Zheruzalɛmu ca woolo pe kapere
5
1 Ye Zheruzalɛmu ca ki yanri ye toro wa ki nawa koŋgolo ke ni,ye wele jɛŋgɛ, ye ca kagala ke yewe ye ke jɛn;
ye wele wa katoro ti ni yege jɛn,
na kaa pye mbe lere nuŋgba ta wa,
lere nuŋgba pe, ŋa wi yɛn na kasinŋge ki piin,
ŋa wi yɛn naga jaa mbaa tanri kaselege na;
pa kona mi yaa Zheruzalɛmu ca ki kala yaga.
2 Ali na paga ki yo mbe yo fɔ: «Mì wugu ki na Yawe Yɛnŋɛlɛ na yinwege wolo li mɛgɛ ki na,»
yagbogowo wuguro pe ma wugu.
3 E, Yawe Yɛnŋɛlɛ, naga yɛn ma, kaselege ko ma ma yɛn na lagajaa wi le?
Mà pe gbɔn, ɛɛn fɔ kii pe ya.
Mà pe tɔngɔ, ɛɛn fɔ pee yɛnlɛ ma yɛrɛwɛ sɛnrɛ ti na.
Pè pe yɛrɛ ti waga ma wɛ walaga na,
pee yɛnlɛ mbe sɔngɔrɔ mbe pan ma kɔrɔgɔ.
4 Mìla pye nala yɛɛ piin fɔ: «Ki leele mbele pe yɛn fyɔnwɔ fɛnnɛ,
tijinliwɛ woro pe ni;
katugu pee Yawe Yɛnŋɛlɛ li konɔ li jɛn,
pee pe Yɛnŋɛlɛ li kakɔnndɛgɛlɛ li jɛn.
5 Ki kala na, mi yaa kari wa pe legbɔɔlɔ pe yeri,
mbe sa para pe ni;
ki woro nala kɔɔn shyɛn, poro wo na, pè Yawe Yɛnŋɛlɛ li konɔ li jɛn,
pè pe Yɛnŋɛlɛ li kakɔnndɛgɛlɛ li jɛn.»
Ɛɛn fɔ poro fun, pè yiri ma je paa yɛgɛ ŋga na falinɛrɛ ma kaa ti tunŋgo pyetige ki kaw maga laga ti yɛɛ na,
ma pe manda nda tìla pye ma pe pɔ pe Yɛnŋɛlɛ li na ti sangala†.
6 Ki kala na, jara yaa yiri wa kɔlɔgɔ ki ni mbe to pe na,
dabaaga yaa yiri wa funwa lara falafala ti ni, mbe pan mbe pe kɔɔnlɔ,
kamɔlɔ yaa pan mbe lara wa pe cara ti tanla, mbaa pe singi.
Lere o lere ka yiri wa ca, wi yaa to wo na mboo kɔɔnlɔ yuroyuroyuro;
katugu pe kajɔgɔrɔ tì lɛgɛ,
pe mbasinmɛ pì gbɔgɔ.
7 Zheruzalɛmu ca woolo, mi yaa ye kapere ti kala yaga ye na mɛlɛ?
Ye piile pè je na na;
yaara nda ti woro Yɛnŋɛlɛ,
to pe yɛn na wungu ti mɛgɛ ki na.
Mìla pe kala yɔn yaara ti ni fuun ti kan pe yeri,
konaa ki ni fuun, pe yɛn na jatara naa nandara piin.
Pe ma kari lɛgɛrɛ ma saa nanjaa wi go ki yin kanw.
8 Pe yɛn paa shɔnye nambala yɛn, mbele pè tin pe yɛɛ ni pe lugusanga ni,
pe ni fuun nuŋgba nuŋgba pe yɛn na gbele pe nambala yɛɛnlɛ pe jɛɛlɛ pe puŋgo na.
9 Naga yɛn ma, mii daga mbe jɔlɔgɔ wa pe na ki kagala ke mɛgɛ ni wi le?
Yawe Yɛnŋɛlɛ lo lì yo ma.
Naga yɛn ma, mii daga mbanla kayaŋga ki wɔ ki cɛnlɛ woolo mbele pe cɛnlɛ li ni wi le?
