Yɛnŋɛlɛ lìli yɛɛ pye
2
1 E, kì pye mɛlɛ! We Fɔ*, wa wi naŋgbanwa gbɔɔ pi ni,wì kambaara tɛgɛ ma Siyɔn* ca ki tɔn ti ni, ma diwi le wa ki ni!
Ŋga kìla pye Izirayɛli* tara ti gbɔgɔwɔ, wì koro wa yɛnŋɛlɛ na maga kɔ maga laga ti na,
maga wa tara.
Ki ca ŋga kìla pye paa wi tɔɔrɔ tagasaga yɛn,
wi sila wi jatere wi tɛgɛ ki na, wi naŋgbanwa pilige ki ni.
2 We Fɔ wì Zhakɔbu setirige piile pe yinrɛ ti tɔngɔ pew,
wii pe yinriwɛ ta.
Wa wi kɔnrɔ tandorogo ki ni, wì Zhuda tara tiyɔnrɔ ti malaga sigecara ti jɔgɔ pew,
mari jaanri tara.
Wì wunluwɔ tara to naa fanŋga fɛnnɛ pe jan ma fɛrɛ wa pe na.
3 Wa wi naŋgbanwa gbɔɔ pi ni,
wì Izirayɛli woolo pe fanŋga ki jan maga jɔgɔ.
Sanga ŋa ni juguye pè yiri wi woolo pe kɔrɔgɔ,
wi sila wi fanŋga kɛɛ ki yirige mbe pe saga.
Wìla kasɔn le wa poro mbele Zhakɔbu setirige piile pe yinrɛ ti ni,
a kila sori kɛɛ ki ni fuun ki na.
4 Wùu sandiga ki taga naga tile wi woolo pe mɛgɛ ni,
paa pe jugu yɛn.
Wùu kalige kɛɛ ki gbɛgɛlɛ mboo woolo pe wɔn,
paa pe winfɔ yɛn.
Leele pàa pye na yɛgɛ yinrigi mbele fuun na,
wì pe ni fuun pe gbo.
Wùu naŋgbanwa gbɔɔ kala li wa Siyɔn ca shɛrigo gbɔgɔ* ki na,
paa kasɔn yɛn.
5 We Fɔ wì pye paa Izirayɛli woolo pe jugu yɛn,
wì pe tɔngɔ ma pe wɔ wa.
Wì pe wunluwɔ yinrɛ ti ni fuun ti tɔngɔ,
ma pe malaga sigecara ti jɔgɔ.
Wì yɛsanga naa jɔlɔgɔ wa Zhuda tara woolo pe na lagapyew.
6 Wùu yɛɛra cɛnsaga ki jɔgɔ,
paa yɛgɛ ŋga na lere ma kaa naŋgɔ jasa jan we.
Wi maa finli leele pe ni laga ŋga na, wìgi jɔgɔ.
Yawe Yɛnŋɛlɛ lì ti, a leele pè fɛgɛ shɛrɛgɛ fɛtiye naa cɛnpiliye* yi na wa Siyɔn ca ki ni.
Wa li naŋgbanwa gbɔɔ pi ni,
lì wunlunaŋa wo naa saraga wɔfɛnnɛ* pe tifaga.
7 We Fɔ wì je wi saraga wɔsaga* ki na;
wi cɛnsaga kpoyi* ki lakɔ wi na.
Wì Siyɔn ca wunluwɔ yinrɛ ti le juguye pe kɛɛ.
Pe tinmɛ pì gbɔgɔ wa Yawe Yɛnŋɛlɛ li shɛrigo gbɔgɔ ki ni,
paa fɛti pilige tinmɛ yɛn.
8 Yawe Yɛnŋɛlɛ lìgi kɔn maga tɛgɛ,
mbe Siyɔn ca malaga sigembogo ki jan.
Lìgi taanla mbogo sinmana li ni mbege jan,
lii yɛnlɛ mbege janga ki yaga fyew!
Lì ca ki malaga sigembogo ŋga wa puŋgo na konaa ca ki malaga sigembogo ŋga wa nawa ti jɔgɔ
mari tɛgɛ ndɛɛ ti yɛn na kunwɔ gbele;
ti yɛn na tuunri ti yɛɛ na.
9 Ca ki mbogo yeyɔngɔ kɔɔrɔ ti kaari ma toori fɔ ma ye wa tara ti ni;
lì kɔɔrɔ ti sɔgɔyaara ti kaari mari jɔgɔ pew.
Ca ki wunlunaŋa wo naa ki legbɔɔlɔ pe ni, pè ye cɛngɛlɛ kele yɛgɛ kɛɛ,
Yɛnŋɛlɛ li lasiri* wi woro wa naa.
Ali yɛrɛ ca ki Yɛnŋɛlɛ yɔn sɛnrɛ yofɛnnɛ* pe woro na yariyanra yaan,
mbaa yinrigi wa Yawe Yɛnŋɛlɛ li yeri.
10 Siyɔn ca lelɛɛlɛ* pè cɛn tara
ma pyeri dinw na wele.
Pè taambugɔ ki wo wa pe yɛɛ yinrɛ ti na,
ma jatere piriwɛn yaripɔrɔ le pe yɛɛ na.
Zheruzalɛmu ca sumbonɔ naŋambajɛɛnlɛ pè pe yinrɛ ti sogo tara nandangawa pi na.
11 Na yɛngɛlɛ kè te na na gbelege ki kala na;
na nawa pì wɔ na na;
na jatere wì piri na na,
na woolo pe jɔlɔgɔ ki kala na;
katugu piile tumɔmbɔlɔ naa piyɛngɛlɛ ke yɛn na kee kuwele wa katoro ti ni fuŋgo naa wɔgɔ ki na.
