Zheremi wìla Yɛnŋɛlɛ li yɛnri
14
1 Yawe Yɛnŋɛlɛ làa sɛnrɛ nda yo Zheremi wi kan wawa mba pìla to pi wogo na, ti nda:2 «Zhuda tara woolo pe yɛn kunwɔ kayaŋga na,
pe cara ti yɛn na tuun na kee,
yɛsanga gbɔn leele pe na, pe yɛn ma cɛn tara;
Zheruzalɛmu ca woolo pe gbelege ki yɛn na yinrigi na sagawa jaa.
3 Legbɔɔlɔ pe ma pe tunmbyeele pe tun pe sa tɔnmɔ ko pe kan,
pe ma lɛ ma kari wa tɔnmɔ were ti yɔn na, ɛɛn fɔ paa sa tɔnmɔ yan wa.
Pe ma sɔngɔrɔ ma pan pe koyaara ti ni waga.
Pe jigi ŋa wì kɔn pe na konaa jatere piriwɛn pi kala na, pe ma pe yɛrɛ ti tɔn fɛrɛ ti na.
4 Tara tì waga fɔ ma jɛɛnri,
katugu tisaga woro na paan wa tara ti ni.
Ki kala na, kɛrɛ kɔnfɛnnɛ pe jigi wì kɔn pe na, fɔ a pè pe yɛrɛ ti tɔn fɛrɛ ti na.
5 Ali yɛrɛ safuwe ŋa wa wasege ki ni, wi ma se ma kari maa pyɔ wi toro,
na tifɛlɛgɛ ki shoo paa dabaala yɛn;
pe yɛngɛlɛ ke saa na woo pe na, katugu yan woro wa pe ka.»
Tara woolo pe sɛnyoro re
7 «E, Yawe Yɛnŋɛlɛ, ali na kaa pye we kajɔgɔrɔ ti yɛn na we jɛrɛgi,
kala la pye ma we saga ma mɛgɛ ko kala na!
Katugu we kambasinnde tì lɛgɛ,
wè kapege pye ma na.
8 Mboro ŋa ma yɛn Izirayɛli* woolo pe jigi tagasaga ye,
mboro ŋa pe shɔfɔ jɔlɔgɔ sanga ni,
yiŋgi na mɛɛ ma yɛɛ pye paa nambanŋa yɛn laga tara ti ni?
Nakoma paa canakarifɔ yɛn, ŋa wi yaa pan mbe wɔnlɔsaga nuŋgba wɔnlɔ mbe si kari?
9 Yiŋgi na mɛɛ ma yɛɛ pye paa lere wa yɛn, ŋa wì fanŋga kì kɔ,
paa maliŋgbɔɔn kotogofɔ yɛn, ŋa wi se ya mbe lere shɔ?
Ma si yala, Yawe Yɛnŋɛlɛ, ma yɛn laga we sɔgɔwɔ,
ma mɛgɛ ki yɛn we na;
maga ka we wa!»
10 Yawe Yɛnŋɛlɛ li yɛn na sɛnrɛ nda yuun ki leele mbele pe wogo na ti nda: «Kaselege ko na, mbaa yanri faa la toro ko ki yɛn ma pe ndanla. Paa ya cɛn laga nuŋgba. Ki kala na, pe kala li woro ma Yawe Yɛnŋɛlɛ li ndanla. Koni li yaa li jatere wi tɛgɛ pe kajɔgɔrɔ ti na, mbe pe kapere ti fɔgɔ tɔn pe na.» 11 A Yawe Yɛnŋɛlɛ lì silan pye naa fɔ: «Maga kanla yɛnri mbe yo mbe kajɛŋgɛ pye ki leele mbele pe kan. 12 Ali na pe ka yeŋge le mbanla yɛnri, mi se pe sagawa jagbelege ki logo. Na pe ka saara sogoworo* naa muwɛ saara* wɔ na yeri, mi se yɛnlɛ ti na. Katugu mi yaa pe tɔngɔ tokobi, naa fuŋgo konaa yambewe ni.» 13 A mì sho fɔ: «E, we Fɔ Yawe Yɛnŋɛlɛ, Yɛnŋɛlɛ yɔn sɛnrɛ yofɛnnɛ* pe yɛn naga yuun pe kan fɔ: ‹Tokobi kpɛ se gbɔn ye na, fuŋgo se to ye na. Ɛɛn fɔ Yɛnŋɛlɛ li yaa yɛyinŋge jɛŋgɛ kan ye yeri laga ki laga ŋga ki ni.