Yɛnŋɛlɛ yɔn sɛnrɛ yofɔ
7
1 E! Jɔlɔgɔ yɛn na wogo,katugu mi yɛn paa lere wa yɛn, ŋa wì kari sa ɛrɛzɛn* pire cɔ ti cɔsanga ni,
ɛrɛzɛn pire tɔnmɔ pi wɔŋgɔlɔ,
nakoma paa ŋa wi kari sa figiye* tire san,
ɛɛn fɔ ali ɛrɛzɛn shashaga nuŋgba mi si ko ta wa mbe ka.
Figiye pire fɔnndɔ kpɛ sila ta wa, nda ti la ma pye na na.
2 Lesinmbele pè kɔ ma wɔ laga tara ti ni;
kaselege yofɔ woro sɛnwee piile pe ni naa.
Legbogo ko pe ni fuun pe yɛn na pɛɛlɛ mbaa piin;
pe ni fuun nuŋgba nuŋgba pe yɛn na pɛŋgɛlɛ nii pe yɛɛ na.
3 Pe kɛyɛn yì wege kapege pyege ki na.
Kundigile pe maa yarikanra jaa pe tunŋgo ki na.
Kiti kɔnfɛnnɛ pe maa kiti wi kɔɔn tɔnli na.
Ŋga legbɔɔlɔ pe maa jaa, pe maa ki yuun kpeŋgbeleŋgbe lere pyew wi yɛgɛ na.
Pe ni fuun pe ma yɔn wa nuŋgba na kapege ki piin.
4 Ŋa wi yɛn jɛnŋɛ pe ni fuun na, wo yɛn paa wuuro yɛn.
Ŋa wi yɛn sinŋɛ pe ni fuun na, wo yɛn paa wuuro yuguyugu yɛn.
Jɔlɔgɔ pilige ŋga ye kɔrɔsiri pyefɛnnɛ† pàa ki sɛnrɛ yo ye kan,
ki pilige ŋga pe yaa jɔlɔgɔ wa ye na we,
kì yɔngɔ tɔɔn.
Ki kala na, ye jatere wì piri ye na.
5 Maga kɔɔn jigi wi taga ma wɔnlɔ wi na;
maga ka taga ma wɔnlɔ ŋgbarawa wi na.
Ali ma jɔ jate ŋa wi maa sinlɛlɛ ma tanla,
ma yɔn ki yingiwɛ jɛn wi ni.
6 Katugu pinambyɔ wi maa wi to wi tifaga,
sumborombyɔ wi ma yiri wi nɔ wi kɔrɔgɔ,
pijɔ wi ma yiri wi najɔ wi kɔrɔgɔ.
Lere nuŋgba nuŋgba pyew wi go woolo poro pe yaa ka pye wi juguye wele†.
7 Mi wo na, Yawe Yɛnŋɛlɛ lo mi yɛn na wele.
Na jigi wi yɛn na shɔfɔ Yɛnŋɛlɛ lo na.
Na Yɛnŋɛlɛ li yaa na yɛnrɛwɛ pi logo.
Mishe wìla wi jigi wi taga
8 Yoro mbele na juguye, yaga kaa tɛgɛ na na.
Katugu ali na kaa pye mì to, mi yaa ka yiri.
Ali na kaa si pye mi yɛn ma cɛn wa diwi wi ni,
Yawe Yɛnŋɛlɛ li yaa yanwa yirige na kan.
9 Mì kapege pye Yawe Yɛnŋɛlɛ li na,
ki kala na, mi yaa li naŋgbanwa kala li kun na yɛɛ ni,
fɔ li ka sa yere na kala li ni, mbe tanga ki kan na yeri.
Li yaa kari na ni wa yanwa pi na,
mbege naga na na yɛgɛ ŋga na li yɛn ma sin.
10 Na juguye pe yaa kaga wogo ki yan ma,
kona fɛrɛ gbɔrɔ yaa pe yigi.
