Yɛnŋɛlɛ li yɛn na para
17
1 «Zhuda tara woolo pe kapere ti yɛn paa yɔɔnrɔ yɛn, nda pè yɔnlɔgɔ tugurɔn yɔnlɔgɔkanŋgala ni,nda pè yɔnlɔgɔ lulu pɔnde ni;
ti yɛn ma yɔnlɔgɔ wa pe kotoro ti na,
konaa wa pe saara wɔsara* ti yɛnŋgɛlɛ ke na†.
2 Ki pyelɔmɔ pi na ma, pe pinambiile pe yaa la nawa tuun pe saara wɔsara ti na,
naa pe yarisunŋgo jɛlɛgɛ Ashera* ki tiyagala ŋgele pè kan na sunnu ke na,
koro ŋgele pè kan wa tigbɔrɔ nda ti yɛn wɛtipiire ni ti nɔgɔ na, naa tinndiye mbele pè yagara pe go na,
3 naa yanwira ti na, konaa wa wasege ki ni.
Yoro Zhuda tara woolo, mi yaa ye yarijɛndɛ naa ye kɛɛ yaara ti ni fuun ti le leele pe kɛɛ, peri koli pe kari ti ni,
mbe pinlɛ ye yarisunndo sunzara ti ni!
Mi yaa ko pye, ye kapere nda yè pye
wa tara ti lagapyew ki ni, to kala na.
4 Tara nda mìla kan ye yeri, yoro jate ye yaa ka ti peri shɔ ye yeri.
Mi yaa ka ti ye pye ye juguye pe kulolo tara ta yɛgɛ ni, nda yee jɛn;
katugu yànla naŋgbanwa pi yirige na ni paa kasɔn yɛn,
ŋga ki yɛn na sori fɔ sanga pyew.»
Yɛnŋɛlɛ lo li yɛn
5 Pa Yawe Yɛnŋɛlɛ lì yo yɛɛn fɔ:
«Lere ŋa wi maa jigi wi taga sɛnwee pyɔ na,
mbe sɛnwee wi pye wi kɛɛndagaserege,
mbe laga mi ŋa Yawe Yɛnŋɛlɛ na na,
ki fɔ wi yɛn ma daŋga.
6 Ki lerefɔ wi yɛn paa tipile yɛn wa gbinri* ŋa wì waga wi ni,
wi se fɛrɛwɛ ta.
Wi yaa koro mbe cɛn wa tara nda tì waga ti ni,
tara nda ti yɛn kɔ ni, lere woro wa ti ni.
7 «Ɛɛn fɔ lere ŋa wi maa jigi wi taga Yawe Yɛnŋɛlɛ li na,
mboo kala pyew li le li kɛɛ,
fɛrɛwɛ yɛn ki fɔ wi woo!
8 Wi yɛn paa tige yɛn, ŋga ki yɛn ma sanri lɔgɔ yɔn na,
ki ndire ti ma ye ma kari wa tɔnmɔ pi yeri;
na kafugo sanga wi ka gbɔn, kila yaraga ka kpɛ pye ki na,
ki wɛrɛ ti ma koro tipiire sanga pyew.
Ali na wawa pi ka yere yɛlɛ na ni, kila yaraga ka kpɛ pye ki na,
ki maa sɛni sanga pyew.»
9 «Sɛnwee wi nawa jatere wì tisaw ma wɛ yaraga ki ni fuun ki na,
wɛrɛ woro wa mboo sagala.
Ambɔ wi mbe ya mboo nawa pi jɛn?
10 Yawe Yɛnŋɛlɛ lo li ma sɛnwee wi nawa jatere wi cancan mbe wele,
mboo nawa kagala ke sɛgɛsɛgɛ mbe ke jɛn,
jaŋgo mbe lere nuŋgba nuŋgba pyew wi sara mbe yala wi tangalɔmɔ pi ni,
konaa mbe yala wi kapyere ti ni.
11 «Lere ŋa wi ma penjagbɔrɔ ti ta kambasinnde ti fanŋga na,
wi yɛn paa sico yɛn, ŋa wì sinlɛ jɛnrɛwɛ pa na, mba wo ma wuu se.
Wi yinwege ki ka ka gbɔn nandogomɔ sanga ŋa ni, wi penjagbɔrɔ ti mɛɛ fe maa wa,
wa wi kala li kɔsanga wi ni, wi ma kaa pye lembige.
12 «We shɛrigo gbɔgɔ* kpoyi* ki yɛn wunluwɔ jɔngɔ gbɔgɔwɔ wogo,
ŋga ki yɛn ma yagara maga lɛ wa dunruya wi dasanga wi ni.
13 E, Yawe Yɛnŋɛlɛ, mboro ŋa ma yɛn Izirayɛli woolo pe jigi tagasaga,
lere o lere ka je ma na, ko fɔ wo yaa fɛrɛ shɔ.
Mbele ka laga ma na, poro go ko yaa kɔ wa taambugɔ ki ni;
katugu pè je yinwege pulugo tɔnmɔ pi na, po mba pi yɛn Yawe Yɛnŋɛlɛ le.»
Zheremi wi Yɛnŋɛlɛ yɛnrɛwɛ
14 «E, Yawe Yɛnŋɛlɛ, na sagala, pa kona mi yaa sagala;
na shɔ, pa kona mi yaa shɔ.
Mboro mi maa sɔnni.
