8
1 Kiichamta :Sāwulō meeraa Siteepaano./Kēēnyāriilēy piich chēpō Kiriistō /akēēryēētooy
Nkōō pērēētuunoonēē, keenyariil kaaniisee mu Chēērusālēēm nyēpō kwōng'uut. Kiiryātoochi :piich chaa chaang' choo kiikucham Iriin kōōroo Chuuteeya ākōō *Samariya. King'ētu *:kāāyooytooyiik akwaaneek nkōō Chēērusālēēm. 2 Kiitup Siteepaano :piich walak choo kiikoonyitēy Iriin aku-uur inyeentee. 3 Kung'eetee yoonēē, kutoowu :Sāwulō kuwasaata piich chēpō *Kiriistō. Kiiwēētootēy kō aka tōkōl kunāmootēy murēn ākōō chēēpyōōsōōy aku-ir akwaaneek keerat.
Kimii :Pilip kōōroo Samariya
4 Kyaamtaata :pichoochēē /kiikuuryeeta ng'ālyoontoo Iriin nkōō wōltō aka tōkōl yoo kiipa. 5 Kuwō :Pilip ākōy kōōr nyēpō *Samariya akuwō ku-amtaata lōkōōy kilē Yēēsu ku *Meesaaya mu wōloonēē. 6 Kii nēē teer :piich ng'al choo kyoomu Pilip nkōō tukun chēpō kwōng'uut choo ki-irēy, kuyāpchi iit kukaraam kiyoo kimwoorēy. 7 Kipkaana *:toomirmiirēy chaa raacheen piich chaa chaang' akuunchōōsōōt. Kiisopyō :piich chaa chaang' choo kiimēērtooroot pōōrwēy ākōō choo kiing'woolsōōt. 8 Kipāypāyiituuy nyuun :piich tōkōl chēpō kōōroo *Samariya.
9 Kiimii :chiich nyoo /kiikikuurēē Siimnyōn nyoo kiimāng'ēy yoonēē pō *Samariya. Kiicham ku-irēy tukun chēpō kwōng'uut choo kii-ir piich chēpō *Samariya kukwōng'yō. Kiilāsēy keey kilē inyeentee ku chiich nyoo ōōw. 10 Kiitēērchi :chiich aka tōkōl chiichoonēē ng'aleechiich, choo ēēchēēn nkōō choo mēnkēēchēēn, akiimwoorēy kilē, “Ting'ēy :chiichi kaamuuka nyoo chōōnēē wōloo mii :Iriin.” 11 /Kiikuyāpchi iit ng'alēēpō chiichoonēē āmu kiikiiku-ir ng'al chēpō kwōng'uut kunyil chaa chaang'.
12 Kii nēē ran :pichoochēē ng'alēēpō Pilip paani koo-āmchi :Pilip lōkōōy choo kāroomēēn chēpō Kaa Iriin nkōō chēpō Yēēsu *Kiriistō, /keepaatiisan murēn ākōō chēēpyōōsōōy. 13 Kiiran :mpō Siimnyōn Yēēsu /akeepaatiisan. Kii nēē /kakeepaatiisan :Siimnyōn, kutuupaata Pilip wōltō aka tōkōl nyoo kiiwō. Kikwong' nkōō tukun chēpō kwōng'uut choo kiiro ku-iriisōōt.
14 Kii nēē teer *:kāāyooytooyiik nkōō Chēērusālēēm kilē kaakucham :piich chēpō *Samariya ng'ālyoontoo Iriin, kuuyooytō Pēētērō ākōō Chowaana kupa wōloonēē. 15 Kii nēē it :akwaaneek wōloonēē pō *Samariya, kusoochi piich kilē kunyōōru Toomirmiir nyoo Tiliil. Kiisa kilēē nyoonēē, 16 āmu kitoomō kuchōōnchi pichoochēē :Toomirmiir nyoo Tiliil. /Kikiikeepaatiisan akwaaneek taay nkōō kaarinaa Kiptaayaan Yēēsu kipaat. 17 Kuukonoor :Pēētērō ākōō Chowaana pichoochēē ēēruunēkwaak. Kunyōōru :pichoochēē Toomirmiir nyoo Tiliil.
18 Paani keero :Siimnyōn kilē kiitē :Iriin piich Toomirmiir nyoo Tiliil paani keekonoor *:kāāyooytooyiik ēēruunēkwaak, kuutyam kuutē kāāyooytooyiichoochēē rōōpiyō akimwoochi kilē, 19 “Ākōōnoon mpō kaamuukaani si nēē akonoor chiich aka tōkōl ēēruunēchuuch, kunyōōru Toomirmiir nyoo Tiliil.” 20 Kuwālchi :Pēētērō kilē, “Ipēt nkōō rōōpiyēēkuuk, āmu ipkootēy kilē imuukēy i-alee rōōpiyō kōōnunēywoontoo Iriin. 21 Māyāmēy keey i-ir :inyēēn pāyiisyōōni, āmu mākāroomō :kaapkootuut choo iting'ēy nkōō taayuu Iriin. 22 Kunyuun oo, walee nkōō rāyiityēēng'uung' akiisoom Iriin kunyōōwuun kaat nkōō kaapkootuut choo lēē choochēē iting'ēy nkōō mukulērtōng'uung'. 23 Āmwoorēy kilēē nyoonēē āmu ārōōtēy tuurin pō moo nyoo iting'ēy aku kiikukarteen koong' :ng'ōōki.” 24 Kimwoochi :Siimnyōn Pēētērō nkōō Chowaana kilē, “Āsoomwoon Iriin sumā-iriisyō ng'aleechu kāāmwoorēy nkōō wōloo āmii.”