12 Pe yɛn naga yuun pe nɛɛlɛ pe kan fɔ:
«We yaa yaakara naa ɛrɛzɛn* tɔnmɔ ta se mbe ka konaa mbe wɔ.»
Pàa pye na kee kuwele wa katoro ti ni,
paa leele mbele pè wɛlɛgɛ pele yɛn.
Pàa pye na kuun
ma pe ta wa pe nɛɛlɛ pe kɛyɛn yi ni.
13 Zheruzalɛmu ca woolo yiŋgi sɛnrɛ mi yaa yo ye kan naa?
Mi yaa ye taanla ambɔ ni?
Mi yaa ye kala li taanla ambɔ wolo ni,
mbe si ye kotogo ki sogo ye na, yoro Siyɔn ca woolo wele?
Katugu ye jɔlɔgɔ kì gbɔgɔ paa kɔgɔje yɛn,
ambɔ wi mbe ya mbe ye shɔ mbe ye wɔ wa ki kala li ni?
14 Ye Yɛnŋɛlɛ yɔn sɛnrɛ yofɛnnɛ pè kagala ŋgele yan ma yo ye kan,
ke yɛn yagbogolo sɛnrɛ naa go fu sɛnrɛ.
Pe sila ye kajɔgɔrɔ ti naga mberi filige ye kan,
jaŋgo mbe ye shɔ, yaga ka ye kulowo ni.
Kagala ŋgele pè yan ma yo ye kan,
ke yɛn lefanlaga sɛnrɛ konaa punŋguwɔ sɛnrɛ.
15 Kondorowolo pe ni fuun pe yɛn na kɛndagala gbɔɔn na kawa
ma tɔngɔwɔ pi kala na.
Pe yɛn na wofegele wiin, na go fingi naga lakoo
Zheruzalɛmu ca woolo pe na.
Pe yɛn na yuun fɔ:
«Ca ŋga paa pye naga yuun ki wogo na ma yo ki yɛn ma yɔn, ma ki yɛɛ yɔn fili,
ko ŋga tara lombondo ti maa yɔgɔri ki kala na, ko ki cɛn yɛɛn gbari?»
16 Ye juguye pe ni fuun pè pe yɔnrɔ ti yɛngɛ
na para ye na.
Pe yɛn na wofegele wiin na pe ŋgangala ke kaa ye na,
na yuun fɔ: «Wè pe tɔngɔ pew.
Pilige ŋga wàa pye na singi,
koyi ŋga kì gbɔn yɛɛn, a wège yan yɛnlɛ ni.»
17 Ŋga Yawe Yɛnŋɛlɛ làa kɔn mbe pye, lìgi pye.
Sɛnrɛ nda làa yo maga lɛ wa faa, lìri yɔn fili.
Lì jɔgɔwɔ pye,
ali yɛrɛ lii lere yinriwɛ ta.
Lì ti, a ye juguye paa tɛgɛ ye na;
lì fanŋga le ye juguye pe ni.
18 Siyɔn ca woolo, yaa gbele ye kotogo ki ni fuun ni,
ye Yawe Yɛnŋɛlɛ li yeri li ye shɔ.
Yaa gbele ye yɛntunwɔ pila fuun sɔnlɔ naa yembinɛ
paa lafogo yɛn.
Yaga ka te gbelege ki ni,
yaga ka yɛntunwɔ wɔgɔ ki yaga.
19 Ye yiri yaa gbele yembinɛ,
yaa gbele yembinɛ wagati wi ni fuun wi ni.
Ye ye nawa sɛnrɛ ti yo yeri tanli Yawe Yɛnŋɛlɛ li yɛgɛ sɔgɔwɔ,
paa yɛgɛ ŋga na tɔnmɔ ma kaa wo na fuun we.
Ye ye kɛyɛn yi yirige wa naayeri ye wa wa Yɛnŋɛlɛ li yeri, yeli yɛnri,
jaŋgo ye piile pe yinwege ta;
katugu pe yɛn na kuun fuŋgo ki kɛɛ wa ca nawa koŋgolo filisara pyew ti ni.
20 E, Yawe Yɛnŋɛlɛ, ma yɛngɛlɛ ke kan we na ma wele,
ambɛnɛ ma yɛn na jɔlɔ ki jɔlɔlɔmɔ mba pi na ma?
Naga yɛn ma, ki daga jɛlɛ wuu yɛɛra pisege ki ka wi le,
wo ŋa wi ma pye maa ndanla we?
Naga yɛn ma, ki daga pe saraga wɔfɛnnɛ* naa Yɛnŋɛlɛ yɔn sɛnrɛ yofɛnnɛ* pe gbo
wa mboro ŋa Yawe Yɛnŋɛlɛ ma laga kpoyi* ki ni wi le?
21 Piile naa lelɛɛlɛ pe gboolo pe yɛn ma toori toori tara,
wa ca nawa koŋgolo ke ni.
Pànla sumbonɔ naŋambajɛɛnlɛ naa na lefɔnmbɔlɔ
pe gbo tokobi ni.
Yawe Yɛnŋɛlɛ, ma naŋgbanwa pilige ki ni, màa pe gbo;
màa pe kɔnlɔgi, ma sila lere yinriwɛ ta.
22 Màa mbele pe maa sunndo kɔngɔ waa we na pe yeri kɛɛ ki ni fuun ki na we na,
paa yɛgɛ ŋga na pe ma kaa leele yeri shɛrɛgɛ fɛti pilige na we.
Yawe Yɛnŋɛlɛ li naŋgbanwa pilige ki ni, lere kpɛ sila shɔ mbe to,
lere kpɛ sila koro yinwege na.
Piile mbele wàa gbegele, a pe we ndanla,
we juguye pè pe tɔngɔ ma pe wɔ wa pew.