Kolosaay 1

Parwa nyoo kiisirchi :Paawulō

PIICH CHĒPŌ KOLOSAAY

Tookwēēsuut

1 Aneen nyi Paawulō kaasirwaak parwaani kilēē paani kiikulēwēnān :Iriin ālēku *kāāyooytooyiin nyēpō Yēēsu nyoo *Meesaaya ākoomii nkōō tuupchēēnyoon Tiimōti. 2 Kiitookwēēsookwaan piich chēpō *Kiriistō choo āmii Kolosaay choo ātiliilō ākootiirēē keey *Kiriistō. Kusooyēy kilē kuupēēruurook :Paapa Iriin akukōōnook kaalya.

Kiisoochi :Paawulō piich chēpō Kolosaay

3 Kimwoochinii kōōnkēy Iriin Paapaa Kiptaayaantēēnyoon Yēēsu *Kiriistō pērēētuu aka tōkōl nēē kimii kēēsoowook. 4 Kupāypāyō āmu kaakeeteer :achaan wōloo ārāntooy Yēēsu nyoo *Meesaaya ākōō wōloo āchāmtooy piich tōkōl chēpō *Kiriistō. 5 Ā-irēēkwaan kilēē nyoonēē āmu mii ākēnēy kiyoo /kiikuusiintoowook nkōō kipsēnkwēt. Kiisip ateereekwaan ng'ālyoontooni wōloo mii :lōkōōy chēpō man. Choochēē ku lōkōōy choo kāroomēēn 6 choo /kiikēē-āmwook. Kilēē paani kaaku-āpchi piich pēēruur :lōkōōyichu kāroomēēn akimii kutāsēy taay kuyāmuuy ng'wēny tōkōl, kilēē mpō paani mii ku-irēē nkōō kwēēnuung'woong' kung'eetee pērēētuunoonēē kyootēērēy ākoosōwu man wōloo chāmtooyook :Iriin. 7 Kyaateereekwaan lōkōōyichoochēē kāroomēēn Eepapuura, nyoo kupāyiisyēy tōkōl ākēēchāmēy. Inyeentee ku chiich nyoo ranaat akupāyiisyēēchinii *Kiriistō sikuutoorētook atuup inyeentee. 8 Inyeentee nyi kiimwoorwēēch wōloo āmii āchāmtooy keey nkōō choomnyoot nyoo kiikōōnook :Toomirmiiryēē nyoo Tiliil.

9 Kunyuun oo, kung'eetee pērēētuuni kiikutēērēy akipō akwaan, keetas :achaan mpō taay kēēsoowook pērēētuu aka tōkōl kilē toosōwuu kiyoo mārwook :Iriin nkōō sopoontong'woong', ākoonyōōru ng'ōrōōmnyō nyoo ōōw nyēpō Toomirmiir. 10 Paani kaa-ir kilēē nyoonēē, ātēpi nkōō ātēpuut choo mārwook :Kiptaayaan akaa-ir kir aka tōkōl nyoo pāypooyēy inyeentee, ā-irēy ng'al choo kāroomēēn ākootāsēy taay āsōwu Iriin. 11 Kusooyēy kilē ākiilyō nkōō kaamuukeenyiin tōkōl soomuuytooy ākoomurtooy ng'al tōkōl nkōō tāloosyō ākōō pāypooyō 12 āmwoochinii kōōnkēy Paapa nyoo ki-iraak ānyōōru kiyoo /kiikēēchēpchi piich chēpō *Kiriistō choo māng'iisyēy nkōō lēpooyin.

Tōrōōr Kiriistō kusiir kir aka tōkōl

13 Kiikusārwēēch :Iriin nkōō pāyuunāt nyēpō *Syeetaani akuumuteech keepa pāyuunāt nyēpō Wēēriinyiin nyoo chāmēy. 14 Kupunuunō Wēēriinyiin nyoonēē ku /kikeetyaayteech akunyōōwēēch kaat :Iriin ng'ōōkichooch.

15 Moomii :chiich nyoo kiikuumuuk kuurō Iriin, aku nyuun itōōntanyiin *Kiriistō. Inyeentee nyoo pāytooy tukun tōkōl. 16 Tōrōōr :Wēērii āmu /kiiku-ir tukun tōkōl kupunuunō inyeentee, choo mii ng'wēny ākōō choo mii im, choo /kuurōōtēy ākōō choo /mākuurōōtēy. Ki-irta pāytooyik ākōō toomirmiirōōy choo pāytooyiisyēy aku ting'ēy kaamuuka. /Kiiku-ir tukun tōkōl kupunuunō Wēērii /ākiiku-irēy tukuuchoochēē akipō inyeentee. 17 Kiimii :inyeentee kitoomō /kee-ir kir aka tōkōl akutāsēy taay :tukuuchoochēē tōkōl nkōō kaamuukeenyiin.