25 Kii nēē kaaku-āmchi :Pēētērō ākōō Chowaana piich ng'ālyoontoo Iriin, kuwārākiisyō kuutang' Chēērusālēēm. Kimii kupēētii Chēērusālēēm, ku-amtaata lōkōōy choo kāroomēēn nkōō kēēstoon chaa chaang' chēpō kōōroo *Samariya.
Pilip ākōō chiich nyēpō Eetoopya
26 Nēē mii lētuun, kumwoochi *:malayiikayaantee aka Pilip kilē, “Wiyō kamas pō taay ākōy inyōōru aree nyoo wēērēy suur kwēēn kung'eetee Chēērusālēēm ākōy Kaasa.” 27 Kunam :Pilip paan akitoowu kuwō, nēē mii aree, kutuuyō nkōō chiitō aka nyēpō kōōroo Eetoopya. Kii chiich :chiichi nyoo ōōw nkōō kōōroo Eetoopya, akuuryoonchinii kamas pō rōōpiyō chēpō cheepyoosee aka nyoo kipāytooy kōōroonoonēē nyoo /kiikikuurēē Kantaakee. Kiichōōnēē :chiichoonēē Chēērusālēēm wōloo kiiwō kusooyēy Iriin. 28 Paani mii kuurēērēy wōli pō kōōrēēnyiin, kuyaat kitaapuu *ōōrkooyoontoo Iriin *Isaaya akusooman kimii kariinyiin nyoo kiichuutēy paraasiin.
29 Kumwoochi :Toomirmiir nyoo Tiliil Pilip kilē, “Wiyō wōloo mii :kariiniinō akiiriichi.” 30 Kuurip :Pilip ākōy yoonēē kiimii :chiichoonēē pō Eetoopya. Kiteer :Pilip chiichoonēē mii kusōōmānēy lōkōōy choo mii kitaapuu *ōōrkooyoontoo Iriin *Isaaya. Kuteep :Pilip chiichoonēē kilē, “Isōwuuy kiyoo mwoorēy ng'aleechoochēē isōōmānēy?” 31 Kuwālchi :chiichoonēē kilē, “Āsōwuuntooy ānō nēē moomii :chiich nyoo kāmwoorwoon?” Kumwoochi :chiichoonēē Pilip kulaang' karii sikutēpō nkōō inyeentee.
32 Kiimii :chiichoonēē kusōōmānēy siruut choo kiimwoorēy kilē,
“/Kiikuurēētō kilēē keecha nyoo /pākēēyēēng'ēy,
akiilēē waawaa keecha nyoo mēēritēy paani mii /kēētilēy puut.
Amaamwa kir.
33 /Kiikumuul
/amaakii-irchi man.
Moomii :chiich nyoo tākung'oloolēē koong'waang',
āmu /kiikēē-āp sopoontanyiin nkōō ng'wēny.”†
34 Kumwoochi :chiichoonēē kiipō Eetoopya Pilip kilē, “Mwoorwoon kee, mii kung'āloolēē keey :ōōrkooyoontooni ntā mii kung'āloolēē chiich aka?” 35 Kutoowuunō :Pilip siruutēchoochēē akimwoochi chiichoonēē lōkōōy choo kāroomēēn chēpō Yēēsu.
36 Paani mii :tōkōl kupēētii, ku-it yoo kiimii :pēr. Kumwoochi :chiichoonēē Pilip kilē, “Roo kee pērēēchu. Kārtooyoon :nee tamakuupaatiisanan?”a 38 Kumwoochi :chiichoonēē chiichi kiiroong'ēy karii nyoo kiichuutēy paraasiin kukany kuuryoong' karii. Kurēytō :akwaaneek tōkōl ng'wēny akupa een akuupaatiisan :Pilip chiichoonēē. 39 Paani kāwō kuchōōnō pēr :Pilip nkōō chiichoonēē kii pō Eetoopya, kunam Pilip :Toomirmiir nyoo Tiliil aku-āp. Kumaatakuurō :chiichoonēē Pilip kuureer. Kitas taay nkōō paantanyiin, kupaypay. 40 /Keepakēērōōti :Pilip yoo /kiikikuurēē Asooto. Kimanaateeree kōōroonoonēē tōkōl, ku-āmtootēy lōkōōy choo kāroomēēn ākōy ku-it Kayisareeya.