3
1 Mii :kāroomin nee nēē Yāwuutyoon chiich? Ntā toorētēy nee :murwoo Yāwuutik? 2 Man, mii :kāroomin nyoo ōōw nkōō oor aka tōkōl nēē chō Yāwuutyoon. Nyēpō taay, ku /kiikumwoochi Yāwuutik ng'ālyoontoo Iriin. 3 Man kilē kiikutay :Yāwuutik chaa chaang' kuuran ng'ālyoontoo Iriin. Mpō ntā lēē nyoonēē oo, ara ng'uutuuy :nyoonēē kilē /mākuurānēy Iriin? 4 Acha! Mālēē nyoonēē. Mpō ntā ng'uur :piich tōkōl nkōō ng'wēny, kipō man :Iriin kilēē paani mwoorēy :siruut kilē, “Iting'ēē man irwookwoon āmu itilchinii piich kiirwook kutuup keey nkōō man.”†5 Muukēy :chiich kumwa kilē, “Nēē toorētēy :rāyiityēēnyoon piich kuurō kāroomin nyēpō Iriin oo, ku mākātāpāypāyiituuy :Iriin nēē kātēērwookēēch?” 6 Acha, mālēē nyoonēē. Ntā kiilēē nyoonēē, ntā kiimuukēē kilē nee kuurwoochi :Iriin ng'wēny? 7 Muukēy :chiich aka kumwa kilē, “Nēē koo irēy :ng'uurnaneenyuun Iriin kung'uutu keey kilē ting'ēy man /ākēētōrōōr oo, kupō nee /sikeemwa kilē aneen kipng'ōōkiyoon?” 8 Imuukēy mpō imwaa kilē, “Kee-ira ng'ōōki sikuchōōnō kir nyaa karaam.” Mii mpō :piich walak choo ng'āloolēēnēēch nkōō oor nyaa ra akumwoorēy kilē kumwoorēēchaan ng'aleechoochēē. /Kuurwoochinii akwaaneek āmu yāmēy /kēērwoochi.
Kipng'ōōkiin mpō Yāwuutik
9 Kumwoorēy nee nyuun? Ara ku kāroomēēchaan Yāwuutik kusiir piich walak? Acha! Kaakēēsip keemwaa kilē kiikupāyu :ng'ōōki piich tōkōl, nēē kā Yāwuutyoon ntā ku mā Yāwuutyoon. 10 Mwoorēy :siruut kilē,
“Moomii :chiich mpō ākoong'o
nyoo pēērēy keey.
11 Moomii :chiich man nyoo nkēt Iriin.
Moomii mpō :akoong'o nyoo wāsēy inyeentee.
12 Kiikumētō :tōkōl Iriin,
maakuting'ēy :tōkōl man.
Moomii :chiich mpō ākoong'o nyoo irēy ng'al choo kāroomēēn.”†
13 Mwoorēy :siruut kilē,
“Lēē :ng'aleekwaak kawat
aku ānyinyō :ng'ālyēēpikwaak kumwoorēy ng'uurnan.
Ng'ālyoon aka tōkōl nyoo mwoorēy ku ng'waan kilēē ng'woonoo kipaang'wa.”†
14 “Moomii kir nyoo mwoorēy kung'ētu kupāniisyō nkōō kuutuwayiikwaak choo ng'woonēēn.”†
15 “Kwārkwārō :pichu kurumiisyēy.
16 Ārii aka tōkōl yoo pēētii kuululuukēy tukun akuunyariil piich.
17 Mēēnkēt :pichu kaalya.”†
18 “Mēēwārēy :pichoochēē Iriin mpō kiitēēn.”†
19 Kuunkēt kilē kir aka tōkōl nyoo mii siruut chēpō Iriin, kupāytooy pichu /kikusirchi siruutēchoochēē, simatuuk keey :chiich aka tōkōl sikuurwoochi :Iriin ng'wēny tōkōl. 20 Kunyuun, moomii :chiich nyoo chamaat nkōō taayuu Iriin nēē tyam kutuup ng'ātuut āmu ng'uutwēēch ng'ātuut kilē kii kipng'ōōkiin.
Wōloo chāmtēēch :Iriin
21-22 Kiikung'uutwēēch :Iriin oor nyoo rēēl nyoo kichāmēēnēēch keepee taayuunyiin. Kiisip kung'alaala *:Muusa ākōō *ōōrkooy chēpō Iriin araanoonēē. Kir nyoo irēēch kuchameech :Iriin ku kēētiirō keey Yēēsu ākityōōn nēē kātākutuupēy ng'ātuut chēpō *Muusa. /Kusāruuy chiich aka tōkōl nyoo kātiirō keey Yēēsu. Moomii /keemwa kilē ng'oo ng'oo 23 āmu kiiku-ir :chiich aka tōkōl ng'ōōki nyoo mēēmuukēy ku-iti tōrōōrin nyēpō Iriin. 24 Kiikuchameech :Iriin sikēētililiitu kupunuunō *Meesaaya Yēēsu nyoo kiiwaleeneech sopoontanyiin kuutyaayteech. 25 Kikōōnu :Iriin Yēēsu /kee-ira kōrōs sikuuchoomnyō piich nkōō inyeentee nēē tiirō keey :chiich kilē kiitarta :Yēēsu kērētiichiich akipō inyeentee. Ki-ir :Iriin kilēē nyoonēē sikung'uutu kilē pō man kuriira piich akunyōōchi kaat ng'ōōkiikwaak. Kutoomō kitarta *:Kiriistō kērētiichiich /sikēēsārwēēch, ku kiiriira :Iriin piich akuupuuytoochi ng'ōōkiikwaak choo kiikiiku-ir. 26 Kutooku aniinee kilē pō man :Iriin, nēē mwa kilē kiikutililiituuy kipng'ōōkiis āmu kiikutiirō keey Yēēsu.
27 Ara, kulāsinii keey nee? Moomii :kir āmu nēē kutiirēē keey Yēēsu kuchameech :Iriin keepee taayuunyiin, mā nēē kuutyam kee-ir tukun choo kāroomēēn. 28 Kiinkēt kilē kiikutililiit :chiich nkōō taayuu Iriin nēē tiirō keey Yēēsu, mā āmu tuupēy ng'ātuut. 29 Ara nēē lēē :Iriin ku Iriintoo Yāwuutik ākityōōn? Mā Iriintoo mpō piich choo mā Yāwuutik? Pō :Iriin mpō piich choo mā Yāwuutik. 30 Mii :Iriin ākoong'o, aku inyeentee nyi tilchinii piich kilē tiliilō nēē tiirō keey Yēēsu nēē kā Yāwuutik ntā ku mā Yāwuutik. 31 Ara nēē kaakēētiirēē keey sōō Yēēsu kung'uutuuy kilē kuumuukēy kēēmētō ng'ātuut? Acha! Mālēē nyoonēē, kimii achaan kēē-irēy kilēē wōli mārtooy ng'ātuut.