Yēēsu ākōō cheepyooso nyēpō Samariya
4
1 Nēē mii lētuun kuteer *:Parisaay kilē kiimii :piich kupēētii wōloo mii Yēēsu akuupootiisānēy chaa chaang' kusiir Chowaana, kunyāliisyō. 2 Kii mā Yēēsu man nyi kiipāātiisānēy piich. Kii :kiineetanichiich. 3 Kii nēē teer :Yēēsu kilē kiinyāliisyō *:Parisaay, kung'eetee Chuuteeya akuwaraka Kalilaaya. 4 Kii nēē mii kuwārākēē, kuwō araa *Samariya kilēē wōli kiikiikuchēptō :Iriin.5 Kumii *Samariya, ku-it māng'oot aka nyoo /kiikikuurēē Sikar nyoo kiilēēkitēē par nyoo kiitēnii :Chaakōp wēēriinyiin Chōōsēp. 6 Kiimii kēpēnoo pēr nyēpō Chaakōp yoonēē. Paani ka-it :Yēēsu kēpēnoonoonēē, kutēpō ng'wēny āmu kiikiikuchaas. Kii saayit taman nkōō ārēēny nyēpō kosoliny ku-itēy :Yēēsu yoonēē.a
7 Kuchō :cheepyoosee aka nyēpō *Samariya kuram pēr. Kumwoochi :Yēēsu cheepyoosoonoonēē kilē, “Kōōnoon pērēēchoochēē ara.” 8 Kiikiikupa :kiineetanichiich kipa ku-al āmiisyō nkōō māng'ātoonoonēē pō *Samariya. 9 Kuwālchi :cheepyoosoonoonēē Yēēsu kilē, “Inyēēn Yāwuutyoon ku aneen cheepsamaryaan. Muukēē kilē nee isoom ākōōnin pēr ree?” Kiimwa :cheepyoosoonoonēē kilēē nyoonēē āmu kiimārāmtooy :Yāwuutik ākōō piich chēpō *Samariya tukun. 10 Kuwālchi :Yēēsu kilē, “Ntā kēēnkēt kir nyoo muukēy kukōōnu :Iriin, akiinkēt chiichi mii kusoomiin pēr, tākēēsoomēy kukōōnin pēr choo kōōnuuy *sopoon nyēpō ākōy.” 11 Kumwoochi :cheepyoosoonoonēē Yēēsu kilē, “Nyoo koonyitoot, nku mēēting'ēy kiyoo kurāmuunēē pērēēk akukoor kēpēnēē. Inyōōrchinii ānō pērēēchoochēē kōōnuuy sopoon? 12 Paapeenyoon Chaakōp nyi kiikōōnēēch kēpēnooni pō pēr. Kiirēēy :inyeentee, ākōō laakōōchiich kipootō chaakiichiich pērēēpō kēpēnooni. Imārēy āpō keey im kilē i-ōōw kusiir inyeentee?” 13 Kuwālchi :Yēēsu cheepyoosoonoonēē kilē, “Chiich aka tōkōl nyoo rēēy pēr chēpō kēpēnooni kutāku-āmēy maral. 14 Ku :piich tōkōl choo rēēy pēr choo kootaa, ku maaku-āmēy :maral kuureer. Āmu karkeey pērēēchoochēē nkōō pēr choo koosuuy choo mātēēng'ēy akuutēnii :pērēēchoochēē pichoochēē *sopoon nyēpō ākōy.” 15 Kumwoochi :cheepyoosoonoonēē Yēēsu kilē, “Nyoo koonyitoot, kaykay ikōōnoon pērēēchoochēē simaaku-āmoon :maral kuureer, amātoochōōnēy kēpēnooni aram pēr.”
16 Kumwoochi :Yēēsu cheepyoosoonoonēē kilē, “Wiyō kuurō saantēēng'uung' a-iichōōn yi.” 17 Kuwālchi :cheepyoosoonoonēē Yēēsu kilē, “Mooting'ēy saan.” Kuwālchi :Yēēsu kilē, “Iting'ēy man imwaa kilē mēēting'ēy saan. 18 Kiiku-āpin :murēn choo lēē muut, aku chiichi āmāng'iisyēy tōkōl paannyēēnyi ku mā saantēēng'uung'. Pō man :kiyoo kēēmwoorwoon.”
