Wōloo kiitēptooy :Paawulō mu Teesaloonika
2
1 Choo kituupchō, ānkēt :akwaan kilē ki-iriisyō :ng'ala choo kāroomēēn kitya kii nēē kuruutoowook. 2 Ānkēt wōloo kiisip /kēē-ustēēch /ākēēmuulēēch nkōō kōōr nyēpō Pilipi. Mpō ntā /kiikukareech koong' kitya, ku kiikōōnēēch :Iriin kaamuuka kēēmwoorwook lōkōōyichiich choo kāroomēēn. 3 Kiimāku-āmtooy :achaan ng'al chēpō ng'uurnan ntā keepkaat ng'al choo mā kāroomō aku mākuutyāmēēchaan kilē kēēpootook. 4 Kiichameech :Iriin akukōōnēēch :lōkōōyichu kāroomēēn. Kunyuun, mēēlē kyoomtooy lōkōōyichu kilē sikeepaypaaya piich, aku kyoomtooy kilē sikeepaypaaya Iriin nyoo nkēt kāāpkootuutēchooch. 5 Ānkēt :akwaan kukaraam kilē mākulēēchaan piich walak choo lēē chēēmootiin choo iilēēnook ng'al choo kāroomēēn akupāyiisyēērō ng'al choo ēēlēē piich koong'. Āsiisiin :Iriin nyēpō ng'aleechu. 6 /Mākumārēēchaan kilē ālooswēēch ntā kuulooswēēch :chiich aka tōkōl, 7 mpō ntā kiiyāmēy ātoorētēēch kilēē *kāāyooytooyiipō *Kiriistō. Aku kii nēē kimii nkōō akwaan ku kiikutālāyiitu kilēē cheepyooso nyoo riipēy laakōōchiich.8 Āmu choomnyoot nyoo kiikuting'ēēnook ku kiikuchēpoot mēēlē kēēkōōnook lōkōōyipō Iriin ākityōōn, aku kēēkoonu sopēēnyoon mpō, akiikuchamaak man. 9 Choo kituupchō, ānkēt :akwaan wōloo kiiku-irta pāyit pērēēt ākōō lang'a. Kiikupāyiisyēy kilēē nyoonēē tākēēnyōōruu kiyoo kitoorētēē keey simāku-āpkook nyikiisin nēē kaakēē-āmwook lōkōōyichoochēē pō Iriin.
10 Kēēmii nkōō akwaan choo ārānēy *Kiriistō ku kyaarookwaan akuuro :mpō Iriin kilē kichaan piich choo kupēērēy keey, akēēpō man, amākuting'ēy lēēluut. 11 Ānkēt :akwaan mpō kilē kiiku-irwaak kir aka tōkōl nyoo irchinii :chiich laakōōchiich. 12 Kiikucheeraak, keesaarsaaraak akeetas taay kēēmwoorwook a-ir ng'al choo pāypooyēy Iriin nyoo kiikukuurook āpootēpii tōkōl akaaramta pāyuunātēēnyiin ākōō ōōwintanyiin.
13 Kumwoochinii Iriin kuureer kōōnkēy ākōy, āmu kii nēē ku-āpkook lōkōōyiichiich ateer akaacham ng'alēēchoochēē, ma kilēē lōkōōy chēpō chiich kipaat, aku kilēē chēpō Iriin, aku man lēē nyoonēē. Aku nyuun pāyiisyēy :ng'ālyoontoonoonēē nkōō akwaan choo ārānēy *Kiriistō. 14 Choo kituupchō, kyoonyōōruukwaan ng'al choo karkeey nkōō choo kiinyōōru :kaaniiseen choo mii Chuuteeya choo tuupēy Yēēsu *Kiriistō. Kiinyariilaak :piikwook kilēē paani kiinyāriilēy :Yāwuutik akwaaneek. 15 Kipar :Yāwuutichoochēē Kiptaayaan Yēēsu nkōō *ōōrkooyiipō Iriin aku-ooneech. Mēēpāypooyēy :pichoochēē Iriin aku kōlkōlō :pichoochēē nkōō wōloo mii :piich tōkōl. 16 Kiityam mpō kilē ntā karteech tāmāku-āmchi lōkōōy piich choo mā Yāwuutik, lōkōōy choo ki-irēy /kēēsāru pichoochēē. Nku mii kutāsinii :Yāwuutichoochēē ng'ōōki walak choochēē ting'ēy. Nkanyi, kiikunareek :Iriin akuutēnii nyuun akwaaneek siitēt nyēpō kwōng'uut.
Kyaam :ēēmō Paawulō kuruutoochi pichoochēē kuureer
17 Choo kituupchō, kiikumētō keey nkōō akwaan kiitēēn. Mpō ntā kiikulōōwiitunēē keey ku kiikiipkootook ākōy, āmēēch :ēēmō kitya keerootook kuureer. 18 Kiyoonēē nyoo ki-ireech keemar keewarakee wōloonēē āmiikwaan. Kyoomaraaneen Paawulō kilē ntā awaraka āsip choo siirēy ākoong'o, aku kiikarteech :Syeetaani. 19 Āpāypooyēēch, akēēlāsēēnook keey nēē /kukōōnēēch mālāk nkōō taayuu Kiptaayaantēēnyoon Yēēsu pērēētuunoonēē wārākēē. 20 Pō man, akwaan choo kulāsēēnook keey ākēēpāypāyiituunēēnook.