10 Mbogo ŋga kì pe ɛrɛzɛn* kɛɛrɛ ti maga, yege kaanla ye ye wa ti ni yeri jɔgɔ,
ɛɛn fɔ yaga kari tɔngɔ pew.
Ye ɛrɛzɛn tiire njere ti kɔɔnlɔ,
katugu ti woro mi ŋa Yawe Yɛnŋɛlɛ na woro.
11 Kaselege ko na, Izirayɛli* tara woolo naa Zhuda tara woolo
pànla java wi;
Yawe Yɛnŋɛlɛ lo lì yo ma.
Yawe Yɛnŋɛlɛ li woolo pe kiti kala
12 Zhuda tara woolo pè finlɛ Yawe Yɛnŋɛlɛ li wogo na, ma yo fɔ:
«Li se ya yaraga ka pye we na!
Jɔlɔgɔ kpɛ se gbɔn we na!
Malaga se gbɔn we na, fuŋgo se si to we na.
13 Yɛnŋɛlɛ yɔn sɛnrɛ yofɛnnɛ* pe woro yaraga ka naa, kaawɔ tifɛlɛgɛ ko cɛ;
pe Yɛnŋɛlɛ yɔn sɛnrɛ ti yɛn wagafe.
Jɔlɔgɔ kagala ŋgele pe yɛn na yari, ke sɔngɔrɔ ke to pe na!»
14 Ki kala na, Yawe Yɛnŋɛlɛ, Yɛnŋɛlɛ na yawa pi ni fuun fɔ, pa lì yo yɛɛn fɔ:
«Kì kaa pye ko sɛnrɛ nda to yè yo,
wele, mi yaa ti na sɛnrɛ ti pye paa kasɔn yɛn wa mboro Zheremi ma yɔn;
ki leele mbele pe yaa pye paa kanŋgirɛ yɛn, nda ki kasɔn ki yaa sogo.
15 Wele, yoro Izirayɛli woolo wele,
mi yaa cɛnlɛ la yirige mbe wa ye na, mbe yiri fɔ wa lege;
Yawe Yɛnŋɛlɛ lo lì yo ma.
Cɛnlɛ lali na li yɛn fanŋga ni,
cɛnlɛ na li yɛn wa maga lɛ wa fafafa;
cɛnlɛ na ye sili sɛnrɛ ti jɛn,
ye woro nali sɛnrɛ ti nuru.
16 Pe sanŋgbɔ wi yɛn paa fanga yɛn, ŋga ki yɔn ki yɛn ma yɛngɛ;
pe ni fuun pe yɛn maliŋgbɔɔnlɔ kotogofɛnnɛ.
17 Pe yaa ka ye yarilire naa ye yaakara ti ka,
mbe ye pinambiile naa ye sumborombiile pe tɔngɔ,
mbe ye simbaala naa ye nɛrɛ ti ka,
mbe ye ɛrɛzɛn tiire naa ye figiye tire ti jɔgɔ;
ye malaga sigecara nda yè ye jigi wi taga ti na,
pe yaa kari tɔngɔ tokobi ni.»
18 «Ɛɛn fɔ konaa ki ni fuun, ko wagati wo ni, mi se ka ye tɔngɔ mbe ye kɔ pew. Yawe Yɛnŋɛlɛ lo lì yo ma. 19 Na paga ka yewe mbe yo fɔ: ‹Yiŋgi na, Yawe Yɛnŋɛlɛ, we Yɛnŋɛlɛ lì si ki wogo ŋga ki ni fuun ki pye we na?› Kona ma pe yɔn sogo, fɔ mì yo fɔ: ‹Kì kaa pye yè je na na, na yarisunndo ta yɛgɛ gbogo laga ye tara, ki kala na, ye yaa ka saa tunŋgo piin cɛnlɛ la yɛgɛ woolo kan tara ta yɛgɛ ni, nda ti woro ye tara.› »
Yɛnŋɛlɛ làa li woolo pe yɛri
20 «Yege sɛnrɛ nda ti yari Zhakɔbu setirige piile pe kan,
ye ti Zhuda tara woolo peri logo, fɔ:
21 ‹Yege sɛnrɛ nda ti logo,
yoro cɛnlɛ woolo mbele tijinliwɛ fufɛnnɛ naa kambajɛnmbɛlɛ!
