^1-2 ཡེ་ཤུ་གིས་ག་ཅི་མཛད་ཅི་ག་དང་ ག་ཅི་སྟོན་གནང་ཡི་ག་ དེ་ལས་ཁོ་ཡར་ཞིང་ཁམས་ལུ་མ་བསྣམ་པའི་ཉིནམ་ཚུན་ཚོད་ ཁོ་རང་གིས་བཙག་འཐུ་མཛད་གནང་མིའི་སྐུ་ཚབ་དེ་ཚུ་ལུ་ དམ་པའི་ཐུགས་ཉིད་ལས་སྦེ་ ག་ཅི་རང་བཀའ་གནང་ཡི་ག་ འདི་ཚུ་གི་སྐོར་ལས་ ནཱ་ ཐེའོ་ཕི་ལུས་ཀྱི་དོན་ལུ་ ང་གིས་ དེབ་དང་པོ་དེ་ནང་བྲིས་ཏེ་ཡོད། ³ ཡེ་ཤུ་སྡུག་བསྔལ་བཞེས་པའི་ཤུལ་ལས་ ཞག་བཞི་བཅུ་ཚུན་ཚོད་ ཁོ་སྐུ་ཚབ་ཚུ་སྡོད་ས་ལུ་བྱོན་ཏེ་ ཁོ་སྐུ་གསོན་པོ་སྦེ་རང་ཡོད་ཟེར་ ཁོང་ཆ་ཁྱབ་ལུ་ངོ་རྟགས་ལེ་ཤ་ ཁོ་རང་གིས་མཛད་གནངམ་མ་ཚད་ དཀོན་མཆོག་གི་རྒྱལ་སྲིད་ཀྱི་སྐོར་ལས་གསུངས་ནུག ⁴ སྐུ་ཚབ་ཚུ་དང་མཉམ་གཅིག་བཞུགས་པའི་བསྒང་ ཁོ་གིས་ཁོང་ལུ་རྒྱལ་ས་ ཡེ་རུ་ཤ་ལེམ་ལས་ག་ཏེ་ཡང་མ་སོང་ དེ་འབདཝ་ད་ ང་གིས་སླབ་དོཝ་བཟུམ་སྦེ་ ཡབ་ཀྱིས་གནང་ནི་ཟེར་ ཁས་བླངས་བཞེས་མི་གསོལ་རས་འདི་ལུ་སྒུག་སྡོད། ⁵ ག་ཅི་སྨོ་ཟེར་བ་ཅིན་ ཡོ་ཧ་ནཱན་གྱིས་ ཆུའི་ཁྲུས་གསོལ་བྱིན་ཡི་ དེ་འབདཝ་ད་ ཉིནམ་དག་པ་གཅིག་གི་ཤུལ་ལས་ ཁྱེད་ཆ་ཁྱབ་ཀྱིས་ དམ་པའི་ཐུགས་ཉིད་ལས་ཁྲུས་གསོལ་ཐོབ་ནི་ཨིན་ཟེར་བཀའ་གནང་ནུག

⁶ ཁོང་ག་ར་མཉམ་གཅིག་འཛོམས་པའི་སྐབས་ལུ་ སྐུ་ཚབ་ཚུ་གིས་ཡེ་ཤུ་ལུ་ གཙོ་བོ་ལགས་ ད་རེས་ནངས་པ་གི་དུས་ཚོད་ལུ་རང་ ཨཱིས་ར་ཨཱེལ་གྱི་རྒྱལ་ཁབ་འདི་ ད་རུང་ལོག་སྟེ་ཁོང་རང་ལུ་གནང་ནི་ཨིན་ན་ཟེར་ཞུ་ནུག ⁷ དེ་ལས་ཡེ་ཤུ་གིས་ ངེ་གི་ཡབ་ཀྱི་དབང་ཚད་ཀྱི་འོག་ལུ་བཞག་མི་ དུས་ཚོད་དང་དུས་སྐབས་ཤེས་དགོཔ་དང་ འཚོལ་དགོཔ་འདི་ ཁྱེད་ཆ་ཁྱབ་ཀྱི་ལཱ་མེན། ⁸ དམ་པའི་ཐུགས་ཉིད་ཁྱེད་གུ་འབྱོནམ་ད་ ཁྱེད་ཆ་ཁྱབ་ཀྱིས་སྟོབས་ཤུགས་དང་དབང་ཐོབ་ནི་ཨིན་ དེ་ལས་རྒྱལ་ས་ ཡེ་རུ་ཤ་ལེམ་དང་ ལུང་ཕྱོགས་ ཡུ་དེ་ཡ་ ལུང་ཕྱོགས་ ས་མ་རི་ཡ་ དེ་ལས་འཛམ་གླིང་གི་མཐའན་མཇུག་ཚུན་ཚོད་ ཁྱེད་ཆ་ཁྱབ་ངེ་གི་འཛོམ་དཔང་ བཤད་མི་སྦེ་འབྱུང་ནི་ཨིན་ཟེར་གསུངས་ནུག ⁹ ཁོ་གིས་འདི་གསུངས་ཚར་བའི་ཤུལ་ལས་ སྐུ་ཚབ་ཚུ་གིས་ཁོ་ལུ་ མཇལ་སྡོད་པའི་བར་ན་རང་ ཁོ་ཡར་ཞིང་ཁམས་ལུ་འཐུ་བསྣམས་ནུག་ དེ་ལས་ཁོང་གི་མིག་ཏོ་ཁ་རང་ ས་སྨུག་ནང་ཡལ་སོང་ནུག ¹⁰ ཁོ་ཡར་ཞིང་ཁམས་ལུ་འབྱོན་ས་ཁོང་གིས་མཇལ་སྡོདཔ་ད་ དེ་འཕྲོ་ལས་བགོ་ལ་དཀརཔོ་གྱོན་མིའི་མི་གཉིས་ཀྱིས་ ཁོང་གི་སྦོ་ལོགས་ཁར་ལོང་སྡོད་དེ། ¹¹ ཁོང་གཉིས་ཀྱིས་ཁོང་ལུ་ དབའེ་ ག་ལི་ལི་གི་མི་འདི་ཚུ་ ཁྱེད་ཆ་ཁྱབ་ག་ཅི་འབད་རང་ ནཱ་ལུ་ལོང་སྟེ་བལྟ་སྡོདཔ་སྨོ་ ཨ་ནི་ད་ལྟོ་ཁྱེད་ཀྱི་གྲལ་ཁ་ལས་ ཡར་ཞིང་ཁམས་ལུ་འཐུ་བསྣམས་མི་ཡེ་ཤུ་འདི་ ད་ལྟོ་ཁྱེད་ཀྱིས་མཐོང་སར་འབྱོན་དོཝ་བཟུམ་སྦེ་ ད་རུང་ལོག་སྟེ་མར་འབྱོན་ནི་ཨིན་ཟེར་སླབ་ནུག།

¹² དེ་ལས་ཁོང་ཆ་ཁྱབ་ ཨ་རུ་ར་ཤིང་ཟེར་མིའི་སྒང་ལས་མར་ལོག་སྟེ་ ཡེ་རུ་ཤ་ལེམ་ལུ་བྱོན་ནུག་ ཡེ་རུ་ཤ་ལེམ་སྦོ་ལོགས་ཁར་འབད་ནི་དེ་གིས་ ངལ་འཚོ་བའི་ཉིནམ་ལུ་འགྱོ་ཆོག་པའི་རིང་ཚད་བཟུམ་ཅིག་རང་ཨིན་མས། ¹³ ཕར་ཁྲོམ་ལུ་ལྷོད་ཞིནམ་ལས་ ཧེ་མ་ཁོང་རང་བཞུགས་སའི་ ཡར་ཐོག་ཁའི་ཁང་མིག་ནང་སོང་ནུག་ འདི་ཁར་ལུ་སྡོད་མི་ པེ་ཏྲོ་དང་ ཡོ་ཧ་ནཱན་ ཡ་ཀོབ་ ཨཱན་དྲུ་ ཕི་ལིབ་ ཐོ་མཱས་ བཱར་ཐོ་ལོ་མིའུ་ མེ་ཐིའུ་ ཨཱལ་ཕེ་ཨུས་ཀྱི་བུ་ ཡ་ཀོབ་ སྲིད་བྱུས་ཀྱི་སྡེ་ཚན་ལས་ཨིན་མི་ སི་མཱོན་ ཡ་ཀོབ་ཀྱི་བུ་ ཡུ་དཱས་དེ་ཚུ་ཨིན་མས། ¹⁴ ཁོང་ཆ་ཁྱབ་དང་གཅིག་ཁར་ ཨམ་སྲུ་གཞན་ཚུ་དང་ དེ་ལས་ཡེ་ཤུ་གི་ཡུམ་ མཱིར་ཡམ་དང་ ཡེ་ཤུ་གི་ནུ་གཅུང་ཚུ་ རྟག་བུ་རང་འཛོམས་ཏེ་སེམས་གཅིག་སྦེ་མཐུན་ སྨོན་ལམ་བཏབ་སྡོད་ནུག ¹⁵ དུས་ཚོད་འདི་གི་སྐབས་ལུ་ དདཔ་ཅན་བརྒྱ་དང་ཉི་ཤུ་དེ་ཅིག་འཛོམས་སྡོད་པའི་ཉིན་མ་ལུ་ པེ་ཏྲོ་གིས་ཡར་ལོང་སྟེ་ དེ་སྦེ་སླབ་ནུག ¹⁶ དབའེ་སྤུན་ཆ་ཚུ་ ཡེ་ཤུ་བཟུང་མི་ཚུ་ལུ་ ལམ་སྟོན་ཏེ་འཁྱིད་འོང་མི་ ཡུ་དཱས་ ཨཱིས་ཀ་རི་ཨཱོད་ཀྱི་སྐོར་ལས་ དམ་པའི་ཐུགས་ཉིད་ཀྱིས་ ཧེ་མ་ལས་རྒྱལཔོ་ ད་བིད་ཀྱི་ཞལ་ལས་ གསུང་རབ་ནང་ལུ་བྲིས་དོཝ་བཟུམ་སྦེ་ ག་ར་བྱུང་སྟེ་འོང་ཡི། ¹⁷ ཡུ་དཱས་ ཨཱིས་ཀ་རི་ཨཱོད་འདི་ང་བཅས་དང་མཉམ་གཅིག་འདྲན་འདྲ་གཡོག་བརྐྱབས་ཏེ་སྡོད་མི་གཅིག་ཨིན། ¹⁸ མི་འདི་གིས་ ཁོ་རའི་ལཱ་ངན་པའི་གླ་ཆ་དེ་གིས་ས་ཞིང་གཅིག་ཉོ་ཡི་ དེ་ནང་ལུ་ཁོ་མཐོ་ས་ལས་དམའ་ས་མཆོང་སྟེ་ གཟུགས་ཀྱི་ཡན་ལག་ག་ར་གཏོར་ཏེ་ ནང་ཁྲོལ་ཕྱི་ཁར་ཐོན་ཏེ་ཤི་སོང་ཡི། ¹⁹ ཡེ་རུ་ཤ་ལེམ་ནང་སྡོད་མི་ག་ར་གིས་ལོ་རྒྱུས་དེ་གོཝ་ད་ ཁོང་གི་ཁ་ནང་ལུ་ས་ཆ་དེ་གི་མིང་ ཨ་ཀཱེལ་ད་མ་ཟེར་བཏགས་ནུག་ འདི་གི་དོན་དག་དེ་ ཁྲག་གི་ཞིང་ཟེར་སླབ་ཨིན་མས། ²⁰ མགུར་མ་ནང་།