Kiimaaran Yēēsu :wēēchiikwaak
7
1 Nēē ityō, kuunēētiisyootō :Yēēsu nkōō kōōroo Kalilaaya. Kiimāmārēy :Yēēsu kimanaata nkōō Chuuteeya āmu kiimārēy :kāāntōōy chēpō Yāwuutik kuukeet inyeentee. 2 Kiikiikuriichi :tuum nyoo kiipkootēē :Yāwuutik pērēētuusyēchu kiimāng'ootēy sopootwēēn. 3 Kumwoochi nyuun Yēēsu :wēēchiikwaak kilē, “Ng'eetee yēēnyi akiiwō Chuuteeya sikuurō :tuupiikuuk tukun choo ii-irēy. 4 Nēē mārēy :chiich sikutooku, kuurookēē kung'uutu keey. Kanya nyuun kutookuunō kōōrēē :ng'aleechu pō kwōng'uut chu ii-irēy.” 5 Kiimaaran mpō Yēēsu :wēēchiikwaak. 6 Kumwoochi :Yēēsu wēēchiikwaak kilē, “Toomō ku-itu :saayitiinyuun, aku :akwaan nyuun, ku āmuukēy a-ir kir nyoo āmārēy saayit aka tōkōl. 7 Māsāsook :piich chēpō ng'wēny. Sāsoon āmu āmwoochinii akwaaneek kilē raacha :ng'ala choo irēy. 8 Apeekwaan tuumoonēē. Moowēētiiy āmu toomō ku-itu :saayitiinyuun.” 9 Kiimwa :Yēēsu ng'aleechoochēē akung'ētuunō Kalilaaya.Kukwiintoochinii :kāāntōōy chēpō Yāwuutik Yēēsu
10 Kii nēē kaakupa :wēēchiikwaak, kuuleepta keey Yēēsu kuwō tuumoonēē. 11 Paani mii :tuum kutāsēy taay, ku kiimii :kāāntōōy chēpō Yāwuutik kuwāsēy Yēēsu akutēēpootēy kilē, “Mii ānō :chiichi?” 12 Kichaamchaam :piich chaa chaang' akipō Yēēsu. Kiimwoorēy :pichoochēē walak kilē, “Karaam :chiichi.” Kumwoorēy :walak kilē, “Acha! Mēlmēēlēy piich.” 13 Moomii :chiich nyoo kiing'āloolēy kutooku, āmu kiiwārēy kāāntōōy chēpō Yāwuutik.
14 Paani mii :piich tuum kwēēn, kuwō :Yēēsu *Kōpō Iriin akutoowu kuunēētiisyō. 15 Kikwōng' kāāntōōy chēpō Yāwuutik akimwa kilē, “Kāsōwuuntō ānō chiichi tukun chaa chaang' amaasōōmānchi?” 16 Kumwoochi :Yēēsu pichoochēē kilē, “Ng'al choo ānēētook ku mēēlē ng'aleechuuch. Pkoonēē :ng'aleechu wōloo mii :Iriin nyoo kiiyookwoon. 17 Chiich nyoo kacham ku-ir kiyoo mārēy :Iriin, ku chiichoonēē nyoo sōwuuy kilē pkoonēē :ng'aleechu ānēētēy wōloo mii :Iriin, ntā wōloo āmii. 18 Piich choo lāsēy keey nkōō ng'aleekwaak, kumārēy kilē ntā /kuuloosu akwaaneek. Ku piich choo irēy tukun choo /kuuloosuunēē chiichi kiiyooku akwaaneek, ku piich choochēē chēpō man. 19 Kiikōōnook *:Muusa ng'ātuut, āmoomii :chiich mpō ākoong'o nkōō akwaan nyoo riipēy ng'ātuutēchoochēē. Āmārēy āpārchoon nee?” 20 Kuwālchi :piich Yēēsu kilē, “Kēēwōōsēē ntā nee? Ng'oo nyi mārēy kuparin?” 21-23 Kuwālchi :Yēēsu kilē, “Kiing'woonchook paani kyaa-ir :aneen kir ākoong'o nyēpō kwōng'uut nkōō pērēētuu *Sapaato. Kiimwoorwook *:Muusa āmurō wēēchiikwook, āmuriisyō mpō ntā kii pērēētuu *Sapaato. (Man kii mā *Muusa nyi kimwooru, kii paapatiinēkwook chēpō taay chu kiitoowu.) Ku nēē /kumur wēērii nkōō pērēētuu *Sapaato /simākupit ng'ātuut chēpō *Muusa oo, āmu nee nyuun soonyālāchoon paani koosoop :aneen chiich nkōō pērēētuu *Sapaato? 24 Āmoorwoochi piich kilēē wōloo ārōōtitooy. Ārwoochii nkōō oor nyēpō man.”
Kuurānēy chaa :chaang' kilē Yēēsu ku Meesaaya
25 Kiimwa :piich walak chēpō Chēērusālēēm kilē, “Mā chiichi nyi /kumārēy /kēēpārēy? 26 Nku inyeentee nyi mii kung'āloolēē taayuu piich akumāmwoorēy kir :kāāntōōyiichooch. Ara nkēt sōō man kilē *Meesaaya :chiichi? 27 Paani kāchō *Meesaaya, ku moomii :chiich nyoo nkēt wōli chōōnēē. Nku kiinkēt :achaan wōli chōōnēē chiichi.”
