Oze 3

Yɛnŋɛlɛ làa yo Oze wi jɔ wi daga mboo ndanla naa

1 Kona, a Yawe Yɛnŋɛlɛ lì silan pye naa fɔ: «Kari jɛlɛ wi kɔrɔgɔ, ma ti wɔɔn ndanla naa, wo ŋa kɔnlɔ yɛn wi yeri, a wila nandara piin we. Ma ti wi kala lɔɔn ndanla paa yɛgɛ ŋga na Izirayɛli* woolo pe yɛn ma mi ŋa Yawe Yɛnŋɛlɛ na ndanla we; ali mbege ta poro wele, pè taga yarisunndo ta yɛgɛ na, a ki yarisunndo ti ɛrɛzɛn* gato wì tanla pe ni o.»

2 Kona, a mì si warifuwe pyɔ kɛ ma yiri kaŋgurugo sara naa, konaa ɔrizhi* pyɔ culo cɛnmɛ tijɛrɛ naa nafa shyɛn ma yiri kɛ (450) ni ma ki jɛlɛ wi lɛ naa fɔnŋgɔ. 3 A mì suu pye fɔ: «Ma yaa koro na yeri fɔ wagati titɔnlɔwɔ ni. Maga ka nanjara pye naa, maga ka naŋa wa yɛgɛ lɛ naa. Mi fun mi yaa ki nuŋgba ki pye fun ma kanŋgɔlɔ.»

4 Ki pyelɔmɔ nuŋgba pi na, Izirayɛli woolo pe yaa wagati titɔnlɔwɔ pye, wunluwɔ se pye pe yeri, to se pye pe yeri. Pe se kaa saraga* woo; sinndɛlɛgɛ titɔnlɔgɔ ŋga pe ma yerege na sunnu ki na ka se ka pye pe yeri. Efɔdi* se ka pye pe yeri konaa go yarisunndo ta yɛgɛ ni, mbaa Yɛnŋɛlɛ li yewe li nandanwa kala li ni. 5 Ɛɛn fɔ ko puŋgo na, Izirayɛli woolo pe yaa ka sɔngɔrɔ mbe pan Yɛnŋɛlɛ li kɔrɔgɔ. Pe yaa ka Yawe Yɛnŋɛlɛ, pe Yɛnŋɛlɛ li lagaja konaa mbe pe wunlunaŋa Davidi wi setirige pyɔ wi lagaja. Wagati ŋa wila paan wa yɛgɛ wi ni, pe yaa kaa paan Yawe Yɛnŋɛlɛ li kɔrɔgɔ, mbaa fyɛ li yɛgɛ, jaŋgo mbeli kajɛŋgɛ pyege ki ta.