64
1 Kasɔn ki ma yimbiwara ti sogo yɛgɛ ŋga na,kasɔn ki ma ti tɔnmɔ mba pè taga pi maa kanni yɛgɛ ŋga na,
pa ma juguye pe yaa ma mɛgɛ ki jɛn ma,
mbe ti cɛngɛlɛ kaa fyɛ fɔ mbaa seri ma yɛgɛ.
2 Sanga ŋa ni màa kagbɔgɔlɔ fyɛrɛ wogolo ke pye ma we fo,
naa màa tigi, a yanwira tì si yɛgɛyɛgɛ.
3 Lere kpɛ faga logo,
lere kpɛ nuŋgbolo faga logo,
lere faga yan yɛnlɛ ni,
mbe yo fɔ yarisunŋgo ka yɛgɛ yɛn wa,
kaawɔ Yɛnŋɛlɛ mboro ŋa ma maa kagbɔgɔlɔ piin mbele pe maa wele ma yeri pe kan,
mboro nuŋgba ko cɛ.
4 Leele mbele pe maa kasinŋge ki piin nayinmɛ ni,
mbele pe maa tanri ma koŋgolo ke na, na jatere piin ma wogo ki na,
ma ma poro fili.
Ɛɛn fɔ màa nawa ŋgban we ni,
katugu wàa kapege pye.
We yaa shɔ, na we kaa tanri ki faa koŋgolo ke na we.
5 We ni fuun we yɛn leele mbele pe yɛn fyɔngɔ* ni;
we kasinŋge ŋga fuun wè pye, kì kanŋga ma pye paa yaripɔrɔ yɛn, nda ti yɛn fyɔngɔ ni.
We ni fuun wè pye paa wɛrɛ yɛn nda tì fanla,
we kambasinnde ti yaa kari we ni paa tifɛlɛgɛ yɛn.
6 Lere kpɛ woro nɔɔ mɛgɛ ki yinri naa,
lere kpɛ si yiri mbe yere, mbe mara ma na;
katugu mɔ̀ɔ yɛgɛ ki lara we na,
mà we yaga, a pè we tɔngɔ we kajɔgɔrɔ ti kala na.
7 Konaa ki ni fuun, Yawe Yɛnŋɛlɛ, mboro ma yɛn we To we;
woro we yɛn joro re, mboro ma yɛn we fanrifɔ we.
We ni fuun we yɛn mboro kɛɛ yɔnlɔ tunŋgo.
8 E, Yawe Yɛnŋɛlɛ, maga ka nawa ŋgban we ni mbe sa toro,
maga ka ma jatere wi tɛgɛ we kajɔgɔrɔ ti na fɔ sanga pyew;
ki yaga maa wele we na, we ni fuun we yɛn ma woolo.
9 Ma cara kpoyi* tì koro waga;
Siyɔn* ca kì kanŋga ma pye gbinri*,
Zheruzalɛmu ca kì kanŋga ma pye kataga.
10 We shɛrigo gbɔgɔ kpoyi ŋga kìla pye gbɔgɔwɔ ni,
ko ŋga we tɛlɛye pàa pye nɔɔ sɔnni wa ki ni,
kasɔn yinŋgele kè ki sogo.
Ki laga ŋga fuun kìla pye kagbɔgɔ yɔn we yeri,
ki ni fuun kì kanŋga ma pye kataga.
11 E, Yawe Yɛnŋɛlɛ, ki kagala ŋgele koro ke ni fuun puŋgo na,
ma yaa pyeri ma se kala la pye we kan wi le?
Ma yaa pyeri mbe we yaga wa jɔlɔgɔ ki ni,
fɔ sa toro ki da wi na wi le?