकिया इव एडुं कलिसियातोर्क लोहचिम” इंचि इत्ता.
12 अस्के, नातोनि बोर वळ्कसेक मंतोर इंचि हूळालय पज्जो तिरियसि हूळतन अते, नाक बंगारमता एडुं दिसोडिं दिसतां. 13 अव एडुं दिसोडिन नड्डुम वरोर मनकना रूपमते पुटतोर मत्तोर. ओर पोडगु कपडि केरसि मत्तोर ओना सातिक बंगारमता पट्टा दोहचि मत्ता. 14 ओना तल्ला आनि ओना केल्कु तेल्ला गोर्रेता बुरालेंसि, बर्पुनलेसि तेल्लगा दिस्सेक मत्ता. आनि ओना कळ्क तळमिता वेलगुनालेसिं मत्तां. 15 ओना काल्क कोल्मिते वाटसि एर्रगा आता इत्तोळलेसिं मेर्सेक मत्तां. ओना लेंग समुद्रमता वेल्लेने एता तळालेसिं मत्तां. 16 ओर ओना तिना कय्दे एडुं सुक्कान पीसि मत्तोर. ओना तोळदाल रोंडु दिक्कुल्कने आयदारकुना कसेरलेसिं पेय्सेक मत्ता. पोडदु एक्को एद्दि तस्के बल्हा मेर्संता अल्हा ओना तोड्डि मेर्सेक मत्ता.
17 बस्के अय्ते ओन नना हूळतन, अस्के नना हासि होत्तप आसि ओना काल्कुनगा अर्रतन. अस्के ओर ओना तिना कयदुन ना पोर्रो इरसि, “निमे वेरियमा सुरुव आनि आकिर नन्नेने आंदुन, नना पिस्सि मंतन, 18 नना अय्ते हासि मत्तन गानि हूळा, इंदके नना बस्केळ्कताहाटि पिस्सि मनंतन. हामुर आनि नरकमता चाबि नहागेन मंता. 19 निमे इदवेरादाका हूळता पोल्लें, बव अय्ते जर्गसेक मंतांगो आनि मुन्ने जर्गानव अन्नि पोल्लें राससि इर्रा. 20 निमे नावा तिना कय्दे हूळता एडुं सुक्कां आनि बंगारमता एडुं दिसोडिना मर्ममता अर्तम इल्हा मंता; एडुं दिसोडिं इत्ते एडुं कलिसिया आंदु आनि एडुं सुक्का इत्ते, उंदि-उंदि कलिसियाता उंदि-उंदि दूता आंदु” इंचि इत्ता.