Yarisunndo ti se ya taanla
10
1 Yoro Izirayɛli* woolo, Yawe Yɛnŋɛlɛ li yɛn na sɛnrɛ nda yuun na waa ye na, yeri logo.2 Yawe Yɛnŋɛlɛ lì yo fɔ:
«Yaga kaa cɛngɛlɛ sanŋgala ke kapyere ti fɔrɔgi;
kacɛn kagala ŋgele wa yɛnŋɛlɛ na, yaga kaa fyɛ ke yɛgɛ,
ali na kaa pye cɛngɛlɛ sanŋgala ke maa fyɛ ke yɛgɛ o.
3 Katugu cɛngɛlɛ sanŋgala ke kalɛgɛlɛ ke yɛn wagafe.
Pe ma saa tige ki kɔn wa kɔlɔgɔ ki ni,
kapyɔ jɛnfɔ wi maga tɛ kotɛnɛ ni yarisunŋgo.
4 Pe maga fere warifuwe naa tɛ ni,
pe ma marito tɛgɛ maga kan pɔndiile ni,
jaŋgo ki ta ki yere.
5 Ki yarisunndo ti yɛn paa kɛrɛ sigewe yɛn, ŋa wi maa fingifingi na sannjɛrɛ ti puro wa kɛrɛ nawa,
ti se ya para.
Lere wi mari lɛ,
katugu ti se ya mbe tanga.
Yaga kaa fyɛ ti yɛgɛ,
katugu ti se ya kapege pye,
ti se si ya fun mbe kajɛŋgɛ pye.»
6 E, Yawe Yɛnŋɛlɛ ma yɔngɔ woro wa!
Ma yɛn ma gbɔgɔ, ma mɛgɛ kì gbɔgɔ ma yawa pi fanŋga na!
7 Ambɔ wi se fyɛ ma yɛgɛ, mboro ŋa cɛngɛlɛ ke wunluwɔ?
Ki daga paa fyɛ ma yɛgɛ,
katugu wa cɛngɛlɛ ke kajɛnmbɛlɛ pe ni fuun pe ni, wa pe wunluwɔ tara ti ni fuun ti ni,
ma yɔngɔ woro wa.
8 Pe ni fuun pe yɛn tijinliwɛ fu fɛnnɛ naa lembire.
Pe yarisunndo ti se ya lere naga yaraga ko ka kpɛ ni, katugu ti yɛn tire ko cɛ.
9 Pe maa paan warifuwe ŋa pè gbɔn papara papara wi ni na yinrigi wa Tarisisi ca,
na paan tɛ ni fun na yinrigi wa Ufazi† tara.
Kapyɔ jɛnfɔ wi mari tunŋgo pye,
tɛ gbɔnfɔ wi mari gbegele.
Ki yarisunndo pe mari fere ŋganra yaripɔrɔ tiyɔnrɔ konaa kondoro yaripɔrɔ ni.
Ti ni fuun ti yɛn kapyɔ jɛnfɛnnɛ poro kɛɛ yɔnlɔ tunŋgo.
10 Ɛɛn fɔ kaselege ko na, Yawe Yɛnŋɛlɛ lo li yɛn Yɛnŋɛlɛ le;
li yɛn Yɛnŋɛlɛ na yinwege wolo konaa wunluwɔ fɔ sanga pyew.
Na li ka nawa ŋgban, tara ti maa yɛgɛyɛgɛ,
cɛngɛlɛ ke se ya yere mbeli kɔnrɔ tandorogo ki sige.
11 Ye yaa ki yo pe kan fɔ yarisunndo nda ti sila naayeri wo naa tara ti da, ti yaa ka kɔ mbe wɔ wa laga tara ti ni, ti yaa ka kɔ mbe wɔ laga dunruya wi ni.
12 Yawe Yɛnŋɛlɛ lì tara ti da li yawa pi fanŋga na,
ma dunruya wi da li kajɛnmɛ pi fanŋga na,
ma naayeri wi gbegele li tijinliwɛ pi fanŋga na.
13 Na li ka gbanla, tɔnmɔ pi ma gbogolo pi yɛɛ na wa yɛnŋɛlɛ na,
li ma ti kambaara ti ma yiri fɔ wa tara ti kɔsaga ma pan;
li ma yɛnŋɛlɛ yɛngɛlɛmɛ pye mbe ti tisaga ki ma pan,
li ma ti tifɛlɛgɛ ki ma yiri wa ki cɛnsaga na gbɔɔn.
