Kunwɔ yurugo ŋga kìla kɔ
5
1 Izirayɛli* sege woolo, sɛnrɛ nda mi yaa yo, ki kunwɔ yurugo ŋga mi yaa kɔ mbe wa ye na, yege logo.2 Izirayɛli woolo pè to paa yɛgɛ ŋga na sumboro naŋa mbajɛɛn ma kaa to ma ku we. Wi se yiri naa.
Pe yɛn le sinlɛsaga,
lere woro wa mbe pe yirige.
3 Katugu pa we Fɔ*, Yawe Yɛnŋɛlɛ lì yo yɛɛn fɔ:
«Nambala waga kele (1 000) ka yiri Izirayɛli sege woolo pe ca ŋga ni mbe kari malaga na,
nambala cɛnmɛ pe yaa ka sɔngɔrɔ cɛ wa ki ca ki ni.
Nambala cɛnmɛ ka yiri ca ŋga ni, pe ni kɛ pe yaa sɔngɔrɔ cɛ.»
4 Katugu pa Yawe Yɛnŋɛlɛ li yɛn naga yuun Izirayɛli sege woolo pe kan yɛɛn fɔ:
«Yaa na lagajaa,
pa ye yaa yinwege ta.
5 Yaga kaa kee saa na lagajaa wa Betɛli ca.
Yaga kaa kee wa Giligali ca.
Yaga si kaa kee wa Bɛrisheba ca.
Katugu pe yaa ka Giligali ca woolo pe koli mbe kari pe ni kulowo.
Betɛli ca ki yaa ka kanŋga kataga.
6 Yaa Yawe Yɛnŋɛlɛ li lagajaa,
pa ye yaa yinwege ta.
Na ko si pye, yoro Zhozɛfu setirige piile, li yaa ye pɛ paa kasɔn yɛn,
ŋga ki yaa ye sogo,
fɔ lere kpɛ se ta wa Betɛli ca mbege figi.
7 Ye ma kaselege ki kanŋga maga pye paa yaritisorogo yɛn,
ma kasinŋge ki jan tara.
8 Yawe Yɛnŋɛlɛ lo lì wɔnŋgɔlɔ ŋgele pe yinri ŋgonɔ gbɔgɔ pire konaa wɔnndaanla ke da.
Lo li ma ti yembinɛ li ma wɔ,
ma ti laga ki ma laga.
Li ma kɔgɔje tɔnmɔ pi pye pi ma pan,
mbe suu wo tara ti na.
Li mɛgɛ koyi ŋga Yawe Yɛnŋɛlɛ.
9 Lo li ma ti jɔgɔwɔ ma gbɔn lere ŋa wi yɛn fanŋga fɔ wi na,
konaa ma malaga sigeca ki tɔngɔ.
10 «Lere ŋa wi maa yeresaga kaan kasinŋge ki yeri wa kiti kɔnsaga,
ye ma wo panra.
Lere ŋa wi ma kaselege ki yo maga filige,
wo yɛn ma ye mbɛn.
11 Ye maa nii fyɔnwɔ fɛnnɛ pe go na; pe bile* ŋa pè kɔn, ye maa wa lagala wi na naa taa.
Ki kala na, yinrɛ tiyɔnrɔ nda yè kan sinndɛɛrɛ nda pè tɛ ti ni,
ye se cɛn wa ti ni fyew.
Ɛrɛzɛn* kɛɛrɛ tiyɔnrɔ nda yè kɔn,
ye se ka ti duvɛn wa wɔ.
12 Katugu mì ye kambasinnde lɛgɛrɛ ti jɛn,
konaa ye kapere lɛgɛrɛ ti ni.
Ye maa lesinmbele pe jɔlɔ;
ye maa yɛnlɛgi yarikanra na, na fyɔnwɔ fɛnnɛ pe tanga ki shoo pe yeri wa kiti kɔnsara ti ni.
13 Ki kala na, lere ŋa wi yɛn kajɛnŋɛ, wila la para ki wagati wi ni,
katugu ki wagati wi ma pye wagati tipee.
14 Yaa kajɛŋgɛ ko lagajaa yaa ki piin,
ye tipege pyewe po yaga, jaŋgo ye yinwege ta;
jaŋgo Yawe Yɛnŋɛlɛ, Yɛnŋɛlɛ na yawa pi ni fuun fɔ li pye ye ni kaselege na, paa yɛgɛ ŋga na yaa ki yuun we.
