Pe yaa Ninive ca woolo pe tɔngɔ
3
1 Mboro ca ŋga ma yɛn ma yin legboleele pe ni,jɔlɔgɔ yɛn ma wogo!
Ma yɛn ma yin yagbogowo naa lewɛlɛwɛ kapyere pyew ti ni.
Ma maa yaara koli kɔnlɔ fu.
2 Gbatooro tinmɛ pi yɛn na yinrigi,
naa malaga gbɔnwotoroye pe ŋgeere tinmɛ pi ni,
naa shɔnye pe yenjoro tinmɛ pi ni.
Malaga gbɔnwotoroye pe yɛn na fee na yeni.
3 Shɔn lugufɛnnɛ pe yɛn na gbinri pe shɔnye pe ni,
tokobiye pe yɛn na kasɔn kɔɔn,
njaanra ti yɛn na yɛngɛlɛ.
Mbele pè gbo pè lɛgɛ, gboolo pè wo pe yɛɛ na.
Gboolo pe yɔn ki se ya jɛn,
leele paa kunrugu gboolo pe na na tuun.
4 Ko ki ni fuun ŋga ko pye Ninive* ca ŋga ki yɛn paa nanjaa yɛn ki nanjara to kala na;
ki tiyɔnwɔ gbɔɔ naa ki lekara jɛnndorogo ki kala na,
kìla cɛngɛlɛ ke pye kulolo ki nanjara ti ni,
ma tara woolo pe tile ki lekara ti ni.
5 Yawe Yɛnŋɛlɛ na yawa pi ni fuun fɔ lì yo fɔ:
«Mi yaa yiri ma kɔrɔgɔ.
Mi yaa ma deritɔnlɔgɔ ki yirige ma na fɔ sa gbɔn wa ma yɛgɛ sɔgɔwɔ.
Mi yaa ma witiwaga ki naga cɛngɛlɛ sanŋgala ke na,
mi yaa ma fɛrɛ ti naga wunluwɔ tara sannda ti na.
6 Mi yaa kayangara wa ma na,
mbe fɛrɛ wa ma na,
mbɔɔn pye weleyaraga.
7 Kona lere o lere kɔɔn yan, wi yaa fe mbe lali ma ni,
mbaa yuun fɔ: ‹E, Ninive ca kì tɔngɔ pew!›
Ambɔ wi yaa ki yinriwɛ ta?
Ambɔ mi yaa ta wi Ninive ca fɛnnɛ pe kotogo ki sogo pe na?»
Ninive ca jɔlɔgɔ konaa Tɛbu ca
8 Mboro Ninive ca, ma mbɔnrɔ Tɛbu† ca ki na wi le?
Ko ŋga kìla pye ma kan wa Nili gbaan njere shyɛn ti sɔgɔwɔ,
a tɔnmɔ pìgi maga we.
Tɔnmɔ pìla ki go sige yaraga pyew ki na.
Tɔnmɔ pìla ki maga paa mbogo yɛn.
9 Etiyopi* tara naa Ezhipiti tara to tìla pye Tɛbu ca ki fanŋga ki tasaga ye,
ki fanŋga ŋga kɔsaga woro ki na.
Puti tara fɛnnɛ naa Libi tara fɛnnɛ poro pàa pye ki sagafɛnnɛ.
10 Konaa ki ni fuun, Tɛbu ca fɛnnɛ pàa pe koli ma kari pe ni tara ta yɛgɛ ni,
pàa pe koli ma kari pe ni kulowo.
Pàa pe piile tumɔmbɔlɔ pe gbɔn ma pe tɔngɔlɔ wa ca nawa koŋgolo ke lagapyew ki ni.
Pe juguye pàa pɛtɛ gbɔn ma ca ki yɛkeele pe yɛɛlɛ pe yɛɛ na†,
pàa yɔngɔwɔ le ca ki legbɔɔlɔ pe ni fuun pe na.
11 Yoro fun Ninive ca woolo, jɔlɔgɔ ki yaa kaa ye yɛgɛ kanŋgi paa sinmɛ ma kaa lere yigi.
Ye yaa ka lara.
Yoro fun, ye yaa kaa larasaga jaa mbe lara ye juguye pe na.
Ninive ca ki fanŋga kì kɔ pew
12 Ye malaga sigecara ti yɛn paa figiye* tire yɛn,
nda ti pire koŋgbannda tì pe.
Na paga ti yangara jɛnri,
ti pire ti ma toori wa ti kafɛnnɛ pe yɔn.
13 Ye wele, ye maliŋgbɔɔnlɔ pe yɛn paa jɛɛlɛ yɛn ye sɔgɔwɔ.
Ye tara cara ti yeyɔnrɔ kɔɔrɔ ti yɛn ma yɛngɛlɛ pew ye juguye pe kan.
Kasɔn yaa ye yeyɔnrɔ kɔɔrɔ ti sɔgɔyaara ti sogo.
14 Ye tɔnmɔ lɛgɛrɛ ko ye tɛgɛ ye yɛɛ kan, katugu pe yaa maliŋgbɔɔnlɔ cɛnsaga kan ye ca ki tanla mbege yɔn tɔn.
Ye ye cara ti malaga sigemboro ti gbegele jɛŋgɛ.
Ye joro ti piri yeri tanga,
ye tofa kɔnyaara ti gbɛgɛlɛ.
15 Kasɔn yaa ka ye sogo wa ki laga ki na.
Tokobi wi yaa ka ye gbo mbe ye kɔ,
mbe ye tɔngɔ paa gbatɔ* ma kaa yarilire ka we.
Ninive ca kì koro waga
Ninive ca woolo, ye mbe ya lɛgɛ paa gbatɔ yɛn!
Ye mbe ya lɛgɛ paa kambɛɛrɛ yɛn!
16 Yè ye safari wafɛnnɛ pe lɛgɛ ma wɛ wɔnŋgɔlɔ ke na.
Ɛɛn fɔ, pe yaa ka kari paa gbatɔ ma kaa yiri sire na ma kari we.
17 Ye kundigile pè lɛgɛ paa kambɛɛrɛ yɛn.
Ye yɛkeele pè lɛgɛ paa gbatɔ lɛgɛrɛ yɛn,
ŋa wi ma saa cɛn yuguyugu na were sanga ni.
Na yɔnlɔ ki ka ka yiri, wi mɛɛ yiri na kee, lere naa karisaga jɛn.
18 E, Asiri tara wunlunaŋa, ma tara ti yɛgɛ sinvɛnnɛ pe yɛn na pe wɔnlɔwɔ puŋgo woo pi wɔnlɔ,
ma maliŋgbɔɔnlɔ teele pè koro ma sinlɛ tɛndɛndɛ.
Ma woolo pè jaraga wa yanwira ti na,
lere woro wa mbe pe gbogolo.
19 Wɛrɛ woro wa mbɔɔn jɔlɔgɔ ki kɔ,
ma wɛlɛgɛsara ti yaa ma gbo.
Lere o lere kɔɔn kala li sɛnrɛ logo, wi yaa la kɛndagala gbɔɔn ma jɔlɔgɔ ki kala na.
Ambɔ wi koro ma tipewe mba pi yɛn kɔsaga fu, pi sila pye na gbɔɔn wi na?