28 Paani mii :Yēēsu kuunēētiisyēy nkōō *Kōpō Iriin, kumwaarta kuteer :piich tōkōl kilē, “Man ānkētoon, ākoonkēt wōli āchōōnēē. Kiimoochōōnēy aneentee. Pō man :chiichi kiiyookwoon, āmoonkēt :akwaan inyeentee. 29 Ānkēt :aneen inyeentee āmu kyoochōōnēē wōli mii :inyeentee aku :inyeentee nyi kiiyookwoon.” 30 Kii nēē kaakumwa :Yēēsu kilēē nyoonēē, kuutyam :kāāntōōy kilē /keenam. Ku kiimoomii nyuun :chiich nyoo kiitiing' āmu kitoomō ku-it :saayitiinyiin. 31 Kiiran nyuun :piich chaa chaang' ng'aleechiich akimwa kilē, “Ara nēē chō sōō *:Meesaaya ku-irēy ng'al chēpō kwōng'uut kusiir chu irēy :chiichi?”
Kuutyāmēy :Parisaay kunam Yēēsu
32 Kii nēē teer *:Parisaay kichoomchoomēy :piich akipō Yēēsu, kutuuyō ākōō *tisiik choo ēēchēēn akuuyooytō askari chēpō *Kōpō Iriin kupa kunam Yēēsu. 33 Kitas taay :Yēēsu kumwa kilē, “Tākēēmii tōkōl nkōō pērēētuus choo ng'ērin kipaat, nēē ityō, āwō wōloo mii :nyi kiiyookwoon. 34 Āwāsoon, aku moonyōōrwoon, āmu moomuukēy apkaan wōli āwēētii.” 35 Kimwoochi keey :kāāntōōy chēpō Yāwuutik kilē, “Ara mārēy :chiichi kuwō ānō simākunyōōru? Mārēy kuwō kōōrootinēēchu kiimāng'aata :piichooch walak sikuuneet piipō wōliinēē? 36 Kamwa kilē /kuwāsēy inyeentee aku /mākunyōōruuy, akilē mākuumuukēy keepa wōli wēētii. Mwoorēy nee :chiichi?”
Pēr chēpō sopoon
37 Nēē mii pērēētuu nyēpō lēt nyoo kiiwoontoorēē tuumoonēē, kuuryoong' :Yēēsu akimwa kuteer :chiich aka tōkōl kilē, “Chiich aka tōkōl nyoo āmēy :maral, kuchō wōli āmii sikura pēr. 38 Ku nyoo keeranan kurōōtuunēē :pēr chēpō sopoon kilēē paani mwoorēy :siruut.” 39 Kimwoorēy :Yēēsu kilēē nyoonēē ku kiing'uutuuy Toomirmiir nyoo Tiliil nyoo kii nyōōruuy :chiich aka tōkōl nyoo kātiirō keey inyeentee. Kiitoomō nyuun paanoonēē /kēēyooku Toomirmiir nyoo Tiliil āmu kiitoomō kuutōrōōr :Iriin Yēēsu.
Kichuunchuunsōōt :piich kilē Yēēsu ku ng'oo
40 Paani kateer :piich ng'aleechoochēē kiimwoorēy :Yēēsu, kumwa :pichoochēē walak kilē, “Man *Ōōrkooyoontoo Iriin :chiichi.” 41 Kumwa :walak kilē, “*Meesaaya :chiichi.” Kilē :walak, “Acha! Mēēmuukēē kuchōōnō *:Meesaaya Kalilaaya. 42 Mwoorēy :siruut chēpō Iriin kilē chōōnēē *:Meesaaya kōpō Tāwuti nkōō Peeteleem wōli kiimāng'ēy :Tāwuti.” 43 Kuchuunchuunnyō nyuun :pichoochēē akipō Yēēsu. 44 Kiimārēy :piich walak kunam Yēēsu, aku moomii :chiich nyuun nyoo kiityam kunam.
Kiyēētēy :Nikōtēēmō Yēēsu nkōō taayuu Parisaay
45 Kii nēē wārākiisyō :askariichoochēē pō *Kōpō Iriin wōli kiimii *:tisiik choo ēēchēēn ākōō *Parisaay, kuteep *:Parisaay askariichoochēē kilē, “Āmu nee simaanam Yēēsu akaamutu kuchō yi?” 46 Kuwālchi :askariichoochēē kilē, “Moomii :chiich nyoo kiikung'alaal pērēētuu aka kilēē :chiichi.” 47 Kuteep *:Parisaay askariichoochēē kilē, “Āmārēy amwaara kilē /kaakēēmēlmēēlook mpō? 48 Ānkēt :akwaan kāāntōōyiin aka tōkōl nyoo kiikuuran ng'aleechu mwoorēy :chiichoonēē, ntā ku *Pārisooyiin? 49 Pānootēēn :pichu mēēnkēt ng'ātuut chēpō *Muusa.” 50 Nkōō kāāntōōyiichoochēē, ku kiimii Nikōtēēmō nyoo kiikaakuwō kuuro Yēēsu. Kumwoochi :Nikōtēēmō kāāntōōyiichoochēē kilē, 51 “Kutuup keey nkōō ng'ātuutēchooch, moomii :chiich nyoo kuusuumchinii ng'al kutoomō /keeteer kiyoo mwoorēy :chiichoonēē, /ākēēsōwu kiyoo ka-ir.” 52 Kuwālchi :pichoochēē Nikōtēēmō kilē, “Ichōōnēē mpō Kalilaaya? Wiyō soomana siruut chēpō Iriin, nēē meeroo kilē moomii *:ōōrkooyoontō nyoo muukēy kuchōōnō Kalilaaya.”
[Moomii :siruutēchu pō (7:53—8:11) siruut chaa chaang' chēpō kēny]
53 Nēē mii lētuun, kuwaraka :chiich aka tōkōl katanyiin.