19 Kumwoochi :cheepyoosoonoonēē Yēēsu kilē, “Kaaroo kilē inyēēn *ōōrkooyoon. 20 Kiiloosuuy :paapatiināchooch Iriin nkōō tulwooni, ku akwaan Yāwuutik āmwoorēy kilē Chēērusālēēm nyi rookēē /kēēloosuunēē Iriin.” 21 Kimwoochi :Yēēsu cheepyoosoonoonoonēē kilē, “Ranaan kilē mii :pērēētuu nyoo chōōnēy nyoo maakuuloosuunēē :piich Iriin tulwooni ntā ku Chēērusālēēm. 22 Āloosuukwaan piich chēpō *Samariya kir nyoo moonkēt. Kēēloosuuy :achaan nyuun Yāwuutik kir nyoo kiinkēt āmu chōōnēē :sāruunāt wōloo mii :Yāwuutik. 23 Mii :pērēētuu nyoo chōōnēy akaaku-itu mpō pērēētuunoonēē yēēnyi, yoo mārēy kuuloosuuy :piich chēpō man Paapa nkōō Toomirmiir ākōō man. Mārēy :Iriin piich choo loosuuy inyeentee kilēē nyoonēē. 24 Iriin ku toomirmiir, kumārēy nyuun :piich choo loosuuy Iriin kuuloosu nkōō Toomirmiir ākōō man.” 25 Kumwa :cheepyoosoonoonēē kilē, “Ānkēt aneen kilē chōōnēy *:Meesaaya. Paani kāchō, kumwoorwēēch kir aka tōkōl.” 26 Kuwālchi :Yēēsu kilē, “Nku aneen nyoonēē āmii āng'ālooluun.”
27 Ku-itu :kiineetanipō Yēēsu paanoonēē. Kii nēē itu, kukwōng'yō kunyōōru Yēēsu mii kung'āloolēy nkōō cheepyooso. Moomii chiich :nyoo kiiteep cheepyoosoonoonēē kilē, “Imārēy nee?” ntā kuteep Yēēsu kilē, “Āmu nee siing'alaala nkōō cheepyoosooni?” 28 Kumētō :cheepyoosoonoonēē tērēētaa pēr akuwaraka wōli kiimāng'ēy kuwō kumwoochi piich kilē, 29 “Pichu, apkaana apaaroota chiich nyoo kāmwoorwoon kir aka tōkōl nyoo kyaa-ir aneen! Muukēy kilēku *Meesaaya?” 30 Kupeera :piichoochēē māng'ootonoonēē kipa kuurō :Yēēsu.
31 Kimii ng'aleechoochēē kutāsēy taay, ku kiimii :kiineetanik kusoorsoorēy Yēēsu kilē, “Koonēētiin, kaykay āmiisyēē.” 32 Kumwoochi :Yēēsu kilē, “Āting'ēy āmiisyō nyoo moonkēt :akwaan.” 33 Kuteep keey :kiineetanichoochēē kilē, “Ara mii :chiich sōō nyoo kaaku-āpchi āmiisyō?” 34 Kumwoochi :Yēēsu kilē, “Āmiisyeenyuun ku a-ir makat nyēpō chiichi kiiyookwoon akaawaang' pāyiisyōōni kiikōōnān a-ir. 35 Moomwoorēy akwaan kilē, ‘Kāng'ētu :āroo ang'wan /sikēēkāsiisyō’? Āmwoorwook nyuun kilē, aroo kee paraatineechu. Kiikurēēliit nyoo kiikuyam /kēēkāsiisyō. 36 Mii mpō paannyēēnyi /kēētēnii kāsiin paanteenyiin aku pareechu kāsēy ku piich choo kacham kunyōōru *sopoon nyēpō ākōy. Pāypāyiituuy kilē nee kēny :nyi tōōtiisyēy ākōō nyi kāsiisyēy! 37 Man ng'ālyoontooni /kumwoorēy kilē, ‘Tōōtēy :aka, kukas :aka.’ 38 Kāāyooytook apee akasa par choo kiimaapal. Kiipal :piich walak apaakas :akwaan.”
