Yɛnŋɛlɛ yɔn sɛnrɛ nda tìla yo
2
1 Pa Yawe Yɛnŋɛlɛ lì yo yɛɛn fɔ:«Mowabu cɛnlɛ woolo pè kapege taanri pye,
fɔ yɛrɛ tijɛrɛ;
ki kala na, mìgi kɔn maga tɛgɛ, fɔ mi se pe yaga mbajɔlɔwɔ;
katugu pè Edɔmu cɛnlɛ woolo pe wunlunaŋa wi kajerilɛrɛ ti sogo mari pye cɔnrɔ.
2 Mi yaa kasɔn le Mowabu cɛnlɛ woolo pe tara ti ni mberi sogo.
Kona, ki kasɔn ki yaa ka Keriyɔti ca wunluwɔ yinrɛ ti sogo.
Pe yaa ka Mowabu cɛnlɛ woolo pe tɔngɔ wa tinmɛ, naa malaga gbeere konaa mbanlaga tinmɛ pi sɔgɔwɔ.
3 Mi yaa pe yɛgɛ sinvɔ wo naa teele pe ni pe tɔngɔ mbe pe kɔ wa pe sɔgɔwɔ.» Yawe Yɛnŋɛlɛ lo lì yo ma†.
Yɛnŋɛlɛ yɔn sɛnrɛ nda tìla yo
4 Pa Yawe Yɛnŋɛlɛ lì yo yɛɛn fɔ:
«Zhuda cɛnlɛ woolo pè kapege taanri pye,
fɔ yɛrɛ tijɛrɛ;
ki kala na, mìgi kɔn maga tɛgɛ, fɔ mi se pe yaga mbajɔlɔwɔ;
katugu pè je Yawe Yɛnŋɛlɛ li lasiri* sɛnrɛ ti na.
Pee li kondɛgɛŋgɛlɛ ke yigi mbaa tanri ke na.
Yarisunndo nda ti woro yaraga ka, to nda pe tɛlɛye pàa taga ti na faa,
to pè yaga tì pe fanla.
5 Mi yaa kasɔn le Zhuda cɛnlɛ woolo pe cara ti ni mberi sogo.
Kona, ki kasɔn ki yaa Zheruzalɛmu ca wunluwɔ yinrɛ ti sogo.»
Yɛnŋɛlɛ yɔn sɛnrɛ nda tìla yo
6 Pa Yawe Yɛnŋɛlɛ lì yo yɛɛn fɔ:
«Izirayɛli woolo pè kapege taanri pye,
fɔ yɛrɛ tijɛrɛ;
ki kala na, mìgi kɔn maga tɛgɛ, fɔ mi se pe yaga mbajɔlɔwɔ;
katugu pè lesinŋɛ wi pɛrɛ kulo penjara na,
ma fyɔnwɔ fɔ wi suru kulo sawira na.
7 Pe maa fyɔnwɔ fɛnnɛ pe tangala na pe yinrɛ ti yaari wa taambugɔ ki ni.
Paa yɛnlɛ mbe tanga kan mbele pe fanŋga kì kologo pe yeri.
To wo naa wi pinambyɔ wi ni, pe ma ye jɛlɛ nuŋgba wi kɔrɔgɔ mala mɛgɛ ŋga ki yɛn kpoyi* ki tɛgɛ fyɔngɔ* ni.
8 Yaripɔrɔ nda pè shɔ fyɔnwɔ fɛnnɛ pe yeri ma tɛgɛ pe fɔrɔ ti yɔnlɔ mberi sɔngɔrɔ pe na, to pe yɛn na sinlɛlɛ ti na saraga wɔsaga* nuŋgba nuŋgba pyew ki tanla.
Wa pe yarisunndo gbɔgɔyinrɛ ti ni, pè yigile wa mbele na,
pe maa pe duvɛn wi woo wa.
9 Ma si yala, mi wo na, mì Amɔri cɛnlɛ woolo pe tɔngɔ ma pe wɔ wa pe yɛgɛ,
poro mbele pàa tɔnlɔndɔnlɔ ndɛɛ sɛdiri* tire ri, konaa ma pye fanŋga ni paa tigbɔgɔ yɛn.
Mì pe tɔngɔ maga lɛ wa go ki na fɔ ma saa gbɔn wa tɔɔrɔ ti na†.
10 Ma si yala, mì ye yirige wa Ezhipiti tara,
ma ye yɛgɛ sin yɛlɛ nafa shyɛn ni wa gbinri* wi ni, ma Amɔri cɛnlɛ woolo pe tara ti kan ye yeri, ti pye ye woro.
11 Mì ye pinambiile pele wɔ, ma pe pye Yɛnŋɛlɛ yɔn sɛnrɛ yofɛnnɛ*;
ma ye lefɔnmbɔlɔ pele pye naziri woolo†.
Izirayɛli woolo kii pye ma le?»
Yawe Yɛnŋɛlɛ lo lì yo ma.
12 «Ɛɛn fɔ yè duvɛn kan naziri woolo pe yeri, a pè wɔ ma pe yɔn fɔlɔ* li jɔgɔ.
A yè yo fɔ Yɛnŋɛlɛ yɔn sɛnrɛ yofɛnnɛ paga kaa Yɛnŋɛlɛ li yɔn sɛnrɛ yuun.
13 Ye wele, mi yaa ye tangala mbe ye tɔngɔlɔ le tara,
paa yɛgɛ ŋga na wotoro ŋa wì yin yarilire pɔgɔlɔ ni wi ma kaa yaraga tɔngɔlɔ we.
14 Lere ŋa wì wege,
wi se ka ya mbe fe mbe lara.
Lere ŋa wi yɛn fanŋga ni,
wi fanŋga ki se ka ya kala yɔn.
Maliŋgbɔɔn ŋa wi yɛn kotogo ni,
wi se ka ya mboo yɛɛ shɔ.
15 Sandiga wɔnfɔ jɛnŋɛ wi se ka ya yere mbe sige.
Lere ŋa wì wege, wi se ka ya fe mbe shɔ.
Shɔn fevɔ jɛnŋɛ wi se ka ya fe mbe shɔ wi shɔn wi na.
16 Ko pilige ko ni, ŋa wi yɛn kotogo ni maliŋgbɔɔnlɔ pe ni,
wi yaa ka fe witiwaga ni.»
Yawe Yɛnŋɛlɛ lo lì yo ma.