14 Sɛnwee piile pe ni fuun pe yɛn tijinliwɛ fu fɛnnɛ, wa kpɛ si kala jɛn;
tɛ gbɔnfɛnnɛ pe ma yarisunndo nda gbegele, fɛrɛ ma kaa pe yigi ti kala na;
katugu ki yaara yanlɛrɛ nda pe ma gbegele, ti maa leele fanla,
yinwege wɔnwɔn kpɛ woro ti ni.
15 Ki yaara ti yɛn wagafe, ma pye titɛgɛrɛ yaara;
na pe kiti kɔnwagati wiga ka gbɔn, ti yaa ka kɔ mbe wɔ wa.
16 Ɛɛn fɔ Zhakɔbu setirige piile pe Yɛnŋɛlɛ li woro paa ki yarisunndo ti yɛn;
katugu lo lì yaara ti ni fuun ti da.
Izirayɛli woolo poro pe yɛn cɛnlɛ na li yɛn li kɔrɔgɔ ye.
Li mɛgɛ koyi ŋga Yawe Yɛnŋɛlɛ na yawa pi ni fuun fɔ.
Jɔgɔwɔ pì yɔngɔ Zheruzalɛmu ca
Zheremi wi sɛnyoro
17 Zheruzalɛmu ca woolo, yoro mbele pè maliŋgbɔɔnlɔ cɛnsaga kan ma ye yɔn tɔn,
ye yiri ye ye tuguro ti koli wa tara ti na.
18 Katugu pa Yawe Yɛnŋɛlɛ lì yo yɛɛn fɔ:
«Wele, yiŋgɔ wo ni, mi yaa tara ti woolo pe purɔ mbe pe wa fɔ lege paa gbafurugo fuŋgɔrɔgɔ yɛn;
mi yaa jɔlɔgɔ wa pe na mbe pe jori, jaŋgo pe juguye pe pe yigi.»
Zheruzalɛmu ca woolo pe sɛnyoro
19 E, jɔlɔgɔ to na na, pànla tɔngɔ;
na sagbanga kɔsaga woro ki na!
Mìla pye naga yuun ma yo fɔ: «Tege gbɔn na na, ɛɛn fɔ mi yaa ki kun na yɛɛ ni.
20 Na paraga go* kì jɔgɔ, ki pɔmanda ti ni fuun tì kɔɔnlɔ.
Na piile pe ni fuun pè kari mala yaga, wa kpɛ woro wa naa.
Lere woro na yeri mbanla paraga go ki kan naa fɔnŋgɔ,
mbanla wɔnlɔgo ki yirige naa.»
Zheremi wi sɛnyoro
21 Simbaala kɔnrifɛnnɛ* † pè pye tijinliwɛ fu fɛnnɛ,
pee Yawe Yɛnŋɛlɛ li lagaja;
ki kala na, pe tunŋgo kii yɔn,
pe simbaala pe ni fuun pè gbɔn ma jaraga.
22 Ye tinmɛ pa logo! Pi yɛn na yinrigi na yɔngɔ we ni!
Tinmɛ gbɔɔ pa yɛn na yinrigi wa yɔnlɔparaga kamɛŋgɛ kɛɛ tara ti ni.
Pe yaa Zhuda tara cara ti tɔngɔ mberi pye tara nda ti yɛn waga,
mberi pye kombokara ti cɛnsaga.
Zheremi wìla yɛnri wi cɛnlɛ woolo
23 E, Yawe Yɛnŋɛlɛ, mìgi jɛn ma yo sɛnwee pyɔ wi yinwege kala li woro wi yɛɛ kɛɛ,
sɛnwee wi se ya mbaa wi tangalɔmɔ pi yɛgɛ sinni wa konɔ sinnɛ li ni.
24 E, Yawe Yɛnŋɛlɛ, na gbɔn mala le konɔ, ɛɛn fɔ maga pye maga yala;
maga kaga pye naŋgbanwa ni, nakoma ma yaa na tɔngɔ pew.
25 Ma naŋgbanwa pi yirige cɛngɛlɛ sanŋgala ŋgele kee ma jɛn koro ni,
ki leele mbele pe woro nɔɔ mɛgɛ ki gbogo we.
Katugu poro pe yɛn na Zhakɔbu setirige piile pe tɔnri,
pe yɛn na pe tɔnri mbe pe kɔ, mbe pe wɔ wa;
pè pe tara ti jɔgɔ mari yaga waga.