Parwa nyēpō sōmōk nyoo kiisir
:CHOWAANA
Tookwēēsuut
1
1 Aneen nyi pooyoon nyoo ōōw. Āsiruun parwaani choorweenyuun Kaayō nyoo āchāmiin man. 2 Choorweenyuun, āsooyaa Iriin kilē inyōōru pāypooyō ākōō kaalya nkōō kir aka tōkōl nyoo i-irēy. Ānkētaa kilē imiinyēēn ituupēy ng'ālyoontoo Iriin kukaraam. 3 Kyaapaypayiitu nyēpō kwōng'uut kii nēē pka tuupchēēnichooch walak kumwoorwoon wōloo ituuptooy ng'ālyoon nyēpō man. 4 Moomii kir nyoo āpāypāchinii kisiir ateer kilē mii laakōōchuuch kuuryoong'ēē man.Kāroomin nyēpō kipakoong'o
5 Chamaneenyuun, imiinyēēn i-irēy kir nyaa karaam paani itookēy tuupchēēnichooch mpō ntā too choo mēēnkēt. 6 Kiikumwoochi :pichoochēē kaaniisee akipō choomnyēēng'uung'. I-irchi nyaa karaam paani iyoomiisēy nkōō oor nyoo pāypāychinii :Iriin. 7 Mii nyuun :pichoochēē kupēētootēy kupāyiisyēēchinii *Kiriistō aku māmārēy toorētō aka tōkōl kichoonō piich chēpō saang'. 8 Maraat nyuun kēētoorētēēchaan piich choo lēē choochēē tākēēmii kipakoong'o tōkōl nkōō pāyisyooni pō ng'ālyoon nyēpō man.
9 Kyoosirchi parwa kaaniisee, wōloo nyuun kiitay :Tyootērēpē nyoo chāmēy ku-āpēy keey parak kuteer ng'aleechuuch. 10 Paani koochōōn nyuun woloonēē, āchōōnēy āsyooruuy ng'al tōkōl choo kiiku-ir inyeentee ākōō mpō sēēmsēēmuut choo āmēēnēēch. Mā choochēē ākityōōn, māmārēy mpō inyeentee kutaak tuupchēēnichooch, akukārtooy piich choo mārēy kutookēy. Nēē taak :chiich toyēēchoochēē ku-oono kaaniisa.
11 Chamaneenyuun, kimeetuup tukun chēpō ng'ōōki, ira tukun choo kāroomēēn. Chiich nyoo irēy tukun choo kāroomēēn kupō Iriin. Ku chiich nyoo irēy tukun chēpō ng'ōōki, ku mēēnkēt Iriin.
12 Ng'āloolēy :chiich aka tōkōl nyaa karaam akipō Tēēmētēēryō. Aku mwooruuy mpō man kile karaam :inyeentee. Kung'āloolēēchaan mpō nyaa karaam akipō inyeentee akiinkēt inyēēn kilē man kiyoo kumwoorēēchaan.
Kooyoomiisō