Zhonasi wi Yɛnŋɛlɛ yɛnrɛwɛ we
2
1 Ɛɛn fɔ, a Yawe Yɛnŋɛlɛ lì si mbɛnɛ gbegbenɛ la tun, a lì saa Zhonasi* wi yɔli. A Zhonasi wì si piliye taanri pye wa li nawa, ki yɔnlɔ naa ki yembinɛ†. 2 Ma Zhonasi wi ta wa mbɛnɛ li nawa, a wì si Yawe Yɛnŋɛlɛ, wi Yɛnŋɛlɛ le, li yɛnri 3 ma yo fɔ:«E, Yawe Yɛnŋɛlɛ, mbanla ta wa jɔlɔgɔ ki ni,
mìla gbele mɔɔ yeri, a màla yerege ki shɔ.
Wa nɔgɔna, wa kuulo tara*,
mìla gbele mɔɔ yeri mala saga,
a màla gbelege ki logo.
4 Màa na wa wa nɔgɔna,
wa kɔgɔje wi latijugo ki ni.
Tɔnmɔ pìla pye na yinrigi na tuun nala mari;
tɔnmɔ pìla pye na tuun ŋgbanga na go na.
5 A mì sigi jate ma yo:
‹Màla purɔ mala lali ma yɛɛ ni we Fɔ*,
konaa ki ni fuun, mi yaa kɔɔn shɛrigo gbɔgɔ* kpoyi* ki yan naa.›
6 Tɔnmɔ pìla toro na go na nala nii.
Kɔgɔje wìla na tɔn pew.
Kɔgɔje wi nawa yan kìla pye na migili na go ki na.
7 Mìla tigi fɔ wa yanwira ti nɔgɔ,
wa kuulo tara, a tìlan yɔn tɔn mbe ta mbe koro wa fɔ sanga pyew.
Ɛɛn fɔ, Yawe Yɛnŋɛlɛ,
a màla yirige mala wɔ wa ki wetijugo ki ni yinwege na.
8 Mìla pye na kuun sanga ŋa ni,
na jatere wìla pye ma na Yawe Yɛnŋɛlɛ,
a na yɛnrɛwɛ pì gbɔn ma na wa ma shɛrigo gbɔgɔ kpoyi ki ni.
9 Mbele pe maa yarisunndo ti gbogo, to nda ti se ya kala yɔn,
pe ma je yinmɛ mba pi jɛn na pye pe woo pi na.
10 Ɛɛn fɔ, mi wo na, mi yaa yurugo kɔ mbɔɔn sɔn,
mbe saraga* wɔ ma yeri.
Yɔn fɔgɔlɔ* ŋgele mì kɔn ma yeri, mi yaa ka ke tɔn.
Yawe Yɛnŋɛlɛ, mboro ma yɛn shɔfɔ we.»
11 Kona, a Yawe Yɛnŋɛlɛ lì si para mbɛnɛ li ni, a lì si saa Zhonasi wi tuguru wa tawara ti na.