15 Wele, leele pe yɛn nala piin fɔ:
‹Yawe Yɛnŋɛlɛ lì yo li yaa ŋga pye, kì koro se yeri?
Ligi pye kɛ!›
16 Ɛɛn fɔ, mi wo na, mi se je mbe taga ma na, mbe pye simbaala kɔnrifɔ* ma kan.
Mi sila pye na jaa jɔlɔgɔ mbe gbɔn pe na; mboro jate mà ko jɛn.
Sɛnrɛ nda fuun tì yiri wa na yɔn, màri jɛn,
ta si fun ma na.
17 Maga ka pye fyɛrɛyaraga na yeri,
katugu jɔlɔgɔ sanga ni, mboro ma yɛn na larasaga ye.
18 Ki yaga na jɔlɔfɛnnɛ pe fɛrɛ shɔ,
ɛɛn fɔ, mi wo ka ka fɛrɛ shɔ;
ki yaga pe sunndo wi kɔn pe na,
ɛɛn fɔ na sunndo wi ka ka kɔn na na.
Jɔlɔgɔ wa pe na,
ma pe tɔngɔ tɔngɔsaga shyɛn.»
Yɛnŋɛlɛ lì yo
19 Pa Yawe Yɛnŋɛlɛ làa para na ni yɛɛn, ma yo fɔ: «Kari ma sa yere wa ca ki mbogo yeyɔngɔ ŋga pe yinri Tara woolo pe yeyɔngɔ ki na, Zhuda tara wunlumbolo pe maa yiin na yinrigi yeyɔngɔ ŋga ni we, konaa ma sa yere fun Zheruzalɛmu ca yeyɔnrɔ sannda ti ni fuun ti na. 20 Maga yo leele pe kan fɔ: ‹Ye Yawe Yɛnŋɛlɛ li sɛnrɛ ti logo, yoro Zhuda tara wunlumbolo, naa Zhuda tara woolo ye ni fuun konaa yoro Zheruzalɛmu ca woolo ye ni fuun, yoro mbele ye maa yiin na yinrigi wa ki yeyɔnrɔ nda ti ni we. 21 Yawe Yɛnŋɛlɛ lì yo fɔ: Ye ye yɛɛ yingiwɛ jɛn, yaga kaa tuguro tungu cɛnpilige* ki na, yaga kaa yiin tuguro ni laga Zheruzalɛmu ca ki ni. 22 Yaga ka tuguro lɛ mbe yiri ti ni wa ye yinrɛ ti ni cɛnpilige ki na. Yaga ka tunŋgo kpɛ pye, ɛɛn fɔ ye cɛnpilige ki tɛgɛ ki yɛ na kan, paa yɛgɛ ŋga na mìla ki yo ye tɛlɛye pe kan we.›
23 «Ɛɛn fɔ pee yɛnlɛ mbe logo na yeri, pee nuŋgbolo jan na yeri. Pàa pe nuŋgbogolo ke ŋgban ma je mbe logo na yeri, pe sila yɛnlɛ na yɛrɛwɛ sɛnrɛ ti na.»
24 Yawe Yɛnŋɛlɛ lì yo fɔ: «Na yaga yɛnlɛ mbaa nuru na yeri jɛŋgɛ, na ye woro na tuguro tungu mbaa yiin ti ni laga ki ca ŋga ki yeyɔnrɔ ti ni cɛnpilige ki na, na yaga cɛnpilige ki tɛgɛ ki yɛ na kan, na ye woro na tunŋgo ka kpɛ piin ki pilige ki na, 25 pa kona wunlumbolo mbele pe yaa kaa cɛɛn wunlunaŋa Davidi wi wunluwɔ jɔngɔ ki na wi yɔnlɔ, poro naa pe legbɔɔlɔ pe ni, pe yaa kaa tooro mbaa yiin laga ki ca ŋga ki yeyɔnrɔ ti ni. Pe yaa ka pye pe wotoroye mbele shɔnye maa tilele pe na, konaa shɔnye na, poro naa pe legbɔɔlɔ pe ni, naa Zhuda tara woolo pe ni konaa Zheruzalɛmu ca woolo pe ni. Leele yaa ka pye mbe cɛn laga ki ca ŋga ki ni sanga pyew. 26 Pa kona leele pe yaa kaa yinrigi wa Zhuda tara cara ti ni, naa wa Zheruzalɛmu kanŋgara na cara ti ni, naa wa Bɛnzhamɛ tara ti ni, naa wa yanwira tigiwɛn tara ti ni, naa wa yanwira tara ti ni konaa wa Negɛvu* tara ti ni, mbe pan mbaa saara sogoworo* woo, naa saara* ta yɛgɛ ni, naa muwɛ saara ni, naa wusuna nuwɔ taan* ni konaa nayinmɛ saara ni wa mi ŋa Yawe Yɛnŋɛlɛ na shɛrigo gbɔgɔ* ki ni. 27 Ɛɛn fɔ na yee yɛnlɛ mbe logo na yeri, na yee cɛnpilige ki tɛgɛ ki yɛ na kan, na ye kaa tuguro tungu mbaa yiin wa Zheruzalɛmu ca yeyɔnrɔ ti ni cɛnpilige ki na, pa kona mi yaa kasɔn le ca ki yeyɔnrɔ ti ni; ki kasɔn ki yaa Zheruzalɛmu ca wunluwɔ yinrɛ ti sogo, ki kasɔn ki se si figi.»