15 Ye tipege ki panra, kajɛŋgɛ ko mbe ye ndanla.
Kasinŋge ko mbe fanŋga ta wa ye finliwɛ pyesara ti ni.
Kona, kana pa Yawe Yɛnŋɛlɛ, Yɛnŋɛlɛ na yawa pi ni fuun fɔ li yaa yoro Zhozɛfu setirige piile mbele yè koro ye yinriwɛ ta.
16 «Ki kala na, Yawe Yɛnŋɛlɛ, Yɛnŋɛlɛ na yawa pi ni fuun fɔ, we Fɔ we, pa wì yo yɛɛn fɔ:
Wa katoro ti ni fuun ti ni, naa ca nawa koŋgolo ke ni fuun ke ni, gbelege na yinrigi na yuun fɔ: ‹Yoyi! Yoyi!›
Pe yaa ka kɛrɛ kɔnfɛnnɛ pe yeri kunwɔ gbelege ki na,
mbe mbele pe kunwɔ yuuro ti jɛn pe yeri paa yuŋgbɔgɔrɔ yuuro koo.
17 Wa ɛrɛzɛn kɛɛrɛ ti ni fuun ti ni, pe yaa kaa kunwɔ gbelege gbele,
na mi ka ka toro wa ye sɔgɔwɔ we.»
Yawe Yɛnŋɛlɛ lo lì yo ma.
Yawe Yɛnŋɛlɛ li pilige ye
18 Jɔlɔgɔ yɛn ye wogo, yoro mbele yaa Yawe Yɛnŋɛlɛ li pilige ki singi ki pan we.
Yiŋgi yaa singi Yawe Yɛnŋɛlɛ li pilige ki pan ki kan ye yeri?
Ki pilige ki yaa ka pye diwi pilige.
Yanwa se ka yiri ki pilige ki ni.
19 Ye yaa ka pye paa lere wa yɛn, ŋa wila fee jara yɛgɛ,
a cɛngɛ urusi kà si saa fili wi ni;
nakoma a wì saa ye wa wi go, maa kɛɛ ki kan maga jiige mbogo ki na,
a wɔɔgɔ suu nɔ.
20 Mì yo Yawe Yɛnŋɛlɛ li pilige ki yaa ka pye diwi pilige,
yanwa se ka yiri ki pilige ki ni?
Ee, ki yaa ka pye diwi wɔlɔ pilige.
Yanwa se ka yiri.
Izirayɛli woolo pe yɛn na
21 Yawe Yɛnŋɛlɛ lì yo fɔ:
«Ye shɛrɛgɛ fɛti piliye yìlan mbɛn, yi kala woro na na.
Ye shɛrɛgɛ musaga wì la kɔ na na.
22 Na yaga pan mbe saara sogoworo* naa muwɛ saara* wɔ na yeri,
mi se yɛnlɛ ti na.
Ye napire nda yè gbegele, a tì tɔrɔ, ma pan mari wɔ na yeri nayinmɛ saara*,
mi yɛrɛ woro nari wele.
23 Ye ye yuuro tinmɛ pi lali na ni.
Mi woro na jaa mbaa ye ŋgɔni magala li nuru naa.
24 Ɛɛn fɔ ye kaselege ki yaga ki yiri, paa yɛgɛ ŋga na pulugo tɔnmɔ ma kaa na janri na yinrigi we.
Kasinŋge kila yinrigi paa lafogo yɛn, ŋga ki se waga.
25 «Yoro Izirayɛli sege woolo wele, yɛgɛlɛ nafa shyɛn ŋgele yè pye wa gbinri* wi ni, yaa yaayoro saara naa muwɛ saara wɔ na yeri ki wagati wi ni le? 26 Ŋga ye yɛn na piin nala, na ye yarisunŋgo Sikuti ŋga ki yɛn ye wunlunaŋa ki tungu konaa ye yarisunŋgo ŋga ki yɛn Wɔnnɔ Kiyuni ki ni, to nda ti yɛn ye kɛɛ yɔnlɔ tunŋgo, yaa pye na ko piin ki wagati wi ni le? Yège jɛn ma yo ko sila pye.
27 Ki kala na, mi yaa ye koli mbe kari ye ni kulowo, fɔ wa Damasi ca ki puŋgo na.»
Yawe Yɛnŋɛlɛ lo lì yo ma.
Li mɛgɛ koyi ŋga Yɛnŋɛlɛ na yawa pi ni fuun fɔ.