› » 14 A Yawe Yɛnŋɛlɛ lì silan pye naa fɔ: «Ki Yɛnŋɛlɛ yɔn sɛnrɛ yofɛnnɛ, yagbogolo sɛnrɛ pe yɛn na yuun na mɛgɛ ki na. Mi si pe tun, mi sigi konɔ kan pe yeri, mi si sɛnrɛ kpɛ le pe yɔn. Yariyanra yagbogolo woro, naa jɛɛrɛ kapyere konaa lefanlaga sɛnrɛ nda ti yɛn na yinrigi wa pe yɛɛra nawa jatere wi ni, to pe yɛn na yuun ye kan ma yo Yɛnŋɛlɛ yɔn sɛnrɛ ri.» 15 Ki kala na, Yawe Yɛnŋɛlɛ lìgi yo ma yo fɔ: «Ki Yɛnŋɛlɛ yɔn sɛnrɛ yofɛnnɛ pe yɛn na para na mɛgɛ ni, naga yuun ma yo fɔ malaga naa fuŋgo se to laga tara ti ni, ma si yala, mi ma mi pe tun. Ki Yɛnŋɛlɛ yɔn sɛnrɛ yofɛnnɛ wele, tokobi naa fuŋgo ki yaa pe gbo. 16 Pe yɛn na ki Yɛnŋɛlɛ yɔn sɛnrɛ ti yuun leele mbele kan, tokobi naa fuŋgo ki yaa pe gbo fun mbe pe jaanri wa Zheruzalɛmu ca nawa koŋgolo ke ni. Lere se ka ta mbe poro naa pe jɛɛlɛ, naa pe pinambiile konaa pe sumborombiile pe gboolo pe le. Mi yaa pe kapege ki yaga ki sɔngɔrɔ ki to pe na.»
Zheremi wi yɛn na Yɛnŋɛlɛ li yɛnri
17 Ki sɛnrɛ nda ti yo leele pe kan fɔ:
«Na yɛntunwɔ pi yɛn na fuun yɔnlɔ naa yembinɛ,
pi woro mbe yere,
katugu jɔlɔgɔ to na woolo mbele na lendanlambala pe na,
pè wɛlɛgɛ fɔ jɛŋgɛ.
18 Na mi ka kari wa wasege ki ni,
tokobi wì leele mbele gbo, poro mi ma yan wa;
na mi ka ye wa ca nawa,
fuŋgo ki yɛn na leele mbele jɔlɔ, poro mi ma yan wa.
Yɛnŋɛlɛ yɔn sɛnrɛ yofɛnnɛ poro naa saraga wɔfɛnnɛ pe ni, pe yɛn na tara ti yanri na toro,
ɛɛn fɔ pe woro na kala la kɔrɔ jɛnni.»
Tara woolo pe sɛnyoro re
19 «Yɛnŋɛlɛ, naga yɛn ma, ma Zhuda tara woolo pe wa pew wi le?
Naga yɛn ma, Siyɔn* ca woolo pe lakɔ ma na wi le?
Yiŋgi na, a ma si jɔlɔgɔ wa we na,
ŋga wɛrɛ woro ki na?
Wàa pye naga singi mbe yɛyinŋge ta,
ɛɛn fɔ wee yaraga ka kpɛ yan;
wàa pye na we jɔlɔgɔ ki mbɔnrɔsanga wi singi,
ɛɛn fɔ kì pan ma pye we yeri sunndo kɔngɔ gbɔgɔ.
20 Yawe Yɛnŋɛlɛ, wè yɛnlɛ we kapere ti na,
we tɛlɛye pe kajɔɔgɔ wège jɛn;
katugu wè kapege pye ma na.
21 Ma mɛgɛ ki kala na, maga ka we tifaga,
maga kɔɔn wunluwɔ jɔngɔ ŋga gbɔgɔwɔ ni ki tifaga!
Yɔn finliwɛ* mba mà le we ni, ma jatere wi tɛgɛ pi na.
Maga kaa jɔgɔ.
22 Cɛngɛlɛ sanŋgala ke yarisunndo nda ti woro yaraga ka, ti ni fuun ti ni,
kikiin ki mbe ya mbe tisaga ki pye ki pan?
Naga yɛn ma, naayeri wo cɛ wi ma ti tisaga ki maa paan wi le?
Yawe Yɛnŋɛlɛ, we Yɛnŋɛlɛ, mboro ma, ma ma ti tisaga ki ma pan wi le?
We jigi wi yɛn ma na,
katugu mboro ma yɛn ki kagala ke ni fuun ke pyefɔ we.»