Poro mbele pàa pye naga yuun we na fɔ:
«Yawe Yɛnŋɛlɛ, ye Yɛnŋɛlɛ li yɛn se yeri?»
Kona muwi mi yaa la poro wele.
Leele pe yaa kaa pe tangala paa yɛgɛ ŋga na pe ma kaa na fɛnrɛgɛ tangala wa konɔ we.
11 Pilige ka wa na paan, pe yaa ka ye cagbɔgɔ ki mboro ti kan naa fɔnŋgɔ.
Ko pilige ko ni, pe yaa ka ka taga ye tara ti gbemɛ pi na.
12 Ko pilige ko ni, ye woolo pe yaa ka yiri wa Asiri tara naa Ezhipiti tara cara ti ni, mbe sɔngɔrɔ mbe pan ye kɔrɔgɔ.
Mbele pè cɛn maga lɛ wa Ezhipiti tara ti na ma saa ki wa Efirati gbaan wi na,
maga lɛ kɔgɔje wa na ma saa ki wa kɔgɔje wa na,
maga lɛ yanwiga ka na ma saa ki wa yanwiga ka na,
pe yaa ka sɔngɔrɔ mbe pan ye kɔrɔgɔ.
13 Tara sannda ti yaa ka tɔngɔ mbe koro waga, mbele pe yɛn ma cɛn wa ti ni pe tipewe pi kala na;
ko ki yaa ka pye pe kapyere ti sara we.
Mishe wìla Yɛnŋɛlɛ li yɛnri
14 Yawe Yɛnŋɛlɛ, ma woolo wele, poro mbele pe yɛn ma kɔrɔgɔ ye,
poro mbele pe yɛn ma cɛn wa kɔlɔgɔ ki ni, wa Karimɛli yanwira ti na,
ta pe yɛgɛ sinni ma simbaala kɔnrikanŋgala li ni.
Ta pe yɛgɛ sinni, paa yɛgɛ ŋga na faa kìla pye wa Bazan tara naa Galaadi tara yaayoro kasara ti ni we.
15 «Mi yaa kagbɔgɔlɔ pye ye kan
paa wagati ŋa ni yoro Izirayɛli* woolo yàa yiri wa Ezhipiti tara we.»
16 Cɛngɛlɛ sanŋgala woolo pe yaa ka ke yan,
ki yaa fɛrɛ wa pe na,
poro naa pe yawa pi ni fuun ni;
ki yaa ka to pe yɔn na,
pe nuŋgbogolo ke yaa ka jili pe na.
17 Pe yaa kaa gbanŋgban wi kaa paa wɔɔrɔ yɛn,
paa yaara nda ti maa fulolo lara na ti yɛn.
Pe yaa kaa yinrigi wa pe larasara ti ni mbaa seri,
paa yaara nda ti maa fulolo lara na ti yɛn,
mbaa paan Yawe Yɛnŋɛlɛ, we Yɛnŋɛlɛ ma kɔrɔgɔ.
Pe yaa kaa fyɛ ma yɛgɛ.
18 Yɛnŋɛlɛ la yɛgɛ woro wa paa mboro yɛn.
Ma woolo mbele pè koro go na, ma maa pe kajɔgɔrɔ ti koo nari woo wa,
na pe kapere ti kala yari pe na.
Ma naŋgbanwa pila koro wa suyi,
katugu ki yɛn mɔɔ ndanla maa kajɛŋgɛ piin we kan.
19 Ma yaa we yinriwɛ ta naa,
ma se we kapere ti jate we go na naa,
ma yaa we kapere ti ni fuun ti wa, fɔ wa kɔgɔje wi nɔgɔ.
20 Ma yɛn sɛnrɛ nuŋgba yofɔ yɛgɛ ŋga na, ma yaa ki naga Zhakɔbu setirige piile pe na.
Ma yaa kajɛŋgɛ pye poro mbele Abirahamu setirige piile pe kan,
paa yɛgɛ ŋga na màa wugu ki na faa we tɛlɛye pe kan we.