Pàa Zheremi wi le kaso
20
1 Zheremi wìla pye na Yɛnŋɛlɛ li yɔn sɛnrɛ nda yuun, Imɛri pinambyɔ Pashuri ŋa wìla pye saraga wɔfɔ* konaa ma pye Yawe Yɛnŋɛlɛ li shɛrigo gbɔgɔ* welefɛnnɛ to, wìla ki sɛnrɛ ti logo. 2 Kona, a Pashuri wì si Yɛnŋɛlɛ yɔn sɛnrɛ yofɔ* Zheremi wi gbɔn, ma saa wi le ŋgbɛɛrɛ na, maa le kaso wa Yawe Yɛnŋɛlɛ li shɛrigo gbɔgɔ yeyɔngɔ ŋga wa gona ki tanla, ko ŋga pe maa yinri Bɛnzhamɛ yeyɔngɔ.3 Ki goto pinliwɛ pi ni, a Pashuri wì si Zheremi wi wɔ wa ŋgbɛɛrɛ ti na, maa yirige wa kaso wi ni. A Zheremi wì suu pye fɔ: «Yawe Yɛnŋɛlɛ li saa ma yinri naa Pashuri, ɛɛn fɔ li yaa lɔɔn yinri Magɔri Misabibu, ko kɔrɔ wo yɛn fɔ ‹Sunndo kɔngɔ ki yɛn kɛɛ ki ni fuun ki na.› 4 Katugu pa Yawe Yɛnŋɛlɛ lì yo yɛɛn fɔ: ‹Wele, mi yaa fyɛrɛ gbɔrɔ wa ma na, mboro naa ma wɛnnɛ pe ni fuun pe ni. Pe juguye pe yaa pe gbo tokobi ni ma yɛgɛ sɔgɔwɔ. Mi yɛn na Zhuda tara ti ni fuun ti nii Babilɔni tara wunlunaŋa wi kɛɛ. Wi yaa pe koli mbe kari pe ni wa Babilɔni tara, mbe sa pe gbo tokobi ni. 5 Ki ca ŋga ki yarijɛndɛ ti ni fuun, naa ki tunŋgo tɔnli wi ni fuun, naa yaara sɔnŋgbanga woro ti ni fuun konaa Zhuda tara wunlumbolo pe yarijɛndɛ ti ni fuun, mi yaa ti le pe juguye pe kɛɛ. Pe yaa ti koli, mberi lɛ, mbe kari ti ni wa Babilɔni tara. 6 Mboro Pashuri, mboro wo na, pe yaa mboro naa ma go woolo ye ni fuun ye yigi kulolo mbe kari ye ni. Ma yaa kari wa Babilɔni tara. Pa ma yaa ka ku wa, pɔɔn le wa, mboro naa ma wɛnnɛ pe ni fuun pe ni, poro mbele màa ma yagbogowo Yɛnŋɛlɛ yɔn sɛnrɛ ti yo pe kan we.› »
Jɔlɔgɔ ŋga kì taga Zheremi wi na
7 E, Yawe Yɛnŋɛlɛ, màla nɛgɛ mala fanla,
a mìlan yɛɛ yaga màla nɛgɛ mala fanla.
Màla yigi fanŋga, mà cew ta na na.
Pilige pyew, leele pe yɛn na tɛgɛ na na;
leele pe ni fuun pe yɛn naga lakoo na na.
8 Katugu sanga o sanga mi kaa para, mi ma daga mbaa gbele ŋgbanga;
mi maa para ŋgbanga na leele pe lewɛlɛwɛ kapyere to naa jɔgɔwɔ mba paa piin pi sɛnrɛ yuun.
Yawe Yɛnŋɛlɛ li yɔn sɛnrɛ nda mila yuun ti kala na, pe yɛn nala tifaga konaa na tɛgɛ na na.
9 Na mi ka yo fɔ mi se para li sɛnrɛ na naa,
fɔ mi se para li mɛgɛ ki na naa,
kona li sɛnrɛ ti ma pye paa kasɔn yɛn nala sori wa na nawa,
ki ma pye ndɛɛ kasɔn ki ye na kajeere ti ni nari sori;
mi maga ŋgbanga mbege kun na yɛɛ ni,
ɛɛn fɔ mila ya.
10 Janwa wi yɛn na sɛnpere nda yuun na na, mi yɛn nari nuru.
Pànla mɛgɛ taga nala yinri «Fyɛrɛ gbɔrɔ ti yɛn kɛɛ ki ni fuun ki na!»
Pe yɛn na yuun fɔ: «Yoo sɛnrɛ yo! Ee, ye ti woo sɛnrɛ yo fanŋga fɛnnɛ pe kan!»
Na wɛnnɛ pe ni fuun pe yɛn nala pɛɛlɛ na wele, na kaa pye mi yaa to.
Paa yuun fɔ: «Kana wi yaa wi yɛɛ yaga poo nɛgɛ poo fanla,
pa kona we yaa cew ta wi na,
mbe we kayaŋga ki wɔ wi ni.»
11 Ɛɛn fɔ Yawe Yɛnŋɛlɛ li yɛn na ni paa maliŋgbɔɔn kotogofɔ yɛn;
ki kala na, na jɔlɔfɛnnɛ pe yaa ka kurugo mbe to,
pe se cew ta.
Pe yaa ka fɛrɛ shɔ jɛŋgɛ mbege yan fɔ pee cew ta;
ki fɛrɛ ti yaa koro pe na fɔ sanga pyew,
lere se ka fɛgɛ ki fɛrɛ ti na fyew.
12 Yawe Yɛnŋɛlɛ na yawa pi ni fuun fɔ, li ma lesinŋɛ wi kala li cancan ma wele,
li ma sɛnwee wi jatere naa wi nawa kagala ke jɛn.
Yɛnŋɛlɛ, na kayaŋga ki wɔ na juguye pe ni, ma ti mbege yan,
katugu mboro mìlan kala li le ma kɛɛ.
13 Yaa yuuro koo Yawe Yɛnŋɛlɛ li kan, yaa li sɔnni,
katugu li ma fyɔnwɔ fɔ wi go shɔ,
maa wɔ wa lepeele pe kɛɛ.
14 Yɛnŋɛlɛ sa ti na se pilige ki daŋga!
Na nɔ wìlan se pilige ŋga ni, Yɛnŋɛlɛ ka ka duwaw ki na!
15 Lere ŋa wìla saa na sege ki sɛnrɛ yo na to wi kan maa nawa pi yinŋgi,
ma yo fɔ: «Mà pinambyɔ se!»
Yɛnŋɛlɛ sa ki lerefɔ wi daŋga.
16 Ki lerefɔ wì pye paa Yawe Yɛnŋɛlɛ làa cara nda tɔngɔ pew ti yɛn,
nda li sila ti yinriwɛ ta.
Pinliwɛ ni, wila gbeere nuru,
yɔnlɔ ŋgbanga na, wila maliŋgbɔɔnlɔ kɔŋgɔlɔ nuru!
17 Yiŋgi na Yɛnŋɛlɛ li sila si ti mbe ku wa na nɔ wi lara?
Kona na nɔ wi lara to ti jɛn na pye na fanga ye,
mi jɛn na koro wa wi nawa fɔ sanga pyew.
18 Yiŋgi na, mìla si yiri wa na nɔ wi lara ti ni,
ma pan naga jɔlɔgɔ naa ki tege ŋga ki yaan,
konaa mbanla yinwege piliye yi pye mbeyi kɔ wa fɛrɛ ti ni?