Yɛngɛlɛ yɛn ye na, ɛɛn fɔ ye woro na yaan;
nuŋgbogolo yɛn ye na, ɛɛn fɔ ye woro na nuru†.
22 Ye woro na fyɛ na yɛgɛ wi le?
Yawe Yɛnŋɛlɛ lo lì yo ma.
Ye woro na seri fyɛrɛ ti na na yɛgɛ sɔgɔwɔ wi le?
Muwi mì taambugɔ ki tɛgɛ ma kɔnlɔ gbɔn kɔgɔje wi kan,
maga pye kɔnlɔ na li yɛn kɔsagafu, na wi se ya kaanla.
Kɔgɔje wi tɔnmɔ mba pi maa yinrigi na tuun, pi maa tinni ŋgbanga, ɛɛn fɔ pi se ya mbeli kaanla;
pi maa tinmɛ gbɔɔ yinrigi, ɛɛn fɔ pi se ya toro kɔnlɔ lo na.›
23 Ɛɛn fɔ ki cɛnlɛ na li woolo pe yɛn kotoŋgbanga fɛnnɛ, ma pye leele mbele pè yiri ma je;
pè je na konɔ li na ma kari pe yɛɛ konɔ.
24 Pe yɛrɛ woro naga yuun wa pe yɛɛ nawa mbe yo fɔ:
‹Ye ti waa fyɛ Yawe Yɛnŋɛlɛ, we Yɛnŋɛlɛ li yɛgɛ,
lo na li ma tisara ti kan we yeri ti wagati wi na we,
tisara koŋgbannda naa puŋgo woro ti ni,
mbe yapeleye ya kan we yeri yarilire kɔnyapeleye.›
25 Ye kajɔgɔrɔ to tì ti ki kagala kè gbɔn ma piri;
ye kapere to tì ti yè ki yarijɛndɛ ti la.
26 «Katugu lepeele yɛn wa na woolo pe sɔgɔwɔ.
Pe ma lara na leele pe singi, paa sannjɛgɛlɛ yigifɔ yɛn;
pe ma mɛrɛ jan wa leele pe yɛgɛ na pe yinri.
27 Sannjɛgɛlɛ yigifɔ wi maa ŋgonjogo ki yin sannjɛgɛlɛ ke ni yɛgɛ ŋga na,
pa pè pe yinrɛ ti yin ma, yaara nda pè ja nambara ni ti ni.
Pa pège pye ma, ma fanŋga ta konaa ma yarijɛndɛ lɛgɛrɛ ta.
28 Pè tugbɔlɔ ma tɔrɔ na yɛngɛlɛ;
pe kapege pyewe pì kɛɛ toro.
Paa kiti wi kɔn kaselege na, mbe pijiriwe wi tanga ki kan wi yeri,
ɛɛn fɔ poro wogo ko yɛn na yɔngɔ na kee yɛgɛ.
Paa yɛnlɛ mbe fyɔnwɔ fɔ wi tanga ki kan wi yeri.
29 Naga yɛn ma, mii daga mbe ki kagala ke fɔgɔ tɔn pe na wi le?
Yawe Yɛnŋɛlɛ lo lì yo ma.
Naga yɛn ma, mii daga mbanla kayaŋga ki wɔ ki cɛnlɛ woolo mbele pe cɛnlɛ li ni wi le?
30 Kapegbɔgɔ naa katijangara yɛn na piin wa tara ti ni.
31 Yɛnŋɛlɛ yɔn sɛnrɛ yofɛnnɛ pe yɛn na yagbogowo sɛnrɛ yuun,
saraga wɔfɛnnɛ pe yɛɛra tɔnli wo cɛ pe yɛn na jaa.
Ki kagala koro ke yɛn mala woolo pe ndanla!
Ɛɛn fɔ wa ki kagala ke kɔsaga, ye yaa ki pye mɛlɛ san?»