Parwa nyoo kiisirchi :Paawulō
PIICH CHĒPŌ ROOMA
Tookwēēsuut
1
1 Aneen :nyi Paawulō āsirwook parwaani akwaan piich tōkōl chēpō *Kiriistō choo āmii Rooma. Kiilēwēnān :Iriin āpāyiisyēēchi Yēēsu *Kiriistō, ālēku *kāāyooytooyiin akuutapaanan saa-amta lōkōōyichiich choo kāroomēēn. 2 Kisip kuuyoomiisēēch :Iriin nkōō siruutēchiich lōkōōyichoochēē kupunuunō *ōōrkooyichiich. 3-4 Lōkōōyichu ku pō Wēēriinyiin Yēēsu *Kiriistō Kiptaayaantēēnyoon nyoo /kiikituum kilēē chiich nkōō kōpō pāytooyiin Tāwuti. Ku /kiikung'uutu nkōō kaamuukaa Toomirmiir nyoo Tiliil kilē Wēēroo Iriin :inyeentee paani /kiikuung'eeta meerat. 5 Kiikukōōnaa :Iriin kaamuuka kupunuunō *Kiriistō saa-ir pāyiisyoo *kāāyooytooyiik āmwoochinootō piich choo mā Yāwuutik kir nyoo kiiku-irchi :Iriin akwaaneek sikuteer akutiirō keey inyeentee. 6 Akwaan nyuun :walak nkōō pichoochēē /kikēēkuur kupoyiit Yēēsu *Kiriistō.7 Ātookwēēsookwaan tōkōl choo āmii Rooma choo chāmook :Iriin akiikuutapaanaak ālēku piichiich choo tiliilēēn. Kuupēēruurook :Paapēēnyoon Iriin ākōō Kiptaayaan Yēēsu *Kiriistō akukōōnook kaalya.
Mākuut nyēpō Paawulō kuruutoochi Rooma
8 Kir nyēpō taay nyoo āmwooraa, ku āmwoochi Iriinteenyuun kōōnkēy akipō akwaan tōkōl nkōō kir nyoo ki-irwaak :Yēēsu *Kiriistō. Āmwooraa kilēē nyoonēē āmu mii :piich kumwoorootēy nkōō ng'wēny tōkōl kilē āmiikwaan ātiirēē keey Iriin. 9 Nkēt :Iriin nyoo āpāyiisyēēchinii nkōō moonyuun tōkōl ā-āmtooy lōkōōy chēpō Wēēriinyiin kilē āsoowook pērēētuu aka tōkōl. 10 Asooyaa saayit aka tōkōl kuchēp :Iriin oor ānyōōru pārooyin sooruutoowook. 11 Āmii :aneen āpkootēy kilē ntā kutuuyō sookōōnook pēēruur nyēpō Toomirmiir nyoo Tiliil siku-iraak ākiilyēē nkōō kaaranēēng'woong'. 12 Kir nyoo āmwooraa ku keecheera keey tōkōl nkōō kaaranēēnyoon, acheeraan acheeraak. 13 Tuupchēēnichuuch, āmāraa āsōwuukwaan kilē kyaatyam :aneen āsip chaa chaang' kilē āruutoowook ku maakuumuuka ākōy paannyēēnyi. Āmāraa āpāyiisyō nkōō akwaan kilēē paani kyoopāyiisyō nkōō kōōrootin walak. 14 Mārēy ā-irchi piich tōkōl pāyit, nēē kā tookuunoot ntā ku mā tookuunoot, nēē sōōmānootēēn ntā ku māsōōmānootēēn. 15 Kiyoonēē nyi iraa amar āchō Rooma wōli āmiikwaan aamtaata lōkōōy choo kāroomēēn chēpō Iriin.