39 Kiiran :piich chaa chaang' chēpō *Samariya Yēēsu, āmu kiimwa :cheepyoosoonoonēē kilē, “Kiimwoorwoon chiichi kir aka tōkōl nyoo kyaa-ir aneen.” 40 Paani kapa :pichoochēē pō *Samariya yoonēē kiimii :Yēēsu, kusaarsaar Yēēsu kutēpō nkōō akwaaneek. Kucham :Yēēsu akutēpō pērēētuus ārēēny. 41 Kuuran :piich chaa chaang' chēpō *Samariya Yēēsu akipō ng'aleechu kiimwa. 42 Kimwoochi :pichoochēē cheepyoosoonoonēē kilē, “Maakuuran :achaan Yēēsu āmu kēēmwoorwēēch. Kākuuran āmu kakeeteer :achaan āchoonēēch kiyoo kamwa. Kaakēēsōwu kilē inyeentee man ku *Meesaaya nyoo sāruuy piich tōkōl.”
/Kuusoopēy :Yēēsu wēēroo kāāntōōyiin
43 Kii nēē kaakutēpō :Yēēsu wōloonēē pērēētuus ārēēny, kung'eetee yoonēē akuwō Kalilaaya. 44 (Kiikiikumwooru :Yēēsu kilē, mēēkoonyitēy *ōōrkooyoontoo Iriin :piich chēpō kōōrēēnyiin.) 45 Paani ka-it :Yēēsu Kalilaaya, kutaak :piich chēpō wōloonēē. Kiitaak :pichoochēē kilēē nyoonēē āmu paani kipēētii ku-āmēy *Pasaka nkōō Chēērusālēēm, ku kiikiikuurō :pichoochēē kir nyoo kii-ir :Yēēsu nkōō wōloonēē.
46 Kuwaraka :Yēēsu Kaana nyoo mii kōōroo Kalilaaya yi kiiwālēē pēr kilēku *tiipaay. Kiimii :kāāntōōyiintēē aka Kaaparnaam nyoo kiiting'ēy wēēriinyiin nyoo kiimnyaanaat. 47 Kii nēē teer :kāāntōōyiintoonoonēē kilē kaakuchōōnō :Yēēsu Chuuteeya kuchō Kalilaaya, kuwō wōli kiimii :Yēēsu akusaarsaar kuwō Kaaparnaam kuusoopchi wēēriinyiin nyoo kiimnyaanaat akiilēēkit kima. 48 Kuteep :Yēēsu kilē, “Moorānoon sōō ākōy /kee-ir kir nyēpō kwōng'uut?” 49 Kuwālchi :kāāntōōyiintoonoonēē Yēēsu kilē, “Nyoo koonyitoot, chōōnō keepee kutoomō kima :laakwee.” 50 Kuwālchi :Yēēsu kilē, “Wiyēēnyēēn, sopēy :wēēriing'uung'.” Kuuran :chiichoonēē kiyi kiimwoochi :Yēēsu akuwō.
51 Kii nēē mii :kāāntōōyiintoonoonēē aree kuwēētii, kutuuyēērō kipāyitiinēchiich. Kimwoochi :pichoochēē kilē, “Sopoot wēēriing'uung'.” 52 Kuteep :kāāntōōyiintoonoonēē pichoochēē kilē, “Kung'eetee āyu yi kākāykāyiituuy :laakwee?” Kēēmwoochi kilē, “Kakaykayiit kung'eetee āmātuun saayit ākoong'o nyēpō kosoliny.”b 53 Kuupkaat :apootaa wēēroonēē kilē kii saayitiinoonēē nyi kiimwoochinii :Yēēsu inyeentee kilē “Sāpēy :wēēriing'uung'.” Kuuran :chiichoonēē nkōō katanyiin tōkōl Yēēsu. 54 Kiipō ārēēny kwōng'uutyoonoonēē kii-ir :Yēēsu nkōō Kalilaaya kung'eetee kuwarakeera Chuuteeya.