/Kukōōnēēch sopoon nyoo rēēl mu Kiriistō
2
1 Kyaakwaan mēērootēēn taay nkōō ng'ōōki choo kyooting'ēy. 2 Kiitootuupēēkwaan ātēpuut choo nāmēy keey nkōō ātēpoo ng'wēny akyootuupēy *Syeetaani nyoo pāytooyiintoo *toomirmiirēy chaa raacheen chēpō woowēēs parak. Pāytooyiintoonoonēē :nyi mii kupāyiisyēērēē choo mātēērēy iit Iriin. 3 Kii kilēēchaan tōkōl pichoochēē. Kiintōrōōrwēēch :ātēpuut chaa raacheen chēpō pōōrwēyiichooch akiikutuupēy kāāpkootuutēpō tukun chaa raacheen. Kiinyoolchinēēch mpō /kēēkōōnēēch siitēt kilēē :piich walak tōkōl.4 Ku āmu chāmēēch :Iriin akuriirēēnēēch, 5 ku kiikukōōnēēch sopoon nyoo rēēl nkōō *Kiriistō. Mpō ntā kiikiikēēpētyō nkōō ng'ōōki choo kiikuting'ēy, kusārwēēch nkōō chamateenyiin. 6 Kiikuung'eeteeneech :Iriin meerat kilēē Yēēsu *Kiriistō akuutuuyēēch nkōō inyeentee sikēēpāytee :tōkōl mu im, 7 sikung'uutu nkōō pērēētuus choo pkoonēy kilē chāmēēch kitya nyoo moomii :kiyoo kiitēēnēē. Kiing'uutwēēch choomnyoonoonēē kupunuunō *Kiriistō. 8 Iriin kipaat nyoo ki-ir /kēēsārwook nkōō chamateenyiin, paani kyaaran inyeentee. Mēēlē kyaa-ir :akwaan kir /tākēēsārwook, wōloo nyuun kir nyoonēē nyoo kikōōnu :Iriin kipaat. 9 Kimalas keey nyuun :chiich kilē /kiikēēsāru, āmu makusāruuy chiich akipō tukun choo kāroomēēn choo ka-ir. 10 Kii-ireech :Iriin kēēlēkuu piich choo reelacheen kupunuunō Yēēsu *Kiriistō sikee-ira tukun choo kāroomēēn choo kii kaakusip kutātwēēch.
Kiichoomnyō :Iriin Yāwuutik ākōō choo ma Yāwuutik
11 Ānkēt :akwaan kilē kiirēēng'ook :Yāwuutik āmu /maakimurook, akiirōōtēy kilē maalēwēnook :Iriin. Maasōwu kilē murwēēng'waang' ku kir nyēpō saang' kipaat amāwālēy sopoon. 12 Nkōō taay ku kiimoonkēt :akwaan *Meesaaya nyoo kiichōōnēy, aku /kiikuutapaaneenaak piipō Iriin *Israayeel, nkōō kiyoo kiyoomiis :Iriin akwaaneek. Kyoomāng'iisyēy nkōō ng'wēny kimoonkēt Iriin āmooting'ēy :kir nyoo āmoong'uuy. 13 Aku aniinee, ku kyoopāyiituukwaan Yēēsu nyoo *Meesaaya. Mpō ntā kyaakwaan lōōwō nkōō wōloo mii :Iriin ku /kiikeemutwaak ālēēkiti inyeentee kupunuunō kērētiipō *Kiriistō.
14 *Kiriistō nyoo kyoopkēēch kaalya nēē kichaan Yāwuutik ntā ma Yāwuutik, ākiikuutuuyēēch tōkōl kēēlēku kir ākoong'o. Kiisyaar inyeentee karwa nyoo kyoopuuy puunyoonti. 15 Paani kiitēto :Yēēsu sopoontanyiin, kurook ng'ātuutēpō Yāwuutik. Ki-ir kilēē nyoonēē tākuutuuyō kāmōōsichoochēē ārēēny kilēku ākoong'o akunyōōru kaalya. 16 Kii nēē ma :Yēēsu nkōō kimurtooyoon, kuuchoomnyō kāmōōsichoochēē ārēēny nkōō Iriin. Kuuwoong'u puunyoonti akuuchoomnyō pichoochēē kilēku kir ākoong'o. 17 Kiichō :inyeentee siku-āmwook lōkōōy choo āpuuy kaalya, akwaan choo kyoolōōwō nkōō mpō choo kyoolēēkitō nkōō wōloo mii :Iriin. 18 Inyeentee nyuun nyoo irēēchaan tōkōl kēē-iti Paapa Iriin nkōō kaamuukaa Toomirmiiryēēnyiin.
19 Kunyuun, maakwaan too āmoomiikwaan saang'. /Kikeetastaak piipō Iriin ākēēpō :tōkōl kaaw ākoong'o nyēpō Iriin, 20 nyoo /kiikitēēchi tēlēkuu ng'alēēpō *kāāyooytooyiik ākōō *ōōrkooy, ku Yēēsu *Kiriistō kiptālēnyēē. 21 Inyeentee nyoo tiirēy keetiik tōkōl chēpō koot /kēētēēkēy ākōy kukiil kilēku kō nyoo tiliil nyēpō Iriin. 22 Inyeentee nyoo tēēkook mpō ātuuyō ālēku kōyoonēē tiliil nyoo māng'ēy :Toomirmiir nyoo Tiliil.