16 Moowāraa a-amta lōkōōy choo kāroomēēn āmu nkōō lōkōōyichoochēē kumii kaamuuka nyēpō Iriin nyoo irēy /kēēsāru chiich aka tōkōl nyoo keeran, kitoowuunō Yāwuutik kupōk sikutuup choo mā Yāwuutik. 17 Ng'uutuuy :Iriin kupunuunō lōkōōyiichiich choo kāroomēēn kilē chāmēy :inyeentee chiich aka tōkōl nyoo kātiirō keey Yēēsu akutas taay kilēē nyoonēē ākōy. Nyōōruuy chiichoonēē sopoon kilēē paani mwoorēy siruut kilē, “Nyōōruuy :chiich nyēpō man sopoon nēē tiirō keey Iriin.”†
Ng'woonin nyoo nyōōruuy :piich choo mēēwārēy Iriin
18 Kiikung'uutu :Iriin nyālootyō nyoo chōōnēē kipsēnkwēt kutāchi keey piich choo mēēwārēy inyeentee aku kipng'ōōkiis choo kiikutupō ng'ālyoon nyēpō man ng'ōōkiikwaak. 19-20 Nkēt :piich wōloo lēē Iriin āmu kiikung'uuti keey :Iriin akwaaneek kupunuunō tukun choo ki-irta inyeentee. Mpō ntā toomō kuuro :piich nkōō koonyiikwaak Iriin nyoo māng'iisyēy ākōy, ku kiikung'uutu :Iriin kaamuukeenyiin āsip chaa chaang' kung'eetee /kee-irta ng'wēny. Ku moomii nyuun :wōloo yēētēē keey :piich. 21 Mpō ntā kiinkēt :akwaaneek kilē mii Iriin, ku maatōrōōr nyuun ntā kumwoochi mpō kōōnkēy. Kutoowu kuupkaat ng'al chēpō sālwoonti akupētyō :mētēwēēyiikwaak. 22 Paani ki-irtooy keey kilē ku ng'oroomō, ku koo kiisālwoontānchō. 23 Kiikutunchinii :pichoochēē kāānāāmōōn choo /kiiku-irta choo karkeey nkōō piich, tāriit ntā ku tyoong'in choo chuutēē keey ng'wēny ākōō tyoong'in walak.
24 Kiyoonēē nyoo ki-ir Iriin kumētē pichoochēē ku-ir tukun choo mārēy pōōrwēyiikwaak sikutakalaan akunyeera pōōrwēyiikwaak. 25 Kiikuchuunnyō :pichoochēē nkōō wōloo mii man nyēpō Iriin akicham ng'uurnan. Kutunchinii nyuun tukun choo kii-irēy :Iriin nyoo kātākutunchinii Iriin nyoo tōrōōroot ākōy. Lēē nyoonēē.
26 Āmu kii-ir ng'al choo lēē choochēē tōkōl, kumētē :Iriin pichoochēē kutuup mākuut chēpō pōōrwēyiikwaak. Kiikutay mpō :cheepyooso kutēpō nkōō murēn sikutēpō nkōō cheepyoosee aka. 27 Nkōō oor nyoo lēē nyoonēē, ku kiikutay mpō :murēnō kutēpō nkōō cheepyooso sikutēpō ākōō murēnēē aka. Kwoop keey nyuun murēnō nkōō murēnēē aka. Kiikutakalaan :murēn kuti nkanyi /kiikēētilchi kilē ng'woonchinii akipō ng'ōōkiikwaak. 28 Aku paani maacham nyuun :pichoochēē kutuup ng'oroomnyoo Iriin nyēpō man, kumēti :Iriin akwaaneek kuupkaat kaapkootuut chēpō ng'ōōki aku-irēy ng'al choo mēērookēē /kee-ir. 29 Kiikuulaampuus pichu :rāyiityō nyoo ōōw ākōō ng'ōōki, kimoo nkōō lēēluut. Rōōtinii keey ng'at koong', rumiisyēy, irōōtēy riiri, mēlmēēliisyēy akuululuukootēy ng'al. Mwoorootēy seemseem, 30 akung'āloolootēērēē piich walak nyaa ra. Sāsēy Iriin, āwēēsō aku lāsēy keey. Wāsootēy oortin choo irēē ng'ōōki, amēēkoonyitēy sikiikwaak. 31 Sālwēy :pichu, /mākiirānēy, amāchāmēy chiich, amāriirēē chiich. 32 Mpō ntēēnkēt :akwaaneek kilē kiikumwooru :Iriin kilē chiich nyoo irēy ng'al choo lēē choochēē kunyoolchinii kima, ku mēēlē tāsēy taay akwaaneek kipaat ku-irēy ng'aleechoochēē, loosuuy mpō piich walak choo irēy ng'aleechoochēē.