18 Inyeentee ku mētit nyēpō kaaniiseenyiin nyi lēē pōōrtanyiin. Inyeentee nyoo kiitoowunō keey :tukun tōkōl aku inyeentee nyēpō taay kung'eetee meerat si nēē ng'at kutōrōriit nkōō tukun tōkōl. 19 Kiicham :Iriin nyuun kung'uutuunō keey Wēēriinyiin nkōō oor aka tōkōl. 20 Kiimārēy :Iriin kuuchoomnyō kir aka tōkōl nkōō inyeentee kupunuunō Wēēriinyiin, tukun choo mii ng'wēny ntā ku tukun choo mii im. Kyoopu kaalya kupunuunō kērētiipō Wēēriinyiin choo /kiikutarta nkōō kimurtooyoon.

21 Kyoolōōwēēkwaan ākōō wōloo mii :Iriin akyoorōōtēy Iriin kilēē puunyoontēēng'woong' āmu kyoo-irēy ng'al chaa raacheen. 22 Paannyēēnyi nyuun, ku kiikuuchoomnyook :Iriin ākōō inyeentee kupunuunō meeraa *Kiriistō si nēē ng'at apa wōloo mii :Iriin ātiliilō nyoo mooting'ēy ng'ālyoon. 23 Si nēē ng'at ā-iti ng'aleechu, ku mārēy atas taay aran *Kiriistō akaanam ng'ālyoonteenyiin kumēētimtiimook :chiich. Maakany /kēēchuutook nkōō kir nyoo mii ākēnēy nyoo kyaateeree lōkōōy choo kāroomēēn. Lōkōōyichoochēē kiiku-āmwook ku choo /kiikyoomchinii piich tōkōl nkōō ng'wēny aku lōkōōyichoochēē choo ā-āmtootēy :aneen.

Kiipāyiisyēēchi :Paawulō piich chēpō Kiriistō

24 Āmii :aneen paannyēēnyi ānyārilēy āmu kyoo-āmwook lōkōōy choo kāroomēēn akwaan choo mā Yāwuutik. Aku nyuun, mpō ntā āmii ānyārilēy, ku āchō paypay. Kyaacham aneen anyaril aku tākumii nyāriluut chaa chaang' choo tākēēkirintooy kilēē piich chēpō *Kiriistō. Ku āmii nyuun ānyārilēy kilēē paani kiinyaril *Kiriistō akipō piichiich choo karkeey nkōō pōōrtanyiin. 25 Kiikulēwēnān :Iriin ālēku kipāyityoonteenyiin ākiikukōōnān pāyiisyōōni āmwoochi piich choo mā Yāwuutik :ng'ālyoontēēnyiin kukaraam. 26 Kiwung'aat ng'ālyoontooni taay nkōō āpēnuut choo kiikusiirtō /akaakēēng'oong'chi piichiich paannyēēnyi. 27 Kicham :Iriin kung'uuti piichiich wōloo tēēnō tōrōōrintō ākōō pēēruur nyēpō ng'ālyoontoonoonēē kiwung'aat. Pēēruurtonoonēē ku pō piich tōkōl. Kunyuun oo, ng'ālyoontoonoonēē kiwung'aat ku nyi: Mii *:Kiriistō kwēēnuung'woong' aku nyoonēē nyoo irook ākēn ānkēt kilē āpoomāng'iisyēy nkōō tōrōōrin nyēpō Iriin. 28 Kunyuun oo, ārii aka tōkōl yoo kakupa, kēē-āmchinii piich tōkōl akipō araa *Kiriistō, kēērwoochinii ākēēnēētēy chiich aka tōkōl nkōō ng'ōrōōmnyō nyoo chōōnēē wōloo mii *Kiriistō si nēē ng'at keemut :achaan chiich aka tōkōl nyoo kiikukiil :kaaraneenyiin kuwō taayuu Iriin. 29 Kiyēēnyi nyoo āmii āpooryēērēē ākookiilēy keey nkōō kaamuuka tōkōl nyoo kōōnoon *:Kiriistō.